VOV4.Bahnar - Kơtơ̆ng ang đơ̆ng Dơnŏ anĭh chĕp pơgơ̆r tang găn jĭ Covid-19 dêh char Dak Lăk, pơgê năr 19/7, dêh char au đei dơ̆ng 2 ‘nu bơngai tơpŏh jĭ SARS-CoV-2 tơ̆ apŭng Ea Hleo.

Test rĕnh rim F1 ƀơm trŭh 2 ‘nu bơngai tơpŏh jĭ

Ƀar ‘nu bơngai au ‘nŏh Q.C.T păng L.T.H, jei oei tơ̆ thôn 2B, tơring Ea Hleo, apŭng Ea Hleo. Măr sư au mĭnh ŭnh hnam jei ‘nao brŏk đơ̆ng pơlei tơm Hồ Chí Minh. Kiơ̆ apĭnh hơlen, lăp đơ̆ng rŏng test rĕnh SARS-CoV-2 tơ hnam pơgang Thủ Đức pơlei tơm Hồ CHí Minh ‘nŏh ư̆h kơ đei ƀô̆h tơpŏh jĭ, pơ đĭ 2 ‘nu sư hao gre bơbĭt đơ̆ng pơlei tơm Hồ Chí Minh brŏk tơ̆ Dak Lăk. Mư̆h vĭh tơ̆ tơring, 2 ‘nu măr sư đei khăm test tĕnh păng đei ƀô̆h tơpŏh yŏng jĭ SARS-CoV-2. Pơtôch khăm hơlen tơ̆ Hơnĭh tơm vei lăng năng tông pơrang jĭ Tây Nguyên jei sơkơ̆t hơdăh pơ đĭ T. hăm H. Jei tơpŏh yŏng jĭ SARS-CoV-2.

Tơblơ̆ nơ̆r: Amazưt