VOV4.Bahnar - Tơ̆ hơnăp jĭ hơbŭh Covid-19 tơpoh, kơsơ̆ năr 31/5, Dơnŏ anĭh vei lăng kon pơlei kơ pơlei tơm Buôn Ma Thuột, dêh char Dak Lăk tơchơ̆t iung jang dơ̆ng hơnĭh gak lăng hơlen tơ̆ trong glung Hồ Chí Minh jăl trong găn hlŏh gơng 14 găh tơring Hòa Phú vă tang găn jĭ Covid-19.

Hơnĭh gak tang găn jĭ Covid - 19 tơ̆ trong glung Hồ Chí Minh jăl gan hlŏh dêh char Dak Lăk đei jang dơ̆ng

Kiơ̆ kơ ‘nŏh, iŏk đơ̆ng 5 jơ kơsơ̆ năr 31/5, rim khŭl jang đei Kanh sát vei lăng trong nơnăm, vei lăng sơđơ̆ng, khŭl jang pơgang ... tơ̆ hơnĭh gak dăr lăng hơlen bơngai păng gre mơ̆t lĕch lơ̆m dêh char Dak Lăk vă tang găn tơdrong tơpŏh jĭ, dăr lăng hơlen tơdrong pơm kiơ̆ tang găn jĭ hơbŭh păng hơmet pơ ‘lơ̆ng tơdrong jang pơgang ‘nŏh “pơtŏ yŭh akau jăn, gom ƀŏ, tơroi tơbăt akau jăn, pơlôch sơmach jĭ hăm bơngai păng gre yak hlŏh hơnĭh gak au. Adoi dăr lăng hơlen, ƀô̆h tơtom rim bơngai jĭ dăh mă đei jau tơpoh jĭ, rim bơngai đei ƀô̆h sơmach jĭ Covid-19 vă pơm kiơ̆ ăn oei hơdrô̆, ming hơmet tơtom tơdăh đei ƀô̆h tơpŏh jĭ.

Khŭl ƀok thây pơgang pơlei tơm Buôn Ma Thuột pơtho tơbăt ăn tơmoi tơroi tơbăt akau jăn

 – Kơmăng năr 31/5, yă H’Yim Kđoh – Phŏ Kơdră Anih vei lăng kon pơlei d/c Đăk Lăk adoi jing Phŏ kơdră pơgơ̆r jang tang găn păng tơjră jĭ Covid – 19 kơ d/c hlôi kĭ hla bar tơlĕch dôm trong pơkăp kăl tang găn păng tơjră jĭ Covid – 19 ƀơ̆t lơ̆m tơring 'nao đei bơngai hơbuh jĭ Covid – 19 mă 4 tơ̆ apŭng Ea H’leo (bơngai jĭ kơsô̆ 7186).  Kiơ̆ hla bar chih tơbang, jâ̆p plei tơm Buôn Ma Thuột gô ưh ăn akŏm hloh 10 'nu hăm dôm anih xet xa, anih huch ka phê, đak nhă; anih pơchơt lơ̆m tơpôl. Pơdơh hloi dôm tơdrong jang kơ dôm anih et xa kiơ̆ joh trong. Duh kiơ̆ hla bar pơkăp âu, kon pơlei chôt vih dăh mă truh đơ̆ng dôm tơring hơbuh jĭ Covid - 19 hli hlơt noh athei năm truh anih jang y tê̆ tơjê̆ hloh vă tơroi găh y tê̆ păng đei pơtho ăn trong oei tơklăh tơ̆ hnam lơ̆m 21 năr. Lơ̆m apŭng Ea Hleo athei pơm kiơ̆ tơchơ̆t pơvei, tơklăh oei pha vă tang găn păng tơjră pơrang jĭ pơtơm đơ̆ng 9 jơ kơmăng năr 31/5/2021 truh lai yơ đei tơchơ̆t pơtơ̆ng 'nao.

Tơblơ̆ nơ̆r: Amazưt-Lan