VOV4.Bahnar – Đơ̆ng rŏng kơ dôm  F1 đei 3 ‘măng hơlen pham hăm pơkăp âm tĭnh hăm Virus SARS –CoV2, hloh 140 ‘nu kon pơlei lơ̆m tơring pơkăp pơvei duh âm tĭnh kiơ̆ 2 ‘măng hơlen pham, giĕng âu ki, Anih vei lăng kon pơlei dêh char Đăk Lăk hlôi tơchơ̆t yuih lê̆ tơchơ̆t pơvei hăm tơring kon pơlei oei xa tơ̆ trong iĕ 189/1 Mai Hắc Đế, phương Tân Thành, plei tơm Buôn Ma Thuột, dêh char Đăk Lăk – tơring đei 2 ‘nu ƀơm jĭ COVID -19. Chơt hơ iă kơlih hlôi yuih lê̆ tơchơ̆t pơvei mă lei kon pơlei duh ưh kơ pơhơi hăm tơdrong tang găn păng tơjră pơrang jĭ  Covid-19.

Adrol kơ yuih lê̆ tơchơ̆t pơvei, rim kang ƀô̆ y tê̆ hrŭk hơbăn ao găn xơmach hlôi pruih pơgang pơlôch xơmach mă hơtuch tơ̆ tơring kon pơlei oei xa ăh trong iĕ 189/1 Mai Hắc Đế, phương Tân Thành, plei tơm Buôn Ma Thuột – anih đei 2 ‘nu ƀơm jĭ COVID -19. Đơ̆ng rŏng kơ noh, rim pơga pơgăn đei yuih lê̆ bơih. Khul kơdră Anih vei lăng kon pơlei phương Tân Thành đŏk tơbang tơchơ̆t yuih pơvei păng pơjao hla bar pơkăp hlôi keh đang khei năr pơm kiơ̆ pơkăp oei ataih băl hăm hloh 100 ‘nu kon pơlei. Iŏk hla bar pơkăp lơ̆m ti, ƀok Bùi Trung Khánh ăn tơbăt: “Nhôn ƀôh hơ iă kơ đon, kơlih lơ̆m khei năr âu ki duh hlôi pơm kiơ̆ tơnăp tơchơ̆t đơ̆ng teh đak, đơ̆ng Khul kơpal teh đak găh pơkăp oei ataih băl kiơ̆ pơkăp y tê̆, pơm kiơ̆ tơnăp dôm tơchơ̆t kơ tơring. Lơ̆m khei năr truh nhôn hlôi kơdih oei ataih băl tơ̆ hnam păng hơlen jơhngơ̆m jăn kơdih lơ̆m 7 năr dơ̆ng, kơplăh noh mưh jơhngơ̆m jăn grăng ‘lơ̆ng noh gô năm pơm jang nhen dôm khei năr adrol ki.”

Adrol kơ noh ăh kơmăng năr  8/5, băt đei 1 ‘nu ƀơm jĭ COVID-19 tơ̆ trong iĕ 189/1 Mai Hắc Đế noh bơngai jĭ kơsô̆ 3237. Kơtă lơ̆m kơmăng năr 8/5, dêh char Đăk Lăk hlôi tơchơ̆t pơvei, tơklăh oei pha hăm tơring âu hăm 47 unh hnam kon pơlei, 144 măt bơngai. Lơ̆m tơdrong pơvei, anih jang Y tê̆ hlôi iŏk hơlen pham ăn tôm unh hnam tơ̆ âu, adoi ƀôh âm tĭnh hăm SARS-CoV-2. Yă Lê Thị Ngọc Hương tơ̆ trong iĕ 189/1 Mai Hắc Đế, phương Tân Thành, plei tơm Buôn Ma Thuột tơroi: “Đơ̆ng rŏng jê̆ 20 năr noh ƀrơ̆k kơ jơhngơ̆m păng ‘meh vă ưh đei bơngai yơ athei ƀơm tơdrong mă âu. Mă jê̆ 20 năr oei lơ̆m hnam noh ưh kơ hiôk ôh, mă lei hơlen lăng noh ƀôh rim bơngai adoi minh jơhngơ̆m, duh ‘meh vă pơrang jĭ dăh tenh klaih, vă pơrang jĭ ưh đei găn ga lơ̆m tơring kon pơlei oei xa thoi âu bơih”

