VOV4.Bahnar - Hơnơ̆ng tơlĕch jang pôk rơ̆ih Kơdră tang măt Kuô̆k hôi jăl XV păng kơdră tang măt Jơnŭm vei lăng kon pơlei jăl jang 2021- 2026, Dơnŏ anĭh bơ̆ jang Mặt trận Tổ quốc Việt Nam dêh char Dak Lăk hlôi pơgơ̆r iung jang năm dăr lăng bơ̆ jang pôk rơ̆ih tơ̆ mĭnh ƀar tơring lơ̆m dêh char. Hlŏh đơ̆ng dăr lăng, đĭ đăng tơring hlôi jang kiơ̆ ƀlep trong jang, trong tơlĕch jang, sơđơ̆ng ‘lơ̆ng ƀlep trong jang tơlĕch ăn.

Đơ̆ng năr 8/4 trŭh năr 13/4, Khŭl hlôi năm dăr lăng bơ̆ jang pôk rơ̆ih hăm rim apŭng, tơring păng Hơnĭh jang Măt trân koeng kơphô̆ tơ̆ rim apŭng Cư M’Gar, Ea Kar, Krông Ana păng Ea H’Leo. Trong dăr lăng ‘nŏh: Hơlen tơdrong tơlĕch jang kiơ̆ Khôi luơ̆t Pôk rơ̆ih; tơdrong pơjing păng bơ̆ jang kơ Dơnŏ anih chĕp pơgơ̆r pôk rơ̆ih, rim hơnĭh iŏk chĕp pơgơ̆r pôk rơ̆ih; tơdrong pơgơ̆r iŏk nơ̆r tơgop đơ̆ng bơngai tăh hla tơgop nơ̆r tơ̆ tơring mă bơngai đei hơnăn ăn pôk tơmơ̆t oei sa. Lơ̆m khei năr kơnh, Dơnŏ anĭh Mặt trận Tổ quốc Việt Nam dêh char Dak Lăk hơnơ̆ng tơlĕch 2 ‘măng dăr lăng tơdrong pơ klep hla bơar hơnăn bơngai tăh hla păng hơmet ăn kơtŭh tăh hla pôk rơ̆ih, pơklep hơnăn rim bơngai vă pôk tơmơ̆t, xek tơlang kơthơ tơkêng. Khei ‘năr năm dăr lăng đơ̆ng năr 15/4 trŭh đĭ năr 30/4/2021.

Tơblơ̆ nơ̆r: Amazưt