VOV4.Bahnar - Tơ roi đơ̆ng Anih pơ gơ̆r tang găn jĭ COVID dêh char Dak Lak lơ̆m ‘năr 27-7, tơ ring âu đei dơ̆ng 13 ‘nu jĭ SARS –CoV-2, 3 ‘nu klăih kơ jĭ đei brŏk đơ̆ng hnam pơ gang bơ̆ih. Lơ̆m kơ sô̆ 13 ‘nu đei jĭ SARS –CoV-2, đei 5 ‘nu chă ƀôh lơ̆m tơ pôl, ƀơm truh anih jĭ đơ̆ng pơ lei tơm Hồ Chí Minh, dêh char Bình Dương păng dêh char Long An. 8 ‘nu uơ oei dơ̆ng ‘noh tơ poh đơ̆ng dôm bơ ngai jĭ hlôi đei tơ băt hơ dăh hơ drol ‘noh. Kăl kơ lăng truh, lơ̆m 8 ‘nu âu đei 3 ‘nu ƀơm truh bơ ngai jĭ mă 95008. ‘Nâu jĭ anih jĭ tơ̆ plei Khóa, xăh Cư Pui, apŭng Krông Bông. Thoi noh, jô̆ truh 5 jơ kơ sơ̆ ‘năr  27-7 dêh char Dak Lak đei 141 ‘nu, 7 ‘nu hlôi đei brŏk đơ̆ng hnam pơ gang, tam mă đei bơ ngai jĭ lôch. Lơ̆m kơ sô̆ 134 ‘nu jĭ tŏk bŏk hơ met đei 8 ‘nu jĭ ăl tŏk bŏk đei đe y ƀak si hơ drin răp hơ len păng hơ met kiơ̆ ƀlep trong hơ met jĭ.

Tơ drong jang tơ chă, gơ gar tơ ring păng test hrĕnh dôm bơ ngai F1 tŏk bŏk đei anih jang pơ gang Dak Lak hơ drin tơ lĕch jang

Nơ̆r tơ roi đơ̆ng Anih pơ gơ̆r jang tang găn jĭ COVID-19 plt Buôn Ma Thuột, dêh char Dak Lak, kơ sơ̆ 27-7, Hnam pơ gang Đa khoa plt Buôn Ma Thuột hlôi pơ dơ̆h jang păng oei pơ vang găn khoa Nội kơ Hnam pơ gang âu yoa ƀơm truh bơ ngai test hrĕnh đei pơ rang jĭ SARS-CoV-2. Mă hơ dăh, ‘năr 26-7, Hnam pơ gang Đa khoa plt Buôn Ma Thuột đei 1 ‘nu bơ ngai truh khăm hơ len jĭ, yoa sư jĭ kơ̆l păng đei tŭn mât hơ met tơ̆ khoa Nội.

Truh pơ gê 27-7, đơ̆ng rŏng kơ khăm hơ len, ƀôh đei tơ drong hlĭch, ƀak si khoa Nội athei test hrĕnh pơ rang jĭ SARS-CoV-2 hăm bơ ngai âu păng đei jĭ tơ pă. Đơ̆ng rŏng kơ ‘nŏh, Hnam pơ gang gơih pham bơ ngai âu tơ̆ Anih vei lăng tơ drong jĭ jăn vă set hơ len RT-PCR. Hnam pơ gang hlôi pơ dơ̆h khăm hơ met jĭ păng pơ gơ̆r pơ vang găn khoa Nội vă hơ len năng, tang găn jĭ COVID-19.

Tơ̆ hơ năp đei ƀôh krê hơ mơt đơ̆ng jĭ COVID -19 lơ̆m tơ ring, Anih vei lăng kon pơ lei pơ lei tơm Buôn Ma Thuột, dêh char Dak Lak hlôi tơ lĕch jang kiơ̆ tơ drong asong kơ phiê̆u klăih song băl năr năm tơ̆ kơ chơ ăn kon pơ lei vă vei sơ đơ̆ng tơ drong jang tang găn jĭ. Kiơ̆ kơ ‘noh, tơ drong năm tơ̆ kơ chơ kiơ̆ kơ phiê̆u gô pơ tơm pơm kiơ̆ đơ̆ng ‘năr 29/7. Anih vei lăng kon pơ lei pơ lei tơm Buôn Ma Thuột hlôi athei Anih vei lăng kon pơ lei rim xăh, phường pơ gơ̆r chă asong kơ the năm tơ̆ kơ chơ, siêu thị răt phe, tơ mam sa ăn kon pơ lei lơ̆m tơ ring hăm kơ sô̆ 03 năr năm tơ̆ kơ chơ 1 ‘măng, pơ lơ̆h băl đơ̆ng rim ŭnh hnam. Kon pơ lei chă chih kơ dih kơ tơ̆ng ang lơ̆m kơ the hơ drol kơ mơ̆t lơ̆m kơ chơ păng vei sơ đơ̆ng kơ the hơ năn bơ ngai hơ yơ ‘noh bơ ngai ‘noh năm, ư̆h kơ ăn bơ ngai nai năm tơ plih. Kơ the mơ̆t lơ̆m kơ chơ đei gơ̆h yua 1 ‘măng lơ̆m 1 kơ chơ hơ yơ kŭm gơh lơ̆m tơ ring. Anih vei lăng kon pơ lei rim xăh, phường hơ met ăn khŭl jang răp găn tơ̆ hơ năp ‘măng jang kơ chơ vă hơ len lăng dôm kơ the năm tơ̆ kơ chơ, hơ dai hăm ‘noh tơ gŭm kon pơ lei pơm kiơ̆ dôm trong pơ kăp 5k lơ̆m tang găn jĭ.

Thuem hăm Dơ̆ng: Tơ blơ̆