VOV4.Bahnar - Dơ nŏ anih vei lăng kon pơ lei apŭng Ea H’leo, dêh char Dak Lak athei pơ dơ̆h jang hăm Kơ dră păng Phŏ Kơ dră vei lăng kon pơ lei xăh Ea Nam yoa ưh kơ chăng, lăng pơ hơi tơ drongtang găn jĭ. Jô̆ truh ‘năr 5/9, apŭng Ea H’leo đei 112 ‘nu bơ ngai jĭ Covid-19, hơ drô̆ xăh Ea Nam đei 73 ‘nu, jing tơ ring đei jĭ dêh hlŏh kơ apŭng Ea H’leo. 

Kiơ̆ dôm tơ drong tơ chơ̆t 2906 păng 2908, Kơ dră vei lăng kon pơ lei apŭng Ea H’leo athei gơ̆t, ưh ăn jang hăm Kơ dră vei lăng kon pơ lei xăh Ea Nam Nguyễn Văn Nhiệm păng Phŏ kơ dră vei lăng xăh Kpă Y Chức jăl jang 2021-2026. Athei măr sư pơ dơ̆h jang 15 năr vă set hơ len, pơm hơ dăh hơ năp jang đơ̆ng bơ ngai chĕp kơ̆l lơ̆m tơ drong pơ gơ̆r tang tang găn jĭ Covid-19 tơ̆ xăh Ea Nam.

Xăh Ea Nam lê̆ kon pơ lei pơ dong bơ ngai lôch, akŏm lơ bơ ngai, pơm glăi tơ dỏng tơ chơ̆t 15 đơ̆ng Thủ tướng tĕh đak, pơm tơ pŏh jĭ lơ̆m tơ pôl. Lơ̆m dôm năr athei pơ dơ̆h jang, Kơ dră vei lăng kon pơ lei xăh Ea Nam Nguyễn Văn Nhiệm athei pơ jao đĭ đăng tơ drong jang ăn ƀok Nguyễn Văn Tiến, Phŏ Kơ dră vei lăng kon pơ lei xăh.

Dơ̆ng: Tơ blơ̆