VOV4.Bahnar - Vă tơ gŭm dơ̆ng dôm tơ mam pơ gang tang găn jĭ Covid – 19, đtang măt Kŏng ti jang ŭnh điên Dak Lak ‘nao pơ jao asong 100 blăh hơ băn ao vei lăng joăt kơ yua păng 100 che gom pơ gang (kơ loăi P-95 joăt yua) ăn Hnam pơ gang Đa khoa pơ lei tơm Buôn Ma Thuột, dêh char Dak Lak. Akŏp kơ jă tơ mam asong ăn Hnam pơ gang ‘măng âu đei kơ jă dang 20 triệu hlak jên.

Sơng iŏk tơ mam tơ gŭm, tang măt Hnam pơ gang Đa khoa pơ lei tơm Buôn Ma Thuột tơ roi, jĭ hơ buh Covid – 19 tŏk bŏk đei ƀôh krê hơ mơt, pơ lei tơm Buôn Ma Thuột pơ ma hơ drô̆ păng dêh char Dak Lak pơ ma atŭm hlôi păng tŏk bŏk đei lơ bơ ngai jĭ, tơ drong sơng iŏk dơ̆ng bơ̆n hơ băn ao, che gom kŭm nhen tơ mam kơ măy kơ mŏk pơ gang đei tơ drong ‘lơ̆ng gĭt kăl tơ gŭm khŭl y ƀak si sơ đơ̆ng jơ hngơ̆m hloh lơ̆m bơ̆ jang tang găn jĭ.

Thuem: Tơ blơ̆