VOV4.Bahnar - Dơ ning, ‘năr 23/5, bơ ngai tăh hla lơ̆m teh đak vang jang tơ drong jang chĭnh trĭ gĭ kăl – pôk rơ̆ih bơ ngai tang măt Kuôk hô̆i jăl 15 păng jơ nŭm pơ gơ̆r kon pơ lei rim tơ ring jăl jang 2021 – 2026. Hơ dai hăm lơ̆m teh đak, khŭl jang chĭnh trĭ dêh char Dak Lak tŏk bŏk hơ drin bơ̆ jang dôm tơ drong jang hơ tuch, hơ met tôm ‘lơ̆ng vă ‘măng pôk rơ̆ih pơ gơ̆r sơ đơ̆ng, ƀlep khôi luơ̆t, tơ păt ‘lơ̆ng păng tơ pă jing năr chơt hơ iă kơ đĭ đăng kon pơ lei.

Jĭ 1 lơ̆m tơ ring kơ drơ̆m kơ pơ lei tơm Buôn Ma Thuột, phường Thành Công đei 13 hơ nih tăh kơ phiê̆u hăm hloh 5.000 ‘nu bơ ngai tăh hla. Dôm tơ drong hiôk găh hơ nih, tơ mam, khŭl bơ ngai jang, pơ klep hơ năn bơ ngai tăh hla păng hơ năn bơ ngai lĕch pơ jei, hlôi đei rim grŭp pôk rơ̆ih hơ met lăp ‘lơ̆ng ăn năr chơt hơ iă đĭ đăng kon pơ lei. Vă vei sơ đơ̆ng tơ pôl, Anih pơ gơ̆r pôk rơ̆ih phường Thành Công kŭm hlôi klăih song khŭl jang, hơ tŏk loi dơ̆ng dăr joang vei lăng vă tơ tom chă ƀôh, hơ met ‘lơ̆ng dôm tơ drong đei ƀôh mư̆h đei. Ƀok Phan Hữu Trí, Bí thư Đảng, Kơ dră Jơ nŭm vei lăng kon pơ lei, Kơ dră anih pơ gơ̆r pôk rơ̆ih phường Thành Công, pơ lei tơm Buôn Ma Thuột, dêh char Dak Lak tơ băt:

“ Nhôn athei Anih vei lăng pôk rơ̆ih athei hơ nơ̆ng dăr hơ len rim tơ drong jang ƀơm truh pôk rơ̆ih. Mă 2, vei sơ đơ̆ng hơ năn bơ ngai tăh hla. Hơ nơ̆ng dơ̆ng ‘noh jĭ vei lăng sơ đơ̆ng hơ năn bơ ngai lĕch pơ jei, đơ̆ng rŏng kơ hơ năn bơ ngai lĕch pơ jei đei pơ klep ‘noh nhôn hơ met ăn bơ ngai jang rim măng đei khŭl linh kŏng an, khŭl linh kueng kơ phô̆, khŭl linh phường grŭp dăr joang lơ̆m tơ ring nhôn pơ jao tơ drong jang ăn kơ rim bơ ngai jang athei hơ nơ̆ng lăng rim hơ nih tăh kơ phiê̆u. Truh jơ năr âu rim hơ năn đei nhôn vei sơ đơ̆ng ‘lơ̆ng ngăl”.

Hơ năm bơ ngai tang măt Kuôk hô̆i jăl 15 păng bơ ngai tang măt Jơ nŭm pơ gơ̆r kon pơ lei rim tơ ring jăl jang 2021 – 2026 đei pơ klep tơ̆ anih jang vei lăng kon pơ lei phường Thành Công, pơ lei tơm Buôn Ma Thuột, dêh char Dak Lak.

Tơ̆ pơ lei tơm, Anih pơ gơ̆r pôk rơ̆ih, Anih vei lăng pôk rơ̆ih păng Anih jang Mặt trận tổ quốc pơ lei tơm Buôn Ma Thuột, hlôi pơ jing rim khŭl, bơ̆ jang rim ‘măng hơ len lăng, dăr lăng tơ drong jang pôk rơ̆ih tơ̆ đĭ đăng rim xăh, phường, vei sơ đơ̆ng rim tơ drong jang bơ̆ jang kiơ̆ ƀlep năr păng ƀlep khôi luơ̆t. Ƀok Nguyễn Khắc Long, Phŏ kơ dră Jơ nŭm vei lăng pôk rơ̆ih pơ lei tơm tơ băt, truh dang ei, lơ bơ ngai tăh hla hlôi iŏk đei the bơ ngai tăh hla păng trong jang rơ̆ih bơ ngai jang, hơ met ming bơ ngai tang măt Kuôk hô̆i jăl 15, bơ ngai tang măt jơ nŭm pơ gơ̆r kon pơ lei rim tơ ring jăl jang 2021-2026; hơ năn bơ ngai lĕch pơ jei hlôi đei gơ̆ih truh rim ŭnh hnam, vă tơ chĕng hơ len tơ chơ̆t rơ̆ih iŏk đei dôm bơ ngai tang măt tơ găl. Hăm bơ ngai tăh hla ‘noh jĭ sinh viên mư̆h brŏk tơ̆ tơ ring gô đei chih tơ mơ̆t hơ năn tơ tom vei sơ đơ̆ng tơ drong gơ̆h jang đơ̆ng kon pơ lei ăn kơ dih kâu.

