VOV4.Bahnar - Jang kiơ̆ nơ̆r pơrô̆ jang đơ̆ng Dơnŏ anĭh tơm Kŏng ang găh ƀơk ăn păng vei lăng kơtheh kăn kươk kon pơlei, Kŏng ang dêh char Dak Lăk tŏk bŏk iung jang đĭ jơhngơ̆m, akŏm lơ khŭl iang, atŏk jơ ‘năr bơ̆ jang trŭh 19 jơ lơ̆m 1 năr sơng iŏk hla bơar chĭh tơbăt athei ƀơk ăn kơtheh kăn kươk kon pơlei đei pơklep chip điên tư ăn kon pơlei sơđơ̆ng ‘lơ̆ng păng ƀlep khei ‘năr pơkă. Hơnih tơm bơ̆ jang tĕh đak kơ dêh char Dak Lăk ‘nŏh kơsô̆ 1 lơ̆m 18 hơnĭh pơm ăn kăn kươk kon pơlei đei pơklep chip điên tư lơ̆m dêh char.

Hăm 3 khŭl jang, tơklăh asong 3 hơyŭh: pơgê, kơsơ̆ - gơmăng, đơ̆ng 7 jơ pơgê trŭh 10 jơ gơmăng, lơ̆m minh năr sơng iŏk đei 600 hla bơar apĭnh ƀơk ăn kơtheh kăn kươk kon pơlei đơ̆ng kon pơlei trŭh apĭng pơm kơtheh kăn kươk kon pơlei. Jơ ‘năr bơ̆ jang tŏk dơ̆ng 15 jơ lơ̆m 1 năr tơplih ăn 8 jơ lơ̆m 1 năr nhen hơdrol au ki hlôi pơjing rơvơn ăn kon pơlei năm pơm kơtheh kăn kươk. Truh dang ei, Kŏng ang dêh char hlôi sơng iŏk đei 70.000 hla bơar pơtrrŭh ăn Dơnŏ anih tơm Kŏng ang xek tơlang ƀơk ăn. Kiơ̆ vă jang trŭh năr 30/6, Kŏng ang dêh char Dak Lăk pơm keh đang 1 trĭu 200.000 kơtheh kăn kươk kon pơlei (‘moi kiơ̆ trong pơkăp jang iŏk đei tŏ sĕt hlŏh ‘nŏh 70% mă Dơnŏ anih tơm Kŏng ang athei).

Tơblơ̆ nơ̆r: Amazưt