VOV4.Bahnar - Kơsơ̆ năr 14/5, yă H’Yim Kdoh, Kơ iĕng Kơdră chĕp pơgơ̆r Dơnŏ anĭh vei lăng kon pơlei dêh char Dak Lăk sơkơ̆t hơdăh,lơ̆m dêh char đei dơ̆ng 1 ‘nu bơngai tơpŏh jĭ SARS-CoV2. Bơngai jĭ au đei ƀơm trŭh hăm bơngai jĭ mă 3052 oei tơ̆ Bắc Ninh ‘nŏh ‘nhŏng V.Đ.D., rơnĕh sơnăm 1971, oei tơ̆ phương Đạt Hiếu, thĭ xăh Buôn Hồ, dêh char Dak Lăk.

Trŭh năr 14/5, ‘nhŏng D, đei ƀô̆h chĕp pơgrŭn kơna ƀet iŏk pham khăm hơlen ‘măng mă 2 păng hlŏh đơ̆ng khăm đei ƀô̆h tơpŏh jĭ SARS-CoV-2. Dang ei, hơnĭh jang pơgang Dak Lăk tŏk bŏk năm tơchă dôm bơngai oei tơ jê̆ sư vă jang kiơ̆ rim trong jang tang găn jĭ Covid-19. Lơ lŏh, hrei au Dak Lăk hlôi đei 3 ‘nu bơngai tơpŏh jĭ Covid-19. Dơnŏ anih jang pơgnag tŏk bŏk pơgơ̆r ăn oei hơdrô̆ tơ̆ hnam pơgang păng ăn oei hơdrô̆ akŏm dang 70 ‘nu bơngai, ăn oei hơdrô̆ lơ̆m hnam kơ dĭh păng lơ̆m tơring oei ‘nŏh 1.500 ‘nu bơngai.

Tơblơ̆ nơ̆r: Amazưt