VOV4.Bahnar - Kơ sơ̆ 16/6, tơ̆ plt Buôn Ma Thuột, Anih MTTQ Việt Nam dêh char Dak Lak hơ nơ̆ng pơ gơ̆r sơng iŏk dơ̆ng 1 ti hlak jên đơ̆ng dôm khul grŭp, lơ bơ ngai lơ̆m dêh char Dak Lak vang tơ gŭm ăn Anih mong jên răt vaccine păng tơ mam jang pơ gang vă tang găn jĭ Covid – 19.

Bơ ngai tang măt ăn Công ty jang unh điên Dak Lak pơ jao 355 triu hlak jên ăn Anih MTTQ Việt Nam dêh char Dak Lak

Kiơ̆ kơ ‘nŏh, bơ ngai tang măt ăn Dơ nŏ anih vei lăng kon pơ lei plt Buôn Ma Thuột pơ jao kơ sô̆ jên 500 triu; Công ty jang unh điên Dak Lak pơ jao hlŏh 355 triu; 1,2 anih tĕch mơ dro tơ̆ plt Buôn Ma Thuột pơ jao vă jê̆ 200 triu hlak jên… Akŏm đĭ đăng kơ sô̆ jên mă Anih MTTQ Việt Nam dêh char Dak Lak sơng iŏk kơ sơ̆ brei ‘nŏh 1 ti. Đơ̆ng rŏng kơ iŏk đei jên, Anih MTTQ Việt Nam dêh char Dak Lak hlôi gơih đĭ ăn Anih mong jên vaccine tĕh đak vă răt iŏk vaccine păng tơ mam jang pơ gang tang găn jĭ Covid – 19.

Thoi nŏh, jô̆ truh dang ei đơ̆ng rŏng hlŏh 1 giĕng jang kiơ̆ tơ drong krao hơ vơn đơ̆ng Anih MTTQ Việt Nam găh tơ drong tơ gop jên răt vaccine păng tơ mam vă jang pơ gang tang găn jĭ Covid - 19, hlôi đei dôm jĭt anih jang, khul grŭp, lơ bơ ngai tơ̆ Dak Lak vang tơ gŭm, hăm kơ sô̆ jên vă truh 7 ti hlak.

Dơ̆ng: Tơ blơ̆