VOV4.Bahnar - Pơgê năr 8/12, ‘Măng hop akom mă pêng, Jơnŭm vei lăng kon pơlei dêh char Dak Lăk jăl X, jăl jang 2021-2026 hlôi đei pơgơ̆r. Sơnăm 2021 jing sơnăm măh tơ jră mŭh măt hăm lơ tơdrong tơnap tap, tơdrong long kơ yuơ jĭ hơbŭh Covid-19 pơm ăn.

Mă lei, pơtôch sơnăm 2021, Dak lăk đei 8 trong tơlĕch jang hlôi jang keh đang kơtang, tơdrong tŏk mŭk drăm jei kơtang (tŏk 5,1% pơtêng hăm sơnăm sơ̆) thuê̆ ăn hơnĭh mong jên bơ̆ jang păng chă hơvơn kon jên tơmơ̆t jang lơ̆m tơpôl đei lơ hlŏh nơ̆r tơlĕch ăn, iŏk đei trŭh 8.000 ti hlak jên (tŏk 10% pơtêng hăm trong tơlĕch jang đơ̆ng Jơnŭm vei lăng kon pơlei); hơnĭh mơdro sa vĭh hơlơ̆k iung jang dơ̆ng lơ, twodrong tĕch răt tơmam drăm lơ̆m dêh char sơđơ̆ng; bơ̆ jang pơtho pơhrăm, vei lăng jơhngơ̆m jăn ăn kon pơlei, sơđơ̆ng erĭh sa tơpôl, tơjur dơnŭh, tơgŭm djru kon pơlei tơnap tap kơ yuơ jĭ hơbŭh Covid-19 đei lăng ba kơ jăp ... Iung pơma chĕp pơgơ̆r hop akŏm, ƀok Nguyễn Đình Trung, Kơdră jang lơ̆m Trung ương Đảng, Bí thư Đảng dêh char Dak Lăk athei: lơ̆m khei năr kơnh, rim hơnĭh jang, tơring tơrang hơnơ̆ng jang kiơ̆ kơ jăp nơ̆r pơrô̆ jang đơ̆ng Trung ương lơ̆m rim tơdrong jang vă tơlĕch jang kiơ̆ jơnei Tơdrong tơchơ̆t Pơm lêh hop akŏm Đảng lơ̆m tĕh đak ‘măng mă XIII păng Tơdrong tơchơ̆t pơm lêh hop akŏm Đảng dêh char ‘măng mă XVII, mă kăl, akom jang kiơ̆ kơtang, jơnei Tơdrong tơchơt kơsô̆ 128 sơnăm 2021 đơ̆ng Khŭl kơdtă chĕp pơgơ̆r Tĕh đak.

Tơblơ̆ nơ̆r: Amazưt