“ Hơ năn bơ ngai tăh hla dang ei nhôn hơ nơ̆ng dăr hơ len chih hơ năn bơ ngai tăh hla ding truh đĭ ‘năr 21-5. Yua kơ dang ei jĭ Covid kơ na 1,2 hnam trưng Đại học , Cao đẳng ăn hŏk tro hŏk trực tuyến kơ na sinh viên gô brŏk tơ̆ hnam, sinh viên rim tơ ring nai gô brŏk tơ̆ âu kơ na athei chih măt dơ̆ng, dăh mă sinh viên Đại học Tây Nguyên gô brŏk tơ̆ hơ nih đe sư oei sa, ư̆h kơ oei tơ̆ âu bơ̆ih yua thoi noh athei hơ nơ̆ng dăr hơ len hơ năn bơ ngai tăh hla vă kơ nhôn tơ tom đei chih tơ mơ̆t  mă lăp”.

Kiơ̆ kơ ƀok Y Biêr Niê, Phŏ Bí thư Đảng dêh char, Kơ dră Jơ nŭm pơ gơ̆r kon pơ lei dêh char, kơ dră khŭl tang măt Kuôk hô̆i dêh char, Kơ dră Anih vei lăng pôk rơ̆ih dêh char Dak Lak, lơ̆m dêh char đei 1.794 grŭp pôk rơ̆ih păng 1.802 hơ nih tăh kơ phiê̆u. Rim tơ drong jang hơ met ăn pôk rơ̆ih tơ̆ Dak Lak hlôi jang đang ‘lơ̆ng, pơm lăp hăm ‘mĕh vă đơ̆ng jơ nŭm pơ gơ̆r pôk rơ̆ih teh đak tơ lĕch ăn. Mă loi ‘noh jĭ, tơ̆ hơ năp đei ƀôh krê hơ mơt đơ̆ng jĭ hơ buh păng tơ drong sơ đơ̆ng tơ̆ tơ ring, khŭl vei lăng tơ drong sơ đơ̆ng păng pơ gang hlôi tơ lĕch trong jang vei sơ đơ̆ng ‘lơ̆ng tơ pôl lơ̆m dêh char lơ̆m kơ plăh pơ gơ̆r bơ̆ jang tơ drong jang pôk rơ̆ih. Khŭl jang kŏng an hlôi tơ lĕch lơ ‘măng tơ chă truh rôp pơm glăi, akŏm dăr hơ len, sek phak rim tơ drong yoch đei tơ pôl bơ ngơ̆t truh. Anih jang pơ gang hlôi hơ met ‘lơ̆ng tôm rim trong jang pôk rơ̆ih lơ̆m tơ drong jĭ Covid-19 đei ƀôh krê hơ mơt... Ƀok Y Biêr Niê pơ ma hơ dăh:

 “ Gơ̆h pơ ma hơ dăh dang ei tơ drong jang hơ met ăn pôk rơ̆ih tơ̆ Dak Lak ‘lơ̆ng kŭm nhen rim hơ yak tơ drong jang vei sơ đơ̆ng kiơ̆ trong jang tơ lĕch ăn păng kiơ̆ tơ dra hơ drol tơ drong hrei ‘nâu rim tơ drong jô̆ hloi tơ drong jang vei sơ đơ̆ng, tơ drong jang pơ gang tŏk bŏk vei sơ đơ̆ng ‘lơ̆ng. Hơ mĕng đơ̆ng dang ei truh năr pôk rơ̆ih rim tơ drong gô ‘lơ̆ng hơ iă vă pơm liơ bơ̆n đei ‘măng pôk rơ̆ih lơ̆m tơ ring Dak Lak jơ nei ‘lơ̆ng rŏ tơ gop lơ̆m jơ nei ăn pơ đĭ lơ̆m teh đak.”

Năr pôk rơ̆ih hlôi vă jê̆ truh. Năr ‘nâu, 22/5, 7 Kơ đông linh vei lăng tơ ring sơ lam păng Anih khŭl linh pơ tâp pơ hrăm, găh ƀô̆ đô̆i vei lăng tơ ring sơ lam Dak Lak hlôi pơ gơ̆r hrôih ‘măng pôk rơ̆ih bơ ngai tang măt Kuôk hô̆i jăl 15 păng Jơ nŭm pơ gơ̆r kon pơ lei rim tơ ring jăl jang 2021 – 2026.

Kon pơ lei Dak Lak bơ ngơ̆t truh hơ năn dôm bơ ngai lĕch pơ jei pơm bơ ngai tang măt Kuôk hô̆i jăl 15 păng bơ ngai tang măt Jơ nŭm pơ gơ̆r kon pơ lei rim tơ ring, jăl jang 2021 – 2026

Hăm tơ drong mơ̆t jang ‘lơ̆ng đơ̆ng pơ đĭ khŭl jang chĭnh trĭ đơ̆ng dêh char truh tơ ring kŭm hăm tơ drong hơ mĕng, hơ drin ‘lơ̆ng đơ̆ng bơ ngai tăh hla, ‘măng pôk rơ̆ih bơ ngai tang măt Kuôk hô̆i jăl 15 păng bơ ngai tang măt Jơ nŭm pơ gơ̆r kon pơ lei rim tơ ring jăl jang 2021 – 2026 dêh char Dak Lak tŏk bŏk yak truh jơ nei, sơ đơ̆ng, đei yua, tơ pă jing năr chơt hơ iă kơ đĭ dăng kon pơ lei.

Hương Lý: Chih

Thuem: Tơ blơ̆