VOV4.Bahnar - Atŭm hăm lơ tơring lơ̆m tĕh đak, jĭ hơbŭh Covid-19 tŏk bok pơm kơnê̆ kơtang trŭh rim tơdrong jang muk drăm, tơpôl tơ dêh char Dak Lăk. Vă lăp hăm khei ‘năr đei jĭ hơbŭh, atŏk jang sa, mơdro sa đei iŏk yua kơ jăp, pơ đĭ kon pơlei, hơnĭh mơdro sa păng khŭl kơdră chĕp pơgơ̆r dêh char tŏk bŏk atŏk kơtang jang kiơ̆ kmăi kmŏk kơtơ̆ng ang, yak trŭh jang kiơ̆ kơsô̆. Tơdrong tơplĭh ‘măng mă blŭng hơnhăk đei iŏk yua kơ jăp trŏ lăp hăm trong tơlĕch jang ting ring, mĭnh păh tang găn jĭ mĭnh păh atŏk tơ iung mŭk drăm, tơpôl.

Jang kiơ̆ kmăi kmŏk kơtơ̆ng ang, yak trŭh jang kmăi kmŏk kơsô̆ tŏk bŏk đei lơ hơnĭh mơdro sa păng rim hơnĭh bơ̆ jang tĕh đak lơ̆m dêh char Dak lăk tơlĕch jang kơtang

Kŏng ty gre chơ tơmam drăm An Phước ‘nŏh mĭnh lơ̆m dôm hơnĭh jang gre chơ tơmam drăm tĭh hlŏh lơ̆m pơlei tơm Buôn Ma Thuột, dêh char Dak Lăk hăm dang 80 tong gre tĭh, joăt chơ tơmam drăm năm tơ̆ rim dêh char pơlei tơm păng chơ tơmam drăm tĕch tơ̆ tĕh đak đe. Ƀok Phạm Đông Thanh, Kơdră chĕp pơgơ̆r Kŏng ty tơbăt, jĭ hơbŭh Covid-19 pơrăm đơ̆ng blŭng sơnăm 2020 trŭh dang ei hôi pơm pơrăm kơtang trŭh tơdrong jang kơ Kŏng ty. Dôm sơnăm hơdrol tim mă đei jĭ hơbŭh, jô̆ hơtŏ lơ̆m 1 sơnăm kŏng ty chă chơ đei dang 300.000 tân tơmam drăm chŏh jang sa, mă lei dang ei dôm tơmam drăm au hlôi tơjur 20%, tơdrong đei iŏk yua jei tơjur lei lăi mơ̆n. Vă lăp hăm khei năr đei jĭ hơbŭh, Kŏng ty hlôi atok kơtang bơ̆ jang hăm kmăi kmŏk kơtơ̆ng ang vă tơchă rim khŭl jang hơdoi, pơma dơnŭh dĭh băl, kĭ pơkăp jang hơdoi, adoi chĕp pơgơ̆r bơ̆ jang đei jơnei hlŏh:“Tơplĭh jang hăm kmăi kmŏk kơsô̆ ‘nŏh jing trong jang gĭt kăl hlŏh vă iŏk đei jơnei kơ jăp lơ̆m pơm tơlĕch tĕch mơdro kơ hơnĭh jang, mă kăl lơ̆m khei ‘năr đei jĭ hơbŭh dang ei. Hăm rim hơnĭh jang, đĭ đăng rim tơdrong pơkăp tĕch răt păng bơ jang hăm rim bơngai răt yua đei bơ̆ jang păng email ngăl. Găh kon jên ‘nŏh pơtrŭh kiơ̆ internet banking. Trŭh hloi tơdrong chĕp pơgơ̆r jang jei jang kiơ̆ hăm internet, pơtĭh gia nhen mang tơpôl dăh mă phân mêm pơ yua hơdrô̆ ăn hơnĭh mơdro sa.’Moi kiơ̆ đơ̆ng nŏh kơna dă ƀiơ̆ tơ ƀơ̆p dĭh băl kơ tă.”

Ƀok Lương Văn Minh, Kơ iĕng Kơdră chĕp pơgơ̆r Khŭl Hơnĭh mơdro sa dêh char Dak Lăk tơbăt, lơ̆m dêh char đei vă jê̆ 18.000 hơnĭh mơdro sa. Jĭ hơbŭh Covid-19 hlôi pơm kơnê̆ kơtang trŭh tơdrong jang hơnĭh mơdro sa păng tơdrong iŏk yua kmăi kmŏk kơtơ̆ng đei lăng jing trong jang kăl hloh hrei au. Lơ hơnŏh mơdro sa lơ̆m dêh char hlôi tơplĭh ‘nao trong jang păng ‘măng mă blŭng đei jơnei hơ iă. Păh Khŭl jei tŏk bŏk pơ jing Hơnĭh tơgoăt tơplih kơsô̆ hơnĭh mơdro sa vă tơgŭm djru ăn rim hơnĭh mơdro sa lơ̆m khŭl:“Khŭl mơdro sa dêh char jei hlôi iung jang pơjing Hơnĭh tơm tơgoăt tơplĭh kơsô̆ hơnĭh mơdro sa. Khei năr kơnh ‘nŏh kăl iung jang tơgoăt păng tơplĭh ‘nao kơsô̆ hơnih mơdro sa. Đơ̆ng nŏh, rim hơnih mơdro sa gô tĕch tơmam drăm kiơ̆ lơ̆m mạng online, tơchă hơnĭh tĕch răt hăm kmăi kmŏk lơ̆m khei ‘năr đei jĭ hơbau au”.