Tơring ƀơm pơvei ăh trong iĕ 189/1, Mai Hắc Đế, phương Tân Thành, plei tơm Buôn Ma Thuột đei 47 unh hnam kon pơlei hăm hloh 140 măt bơngai, lơ̆m noh đei 20 unh hnam oei hnam thuê, jing bơngai jang lơ tơdrong. Lơ̆m khei năr tơklăh oei pha tơ̆ tơring, tơjră pơrang, jơnŭm pơgơ̆r tơring hlôi hơvơn dôm anih jang ‘mêm bơnat tơgŭm tơmam xa păng tơmam dăm kăl vă xơđơ̆ng tơdrong erih ăn kon pơlei. Kiơ̆ kơ noh, hlôi đei jê̆ 50 trĭu hlj; hloh 5 tâ̆n ‘nhot, plei ‘long xa; jê̆ 15 tâ̆n phe; kơ hrĕng kơthŭng mi tôm păng lơ tơmam kăl nai hlôi đei dôm anih jang ‘mêm bơnat axong ăn kon pơlei tơ̆ âu.

Yă Trần Thị Dinh, Phŏ Kơdră Anih vei lăng kon pơlei phương Tân Thành, plei tơm Buôn Ma Thuột, dêh char Đăk Lăk ăn tơbăt: lơ̆m khei năr truh, mă hlôi yuih tơchơ̆t pơvei, tơring pơtoi đei trong hơlen jơhngơ̆m jăn dôm bơngai lơ̆m tơring âu vă dăh tom xek tơlang mưh đei ƀôh tơdrong ưh kơ ‘lơ̆ng: “Đơ̆ng rŏng kơ yuih lê̆ tơchơ̆t pơvei noh jơnŭm pơgơ̆r tang găn păng tơjră pơrang jĭ COVID noh phương pơtoi hơlen, tơroi pơtho kon pơlei pơm kiơ̆ tơnăp tơdrong jang tang găn păng tơjră pơrang jĭ COVID -19 dang ei. Kon pơlei mă ƀôh hien, pơlŏ, jĭ kơ̆l noh dăh tơrĕk kơtă hăm Anih jang Y tê̆ phương Tân Thành vă đei pơtho hơdăh.”

Kiơ̆ ƀak sih Nguyễn Trung Thành, Phŏ Kơdră Anih jang Y tê̆ dang ei hlôi hơvơn khul jang vang tang găn păng tơjră pơrang jĭ  COVID-19, lơ̆m noh đei y tê̆ xăh, phương, thĭ trâ̆n lơ̆m tơring kơ dêh char tơgop pơm jang đei jơnei lơ̆m tơdrong hơlen gơ̆t pơrang. Jing anih tơm jang y tê̆ tơguăt hăm kon pơlei noh tơdrong jang y tê̆ tơ̆ tơring – anih jang y tê̆ tơ̆ xăh, phương, thĭ trâ̆n đei xơnong jang kăp gĭt lơ̆m tang găn păng tơjră pơrang jĭ COVID-19

Khei năr âu ki, lơ̆m tơring kơ dêh char Đăk Lăk ƀôh đei 3 ‘nu ƀơm jĭ  SARS-CoV-2, dôm anih jang y tê̆ xăh, phương, thĭ trâ̆n adoi axong bơngai gak hơlen măng năr vă tơjră hăm rim tơdrong đei ƀôh. Atŭm hăm noh, hơtŏk hơlen jơhngơ̆m jăn kon pơlei lơ̆m tơring, tơtom ƀôh băt dôm tơdrong pơlŏ, hien, tơnap kơ dui jơhngơ̆m vă khăm hơlen păng tơtom hơmet mưh đei nhôm ƀơm jĭ COVID-19; hăt hot tơgŭm ăn jơnŭm pơgơ̆r tang găn păng tơjră pơrang jĭ tơ̆ tơring jang atŭm hăm dôm anih jang chă pruih pơgang pơlôch xơmach, pơm brai pơnhŭl; pơtho ăn rim unh hnam, tơring kon pơlei oei xa pơ ‘nguaih hnam oei, tơroi y tê̆; vei lăng kơjăp dôm bơngai chôt vih đơ̆ng tơring hơbuh pơrang vă dăh tom pơm kiơ̆ tơchơ̆t oei ataih băl minh ƀôt, tơ̆ hnam păng pơtruh kang ƀô̆ năm hơlen jơhngơ̆m jăn rim năr hăm dôm bơngai pơm kiơ̆ pơkăp oei ataih băl. Truh âu kơnh, Anih jang Y tê̆ Đăk Lăk gô akŏm khul jang hơlen păng tơlĕch chă hơlen dôm anih jang y tê̆ vă hơmet tơbăt duh nhen pơtho ăn dôm anih jang, iŏk jang tơnăp dôm tơdrong jang tang găn păng tơjră pơrang jĭ lơ̆m tơring.

Lan chih păng pơre nơ̆r