VOV4.Bahnar - Jô̆ truh 4 jơ kơ sơ̆ ‘năr 29/7, dêh char Dak Lak đei dơ̆ng 7 ‘nu bơ ngai jĭ Covid-19 hơ tŏk đĭ đăng kơ sô̆ bơ ngai jĭ lơ̆m dêh char truh 185 ‘nu. Dêh char kŭm băt hơ dăh lơ bơ ngai vih đơ̆ng tơ ring đei jĭ đơ̆ng dôm dêh char găh pơ băh păng tơ drong vei lăng đei bơ̆ jang tôch kơ jăp. Kiơ̆ nơ̆r tơ roi đơ̆ng Anih pơ gơ̆r jang tang găn jĭ COVID -19 d/c Dak Lak, 7 ‘nu bơ ngai ‘nao đei jĭ âu đei tơ̆ 4 apŭng, thĭ đei: apŭng Cư M’gar 3 ‘nu; apŭng Krông Bông 2 ‘nu; apŭng Krông Pach 1 ‘nu păng plt Buôn Ma Thuột 1 ‘nu.

Lơ̆m kơ sô̆ dôm bơ ngai ‘nao jĭ, lăp đei 1 ‘nu bơ ngai tơ̆ anih oei hơ drô̆, anih hlôi đei jĭ adrol kơ ‘nŏh. Oei đei dơ̆ng ‘nŏh jĭ bơ ngai vih đơ̆ng dêh char Bình Dương. Dêh char Dak Lak lơ̆m dôm năr tơ jê̆ âu hơ nơ̆ng đei lơ bơ ngai đơ̆ng plt Hồ Chí Minh, Bình Dương păng dôm dêh char găh Pơ băh vih. Lơ bơ ngai jĭ vih đơ̆ng dôm tơ ring jĭ âu păng dêh char oei pơ gơ̆r vei lăng kơ jăp hlŏh dơ̆ng hăm dôm bơ ngai truh đơ̆ng tơ ring đei jĭ.

Dơ̆ng: Tơ blơ̆