VOV4.Bahnar - Kơ sơ̆ ‘năr 9/5 yă H’Yim Kdoh, Phŏ Kơ dră Anih vei lăng kon pơ lei dêh char Dak Lak tơ băt, lơ̆m dêh char ‘nao đei dơ̆ng 1 ‘nu jĭ virus SARS-CoV2, tŏk bŏk đei ăn oei hơ drô̆ tơ̆ hơ nih ăn oei hơ drô̆ akŏm kơ dêh char, hơ tŏk kơ sô̆ bơ ngai tơ poh jĭ lơ̆m dêh char jing 2 ‘nu. bơ ngai âu ‘noh Tr.M.T, rơ neh sơ năm 1998, oei tơ̆ kơ sô̆ hnam 189/1/25 trong Mai Hắc Đế, pơ lei tơm Buôn Ma Thuột, ‘noh jĭ F1 đơ̆ng bơ ngai jĭ 3237 ƀơm truh anih  jĭ đơ̆ng Đà Nẵng.

Dang ei Dak Lak tŏk bŏk ăn oei hơ drô̆ tơ̆ hơ nih jang pơ gang 16 ‘nu, 19 ‘nu tok bŏk đei ăn oei hơ drô̆ akŏm păng  904 ‘nu ăn oei hơ drô̆ tơ̆ hnam. Ƀơm truh tơ̆ hơ nih đei jĭ tơ̆ kơ sô̆ hnam 189/1/25, trong Mai Hắc Đế, phường Tân Thành, dêh char Dak Lak hlôi pơ vang găn hơ nih oei kon pơ lei trong kơ sô̆ 189/1/25, pơ gơ̆r tơ chă đei 12 F1 păng kơ hrĕng F2. Anih jang pơ gang Dak Lak hlôi iŏk đak pham, đak muh... hơ len lăng ăn kơ dang 180 ‘nu. Dêh char Dak Lak hlôi tơ chơ̆t ăn hŏk tro jăl mâm non lơ̆m pơ lei tơm pơ dơh hŏk 1 giĕng.

Thuem: Tơ blơ̆