VOV4.Bahnar - Kiơ̆ đơ̆ng Dơnŏ anĭh chĕp pơgơ̆r tang găn jĭ Covid-19 dêh char Dak Lăk, lơ̆m năr brei, năr 9/8, lơ̆m dêh char đei dơ̆ng 19 ‘nu bơngai tơpŏh jĭ  SARS –CoV-2. Lơ̆m 19 ‘nu bơngai ‘nao tơpŏh jĭ, đei 11 ‘nu tơpŏh lơ̆m kon pơlei păng 8 ‘nu bơngai đei tơpŏh jĭ tơ̆ hơnĭh ăn oei hơdrô̆.

Iŏk pham khăm hơlen jĭ Covid-19 tơ̆ tơring Vụ Bổn

Lơ̆m 11 ‘nu bơngai jĭ đei tơpŏh lơ̆m kon pơlei, đei 6 ‘nu ‘nŏh F1 kơ tơring đei jĭ hơbuh tơ̆ tơring Ea Riêng, apŭng Mdrak lơ̆m năr 8/8; 3 ‘nu bơngai ‘nao jĭ oei tơ̆ thôn 6, tơring Vụ Bổn, apŭng Krông Pách tim mă băt đe sư tơpŏh đơ̆ng yơ. Lơ̆m 3 ‘nu bơngai jĭ au, kiơ̆ đơ̆ng kơdră chĕp pơgơ̆r Dơnŏ anĭh vei lăng kon pơlei tơring Vụ Bổn, oei đei 17 ‘nu bơngai hlŏh test rĕnh đei ƀô̆h tơpŏh jĭ, tŏk bŏk gô chang tơdrong sơkơ̆t hơdăh đơ̆ng Hơnĭh tơm Dăr lăng jĭ jăn dêh char Dak Lăk. Lơ lŏh, jô̆ trŭh 5 jơ kơsơ̆ năr 9/8, dêh char Dak Lăk hlôi đei 410 ‘nu bơngai tơpŏh jĭ SARS –CoV -2. Lơ̆m au tŏk bŏk ming hơmet 393 ‘nu, 16 ‘nu hlôi hơmet klăih păng 1 ‘nu lôch.

Tơblơ̆ nơ̆r: Amazưt