VOV4.Bahnar -  Kiơ̆ đơ̆ng Dơnŏ anĭh chĕp pơgơ̆r tang găn jĭ Covid-19 dêh char Dak lăk, lơ̆m năr 12/8, lơ̆m dêh char đei dơ̆ng 12 ‘nu bơngai tơpŏh jĭ Covid-19. Atŏk măt bơngai tơpŏh jĭ tơ̆ dêh char trŭh 476 ‘nu.

Hơnĭh Block C chung kư Hoàng Anh Gia Lai đei pơvang tang găn lơ̆m gơmăng hloi

Lơ̆m 12 ‘nu tơpŏh jĭ đei 3 ‘nu jĭ ‘nao brŏk đơ̆ng pơlei tơm Hồ Chí Minh păng Đồng Nai.  9 ‘nu bơngai jĭ uơ oei đei ƀơm trŭh rim bơngai jĭ hlôi ƀô̆h hơdrol kơ ‘nŏh. Mă kăl đei 3 ‘nu bơngai jĭ đei tơpŏh jĭ lơ̆m lơ bơngai jĭ tơ̆ tơring Vụ Bổn, apŭng Krông Pach.

Ƀok thây pơgang khăm test rĕnh ăn kon pơlei oei lơ̆m hơnĭh Block C chung kư Hoàng Anh Gia Lai

2 ‘nu bơngai jĭ đei ƀô̆h tơ̆ Hnam chung kư Hoàng Anh Gia Lai, phương Tự An, pơlei tơm Buôn Ma Thuột đei ƀơm trŭh bơngai jĭ tơ̆ thôn 20, tơring Cư Bông, apŭng Ea Kar. Đei ƀơm trŭh 2 ‘nu bơngai jĭ au, Dơnŏ anĭh vei lăng jang pơgang Dak Lăk hlôi tơchă rim bơngai oei tơ jê̆ đei 15F1, lơ̆m au 2 F1 khăm test rĕnh đei ƀô̆h tơpŏh sơmach jĭ SARS-CoV-2. Lơ̆m gơmăng năr 11/8 hloi, khŭl bơ̆ jang hlôi iung jang pơvang tang găn păng khăm test rĕnh ăn kon pơlei hơnĭh Block C kơ chung kư Hoàng Anh Gia Lai.

Lơ̆m năr 12/8, dơnŏ anĭh vei lăng jang pơgang dêh char Dak Lăk hlôi pơjao hla bơar ăn brŏk đơ̆ng hnam pơgang ăn 20 ‘nu bơngai jĭ Covid-19. Lơ lŏh, trŭh dang ei, Dak Lăk hlôi đei 74 ‘nu bơngai jĭ Covid-19 hlôi hơmet klăih păng ăn brok tơ̆ hnam.

Tơblơ̆ nơ̆r: Amazưt