VOV4.Bahnar - Kơ sơ̆ ‘năr 9/9, Kơ dră anih vei lăng kon pơ lei apŭng Ea H’leo, dêh char Dak Lak tơ băt tŏk bŏk jang hơ dai hăm anih jang pơ gang dêh char vă jang kiơ̆ dôm tơ drong hơ găt găh jang pơ gang ƀơ̆t chă ƀôh 2 ‘nu bơ ngai joăt jang teh đak đe truh tơ̆ apŭng vă bơ̆ jang tơ drong jang pơm ŭnh điên kial đei jĭ hăm SARS-CoV-2. Kiơ̆ kơ ƀok Nguyễn Văn Hà, Kơ dră Anih vei lăng kon pơ lei apŭng Ea H’leo, ‘năr 6/9, khŭl joăt jang teh đak đe ‘noh đei 6 ‘nu năm đơ̆ng pơ lei tơm Hồ Chí Minh tŏk tơ̆ apŭng vă bơ̆ jang tơ drong jang pơm ŭnh điên kial. Lăp ƀơ̆t truh tơ̆ apŭng, pơ đĭ 6 ‘nu joăt jang âu đei ăn oei hơ drô̆ tơ̆ 1 hnam hô tel, 1 ‘nu 1 lơ̆m. ‘Năr 8/9, Hnam pơ gang apŭng Ea H’leo pơ gơ̆r iŏk đak muh test hrĕnh ‘noh 2 lơ̆m kơ sô̆ 6 ‘nu bơ ngai joăt jang đei ƀôh jĭ hăm SARS-CoV-2. Dôm bơ ngai joăt jang âu hlôi đei ƀet 2 jrŭm vaccine COVID-19 păng hlôi đei ăn oei hơ drô̆ y tế 14 năr kiơ̆ tơ drong hơ găt tơ̆ pơ lei tơm Hồ Chí Minh. CDC Dak Lak hơ len lăng tơ drong 2 ‘nu bơ ngai joăt jang âu tơ poh jĭ ăn bơ ngai nai ‘noh rŏ lăng ưh kơ lơ. Dang ei rim anih jang kơ pal kơ dêh char Dak Lak păng apŭng Ea H’leo tŏk bŏk pơ gơ̆r pơm dôm hla ar kăl vă ba 2 ‘nu joăt jang âu năm hơ met, hơ dai hăm ‘noh pơ gơ̆r ăn oei hơ drô̆ ăn bơ ngai joăt jang uơ oei dơ̆ng kiơ̆ tơ drong hơ găt.

Thuem: Tơ blơ̆