          Yak hơdoi hăm kon pơlei, hơnĭh mơdro sa lơ̆m tĕh đak lơ̆m khei ‘năr đei jĭ hơbŭh pơrăm kơtang, rim hơnĭh bơ̆ jang tơ̆ dêh char Dak Lăk jei tŏk bŏk tơlĕch jang kiơ̆ trong jang iŏk yua kmăi kmŏk kơtơ̆ng ang. Ƀok Ngô Việt Hồng, Kơ iĕng Kơdră chĕp pơgơ̆r Dơnŏ anĭh Thuê̆ dêh char Dak Lăk tơbăt, dôm tơdrong iŏk đei ‘măng mă blŭng tôch hơ iă. Hrei au, 100% hơnĭh mơdro sa lơ̆m dêh char pơm hla bơar păng ba thuê̆ điên tư. Dêh char jei atok kơtang tơlĕch jang iŏk thuê̆, iŏk jên pơm hla bơar tĕch răt teh, gre bơbĭt, gre ôtô ‘moi kiơ̆ điện tử:“Hlŏh đơ̆ng bơ̆ jang ‘moi kiơ̆ điên tư, tơbăt hơdăh tơpăt lơ̆m kmăi kmŏk kơtơ̆ng ang, ‘nŏh mĭnh păh tang găn jĭ jơnei, tơjur ƀiơ̆ đei tơdrong ư̆h kơ ‘lơ̆ng ăn bơngai năm thuê̆ păng kang ƀô̆ jang găh thuê̆. Mă ƀar, găh đunh đai, tơdrong tơ ƀôh hơdăh đĭ dăng kon jên iŏk thuê̆, ba thuê̆, mĭnh trong jang điên tư lơ lŏh ư̆h kơ jor gô ‘lơ̆ng hơ iă hlŏh”.

Ƀok Nguyễn Tuấn Hà, Kơ iĕng Kơdră chĕp pơgơ̆r Dơnŏ anĭh vei lăng kon pơlei dêh char Dak Lăk tơbăt, lơ̆m khei ‘năr jĭ hơbuh pơrăm kơtang, tơdrong tơplĭh ‘nao kơsô̆ hăm tơring ‘nŏh jĭ tôch kơ kăl. Khei 3/2021, Dơnŏ anĭh Đảng dêh char Dak Lăk hlôi pơdrơ̆ng kiơ̆ tơdrong Tơchơ̆t găh jang kmăi kmŏk dêh char Dak Lăk jăl jang 2021 - 2025, lăng trŭh sơnăm 2030. Lơ̆m au ƀơ̆t măt gô ‘măn ăn 300 ti hlak jên tơmơ̆t jên jang tơdrong au, hơdrin pơjing đei hơyak pran hlŏh lơ̆m atŏk tơ iung mŭk drăm tơpôl kơ tơring:“Xơkơ̆t hơdăh jang hăm kmăi kmŏk kơsô̆ ‘nŏh jing kăl hlŏh lơ̆m ‘măng iung bơ̆ jang hăm knăi kmŏk ‘măng mă 4, jing jơ ‘năr rơvơn vă Dak Lăk drŭh tom, yak hơdoi păng kĕ ploi găh jang kiơ̆ khoa hŏk kmăi kmŏk lơ̆m rim tơdrong erĭh sa kơ tơpôl. Kơdră chĕp pơgơ̆r Đảng dêh char, Dơnŏ anĭh vei lăng kon pơlei dêh char tơchơ̆t rơ̆ih jang kmăi kmŏk kơsô̆ vă tơplĭh pơ đĭ trong chĕp pơgơ̆r vei lăng rim tơdrong jang mŭk drăm tơpôl kơ dêh char.”

Jĭ hơbŭh Covid-19 tŏk bŏk ƀơm kơnê̆ trŭh lơ tơdrong lơ̆m erĭh sa. Tơdrong jang kiơ̆ kmăi kmok kơtơ̆ng ang, yak trŭh jang kmăi kmok kơsô̆ jing trong kăl hlŏh păng dêh char Dak Lăk tŏk bŏk tơ ƀô̆h hơdăh tơdrong hơdrin jang kiơ̆ vă bơ̆ jang ‘lơ̆ng jang ting ring, mĭnh păh kĕ tang găn jĭ mĭnh păh atŏk tơ iung mŭk drăm.

Bơngai chĭh: Công Bắc

Tơblơ̆ nơ̆r: Amazưt