VOV4.Bahnar - Pơgê năr 18/10, kơtơ̆ng ang đơ̆ng Hơnĭh dăr lăng jĭ jăn (CDC) Dak Lăk tơbăt, lơ̆m pơlei tơm Buôn Ma Thuô̆t ‘nao ƀô̆h mĭnh hơnĭh đei tơpŏh jĭ lơ̆m kon pơlei tơ̆ kơchơ tơm Tân Hoà (phương Tân Hoà, pơlei tơm Buôn Ma Thuô̆t) hăm 12 ‘nu bơngai tơpŏh sơmach jĭ SARS-CoV-2. Kiơ̆ kơ ‘nŏh lơ̆m năr 17/10, ‘nhŏng P.M.T. (48 sơnăm, hnam oei tơ̆ trong Xô Viết Nghệ Tĩnh, pơlei tơm Buôn Ma Thuột, jĭ bơngai jang chă hiŏng pơdŭ tơmam drăm lơ̆m kơchơ tơm Tân Hoà) năm tơ̆ Hnam pơgang phương Tân Hoà khăm hơlen păng đei ƀô̆h tơpŏh sơmach jĭ SARS-CoV-2. Pơtôch khăm hơlen Realtime Rt –PCR sơkơ̆t hơdăh đei tơpŏh sơmach jĭ SARS –CoV-2.  

Ƀok thây pơgang test rĕnh ăn bơngai mơdro lơ̆m kơchơ tơm

CDC Dak Lăk hlôi iung jang hơdoi hăm Hnam pơgang phương Tân Hoà iung jang năm tơchă dôm bơngai oei tơ jê̆, khăm hơlen dôm bơngai oei tơ jê̆, tơ ƀơ̆p hăm bơngai jĭ. Trŭh 2 jơ pơgê năr 18/10, khŭl jang pơgang hlôi khăm hơlen test rĕnh ăn hlŏh 500 ‘nu bơngai mơdro lơ̆m kơchơ tơm păng dôm bơngai đei tơ ƀơ̆p hăm ‘nhŏng T… Hlŏh đơ̆ng test rĕnh hlôi đei ƀô̆h dơ̆ng 11 ‘nu bơngai tơpŏh sơmach jĭ SARS-CoV-2, lơ̆m au đei 6 ‘nu bơngai ‘nŏh jĭ bơngai ŭnh hnam kơ bơngai jĭ păng 5 ‘nu bơngai uơ oei ‘nŏh bơngai mơdro lơ̆m kơchơ tơm.

Tơblơ̆ nơ̆r: Amazưt