VOV4.Bahnar - Tơdrong kơtơ̆ng ang đơ̆ng Hơnĭh jang pơgnag dêh char Dak Lăk, lơ̆m 24 jơ (jô̆ đơ̆ng 4 jơ kơsơ̆ năr 21/10), dêh char Dak Lăk đei 174 ‘nu bơngai tơpŏh jĭ SARS-Cov-2. Mă hơdăh tơ̆ thĭ xah Buôn Hồ đei 64 ‘nu bơngai tơpŏh jĭ SARS-Cov-2, apŭng Cư Kuin 29 ‘nu, apŭng Krông Ƀŭk 25 ‘nu, apŭng Krông Ana 13 ‘nu, apŭng Cư M’gar 12 ‘nu, pơlei tơm Buôn Ma Thuột 11’nu. Tơdrong tơtăm hloh ‘nŏh lơ̆m 174 ‘nu bơngai ‘nao tơpŏh au, đei 82 ‘nu jĭ đei ƀô̆h lơ̆m kon pơlei. Rim tơring nhen, thĭ xăh Buôn Hồ, huyện Krông Ƀŭk, Cư Kuin, pơlei tơm Buôn Ma Thuột… hơnơ̆ng ƀô̆h bơngai jĭ tơ̆ lơ̆m kon pơlei. Tơ̆ hơnăp tơdrong đei ƀô̆h lơ bơngai tơpŏh jŏ lơ̆m kon pơlei, hơnĭh jang pơgang dêh char Dak Lăk tŏk bŏk hơdrin jang ghơdoi hăm kơdră rim tơring năm tơchă dôm bơngai oei tơ jê̆, khăm hơlen ăn rơbau ‘nu kon pơlei đei ƀơm trŭh dôm bơngai jĭ vă tơchă ƀô̆h F0, vĕh ver tơpŏh lang să. Adoi tơlĕch rim trong jang tơgŭm djru vă sơđơ̆ng tơdrong erĭh sa ăn kon pơlei tơ̆ rim hơnĭh ăn oei hơdrô̆, tơring, koeng kon pơlei đei pơvang tang găn.

Tơblơ̆ nơ̆r: Amazưt