VOV4.Bahnar - ‘Năr 24/8, Anih vei lăng jang pơ gang dêh char Dak Lak chih iŏk dơ̆ng 1 ‘nu bơ ngai lôch yoa jĭ COVID -19. ‘Nâu jĭ bơ ngai mă 4 lôch yoa đơ̆ng jĭ COVID -19 tơ̆ dêh char Dak Lak. Bơ ngai lôch âu ‘nŏh jĭ bơ ngai jĭ COVID-19 đei kơ sô̆ 161.832, rơ nĕh sơ năm 1989, tŏ 54 trong Ama Jhao, phương Tân Lập, plt Buôn Ma Thuột.

Bơ ngai jĭ 161.832 ‘nŏh jĭ bơ ngai sem brem, đa hơ ving. Bơ ngai jĭ 161.832 đei băt tơ pŏh pơ rang jĭ SARS –CoV-2 đơ̆ng ‘năr 2/8 păng đei chơ hơ met tơ̆ Hnam pơ gang hơ met jĭ kơ sô̆ 1. ‘Năr 3/8 bơ ngai jĭ đei chơ ba năm tơ̆ Hnam pơ gang hơ met jĭ Lao păng jĭ tơ sŏh. Truh ‘năr 15/8, jĭ roi ăl kơ na bơ ngai jĭ 161.832 đei chơ năm hơ met tơ̆ anih hơ met jĭ COVID -19 tơ̆ hnam pơ gang Đa khoa tơ ring Tây Nguyên.

Đơ̆ng rŏng 9 năr hơ met tôch pơ nĕh tơ̆ Hnam pơ gang Đa khoa tơ ring Tây Nguyên, truh 16h15’ ‘năr 23/8, bơ ngai jĭ 161.832 lôch. Hnam pơ gang Đa khoa tơ ring Tây Nguyên pơm tôm hla ar vă hơ met pơ ‘lơ̆ng hơ kâu jăn bơ ngai lôch kiơ̆ tơ drong hơ găt.

Dơ̆ng: Tơ blơ̆