VOV4.Bahnar - Gơ măng 30-5, ƀok Nay Phi La, Kơ dră Anih vei lăng jang pơ gang dêh char Dak Lak akhan, tơ̆ dêh char ‘nao đei dơ̆ng 1 ‘nu bơ ngai tơ pŏh virus SARS CoV2. ‘Nŏh jĭ bơ ngai jĭ drŏ kăn, tơ̆ Thôn 7- xăh Cư Mốt – apŭng Ea H’Leo – Dak Lak.

Pruih pơ gang pơ lôch pơ rang jĭ jŭm dăr anih unh hnam bơ ngai jĭ oei

Bơ ngai jĭ âu oei hơ doi 1 hơ nih hăm bơ ngai jĭ COVID-19 tơ̆ kuơ̆n 12, plt Hồ Chí Minh. Sư hao gre tih vih tơ̆ thôn 7, xăh Cư Mốt ƀât 6h pơ gê ‘năr 26/05/2021. Đơ̆ng ‘năr 26 truh ‘năr 29/5 sư tơ ƀâp lơ bơ ngai tơ̆ tơ ring. Pơ gê 30-5 bơ ngai âu đei chơ năm tơ̆ anih oei hơ drô̆ tơ̆ Hnam trưng Cao đẳng Công nghệ Tây Nguyên păng đei set hơ len jĭ ‘nŏh băt tơ pŏh virus SARS CoV2.

Kơ tă lơ̆m gơ măng 30/5, dêh char Dak Lak pơ gơ̆r hôp hăt hot tơ lĕch trong chĭt găn anih bơ ngai jĭ âu oei xa păng ăn dôm bơ ngai tơ ƀâp sơ oei hơ drô̆. Atŭm hăm ‘nŏh tơ chă bơ ngai F1 păng F2. Dơ nŏ anih vei lăng kon pơ lei dêh char Dak Lak oei athei kâm gre chơ tơ moi, gre taxi, gre chă tơ mang lăng kơ dâu đơ̆ng Dak Lak năm tơ̆ plt Hồ Chí Minh, dôm dêh char Bắc Ninh, Bắc Giang păng đơ̆ng noh vih hơ lơ̆k dơ̆ng iŏk đơ̆ng 12 jơ gơ măng ‘năr 31-5-202.

Dơ̆ng: Tơ blơ̆