VOV4.Bahnar - Vă pơm lăp hăm tơ drong ‘mĕh vă răt yoa đơ̆ng kon pơ lei ƀât hơ tuch sơ năm 2021 păng Têt Nguyên đán Nhâm Dần 2022, dang ei đei 10 anih tĕch mơ dro tih tơ̆ dêh char Dak Lak pơ kăp ‘măn răk tơ mam yoa kăl, akŏm đĭ đăng đei kơ jă hlŏh 270 ti hlak jên. Dôm tơ mam đei vei sơ đơ̆ng kơ jă nhen: phe, ‘nhĕm nhŭng, ‘nhĕm iĕr, kơ tăp iĕr, bip, đak kho, ƀôt ngok păng lơ tơ mam yoa kăl nai, ‘nhot, ƀum, plei ‘long, đak xăng, ƀĕng keo, mưt. Khei ‘năr vei sơ đơ̆ng kơ jă đunh hlŏh 2 khei, đơ̆ng ‘năr 15/12/2021 - 28/2/2022.

Tơ mam tơ̆ dôm siêu thĭ tơ̆ Dak Lak pơm măh mai tơ drong 'mĕh vă răt yoa đơ̆ng kon pơ lei

Ƀât mă jĭ COVID-19 oei tôch hơ mơt păng đei đunh, Anih vei lăng jang kơ măy, tĕch mơ dro dêh char Dak Lak athei dôm anih tĕch mơ dro, HTX, unh hnam tĕch mơ dro ‘măn răk tơ mam hai, pơm ‘lơ̆ng tơ drong tang găn jĭ hai mưh jang xa, pơm tơ lĕch tĕch mơ dro tơ mam. Hrei ‘nâu, tơ mam pơm măh mai tơ drong ‘mĕh vă răt yoa đơ̆ng kon pơ lei păng rŏ năng gô đei jrăh jrai lơ̆m năr Têt. Anih vei lăng jang kơ măy, tĕch mơ dro dêh char oei tơ roi ăn Dơ nŏ anih vei lăng kon pơ lei dêh char Dak Lak set hơ len, kĭ ăn trong jang vei sơ đơ̆ng kơ jă tơ̆ anih tĕch mơ dro hăm dôm tơ mam kăl ƀât hơ tuch sơ năm 2021 păng Têt Nguyên đán Nhâm Dần 2022.

Dơ̆ng: Tơ blơ̆