VOV4.Bahnar -  Lơ̆m kơsô̆ hloh 1.700 bơngai ƀơm jĭ  COVID -19 tơ̆ Đăk Lăk đei lơ bơngai ƀơm oei hơnăp truh khei năr rơneh. Đe hơ ioh đei rơneh lơ̆m khei năr ƀơm 4 tơdrong mă COVID – 19 tŏk bŏk đei dôm tơdrong tơplih kăp gĭt, kơlih đei bơngai mĕ dơnưp thây pơgang, hơnơ̆ng axong ƀenh đon bơnôh 'mêm kơ eng păng xơnong jang tơnăp.

Mă tơhăt hơlen jơhngơ̆m jăn ăn bơngai hơ ioh jĭ, pơmai Bùi Thị Thu Hương, điu yương khoa Nhi hôi sư̆k kâ̆p kư̆u hơ ioh, Hnam pơgang tơm tơring Tây Nguyên phơ phŏ hơlen lăng jơ. Truh 3 jơ kơsơ̆, pơmai iŏk kơƀĭnh đak toh hlôi pơ 'lơ̆ng, năm apinh đak toh đơ̆ng bơngai mĕ năm lăng kon, đang kơ noh 'nhăk đak toh apinh đei ăn đe hơ ioh mơ̆m mă đei mĕ ƀơm F0 tŏk bŏk oei hơmet jĭ tơ̆ âu. 'Nguaih kơ apinh đak toh ăn hơ ioh mơ̆m, pơmai Hương atŭm hăm khul jang oei pơlơh băl tơhŭm, pơlơh kơn, hơlen jơhngơ̆m jăn ăn đe hơ ioh. Pơmai ăn tơbăt, jô̆ đơ̆ng mă hơ ioh 'nao đei rơneh đơ̆ng bơngai mĕ ƀơm F0 pơtruh tơ̆ Khoa hôi sư̆k kâ̆p kư̆u nhi vă hơmet păng vei rong, noh minh unh hnam 'nao nhen đei pơjing tơ̆ tơring âu. Đe drăkăn điu yương jing bơngai mĕ rong kon nge, măng năr vei rong đe kon: “Đe hơ ioh noh ưh đei tơdrong 'nŭng krôp lơ̆m tơpang ti bơngai mĕ noh đe hơ ioh ưh gan 'lơ̆ng, noh tôm bơngai jang y tê̆ tơ̆ âu lăng đe hơ ioh nhen kon mon po tơ̆ hnam, vă vei rong hơ 'nhăk đon bơnôh 'mêm kơ eng pơtăl bơngai vă đe hơ ioh gơh xơđơ̆ng 'lơ̆ng hloh. Kơlih mĕ athei oei tơklăh noh ưh gơh iŏk đak toh 'nhăk ăn kon mơ̆m, noh nhôn tơ̆ âu apinh đak toh đe mĕ 'nao rơneh nge ăn đe hơ ioh mơ̆m vă vei xơđơ̆ng đei đak toh mĕ gơh 'lơ̆ng ăn nge”

Atŭm hăm vei rong đe hơ ioh 'neo rơneh tơ̆ Khoa Nhi hôi sư̆k kâ̆p kư̆u, điu yương Dương Thị Hoa hơlen răh jơhngơ̆m jăn đe hơ ioh, hơmet răh tơdrong kăl vă xơng 2 'nu hơ ioh 'nao đei rơneh đơ̆ng bơngai mĕ ƀơm F0.

Pơmai Hoa ăn tơbăt, atŭm hăm tơdrong kơchăng hloh lơ̆m tơdrong jang tang găn pơrang jĭ, đe drăkăn điu yương păng khul jang tơ̆ khoa oei kăp gĭt tơrĕk truh hơmet đak toh mĕ, vă đe hơ ioh gơh grăng pran, đei tôm kơchơ̆t vă tih vơ̆ lơ̆m khei blŭng: “Tơdrong đak toh mĕ noh dang ei đei dôm anih jang tơgŭm ăn đak toh 'măn hơngeo, noh dôm bơngai jang lê̆ hach păng hơtô̆ ăn đe hơ ioh mơ̆m. Mưh đei đak toh mĕ đơ̆ng dôm bơngai mĕ 'nao rơneh nge mă rơkăh đak toh noh nhôn akŏm ăn đe hơ ioh mơ̆m, oei ưh kơ măh noh lê̆ hach đak toh hơngeo ăn hơ ioh mơ̆m”

Kiơ̆ Ƀak sih Chuyên khoa II Nguyễn Đức Toàn, Khoa Hôi sư̆k kâ̆p kư̆u Nhi, hnam pơgang tơm tơring Tây Nguyên, tơdrong vei rong đe hơ ioh 'nao rơneh đei mĕ noh F0 đei khoa axong jing 2 anih adrô̆, jing anih vei rong hmă păng anih vei rong pơkăp tơklăh. Kiơ̆ kơ noh, đơ̆ng rŏng kơ đe hơ ioh đei rơneh gô đei pơtruh tơ̆ anih pơkăp oei tơklăh vă hơmet jĭ păng vei rong. Đơ̆ng rŏng 14 năr, mưh jơhngơ̆m jăn đe hơ ioh grăng 'lơ̆ng păng 3 'măng hơlen pơkăp âm tĭnh hăm SARS –CoV - 2 hăm trong pơkăp RT - PCR gô đei pơtruh tơ̆ anih vei rong xơđơ̆ng vă gô bơngai mĕ păng 'nhŏng oh đơ̆ng rŏng đei hơmet klaih jĭ COVID -19 truh xơng brŏk. Ƀak sih Nguyễn Đức Toàn ăn tơbăt, mă kơsô̆ hơ ioh 'nao rơneh athei vei lăng kăp gĭt ưh đei lơ, mă lei lơ̆m khei năr pơjuă hli hlơt đơ̆ng Covid-19 noh đe ƀak sih, điu yuơng tơ̆ âu duh oei kơchăng tôch dêh: “Tơdrong vei rong minh 'nu hơ ioh ưh đei 'nhŏng oh noh tơnap tap hloh, pơtăl kơ đe unh hnam dăh mă bơngai mĕ noh da ƀiơ̆, oei tơ̆ âu vei lăng kơdih, ƀĭch ăh anih adrô̆, kơyuơ noh điu yương athei hơnơ̆ng vih vơ̆t vă hơlen lăng mưh ưh kơnh jing hlăm mă ba ưh kơ tom hơmet. Noh vei rong minh 'nu hơ ioh mă Covid âu hơtŏ hăm 3 'nu hơ ioh kâ̆p kư̆u hă, noh tơdrong jang kơ điu yương hrat păng jĭ kơ̆l”

Đei rơneh lơ̆m khei năr pơrang jĭ Covid-19 hơbuh hli, athei tơklăh đơ̆ng mĕ lơ̆m 'nao lĕch đơ̆ng klak mĕ, jing minh tơdrong ưh kơ hiôk ôh. Mă lei tơ̆ Hnam pơgang tơm tơring Tây Nguyên, đe hơ ioh hơnơ̆ng đei đe thây pơgang – bơngai mĕ dơnưp pring vei. Đe hơ ioh hmă mă lei đei tơdrong kăp gĭt, tŏk bŏk oei tih vơ̆ rim kơ năr lơ̆m tơpang ti 'mêm kơ eng.

Lan chih păng pơre nơ̆r