VOV4.Bahnar - ‘Năr 3/8, Dơ nŏ anih vei lăng kon pơ lei dêh char Dak Lak đei hla ar chih gơih ăn Anih tơm vei lăng jang kơ măy, tĕch mơ dro athei tơ gŭm tĕch mơ dro tơ mam chŏh jang xa tơ̆ tơ ring, lơ̆m nŏh mă lơ jĭ plei Bơ păng Sầu riêng. Dêh char Dak Lak dang ei đei dang 5.300 hec ta ‘long sầu riêng oei đei plei, plei ‘long sơ năm ‘nâu đei hlŏh 100 rơ bâu tân, mă lơ ‘nŏh hơ drĕch Ri6, Đôna tôch ‘lơ̆ng. Jơ̆p lơ̆m dêh char kŭm đei dang 5.500 hec ta bơ oei đei plei, plei ‘long dang 82 rơ bâu tân.

Vă pơm ‘lơ̆ng ăn 2 tơ drong jang tơm, tang găn jĭ hai, atŏk tơ iung mŭk drăm hai, Dơ nŏ anih vei lăng kon pơ lei dêh char Dak Lak pơ tho ăn dôm tơ ring kơ chăng chă lơ trong jang vă tơ gŭm ăn kon pơ lei tĕch mơ dro tơ mam. Kŭm hăm ‘nŏh, Dơ nŏ anih vei lăng kon pơ lei dêh char Dak Lak đei hla ar chih athei Anih tơm vei lăng jang kơ măy, tĕch mơ dro tơ gŭm pơih anih tĕch mơ dro hăm điên tư, pơ tho tơ ƀôh trong jang xa, tĕch mơ dro tơ mam kiơ̆ kơ măy sô̆, hơ nhăk Bơ, Sầu riêng đơ̆ng dêh char tĕch tơ̆ dôm anih tĕch mơ dro hăm điên tư.

Dơ̆ng: Tơ blơ̆