VOV4.Bahnar - Vă tơ gŭm ăn kon pơ lei mơ mat tat đei ƀơm ưh kơ ‘lơ̆ng yua đơ̆ng jĭ hơ buh Covid-19, dôm năr âu ki, lơ anih jang păng rim khŭl grŭp tơ pôl tơ̆ dêh char Dak Lak hlôi tơ lĕch rim tơ drong jang kơ deng tơ mam ư̆h kơ hoach jên. Tŏk bŏk ƀơ̆t jĭ hơ buh, dôm tơ mam ư̆h kơ hoach jên hlôi tơ gŭm kon pơ lei đei dơ̆ng phe, tơ mam sa ăn ‘măng sŏng sa rim năr.

            Đơ̆ng rŏng năm 1 dăr dôm kơ deng tơ mam lơ̆m siêu thị iĕ ư̆h kơ hoach jên, yă Đoàn Thị Xuân Đào oei kueng kơ phô̆ 2, phường Tân Lợi, pơ lei tơm Buôn Ma Thuột, dêh char Dak Lak hlôi rơ̆ih iŏk đei dôm tơ mam kơ dih kăl nhen phe, ƀoh, ƀôt ngot, sĭk, đak măm, đak kho păng dôm kơ loăi ‘nhot, ƀum. Yă Đào tơ băt, ŭnh hnam sư găh ŭnh hnam dơ nuh hin, klo sư ‘nao lôch hơ chăng yua kơ jĭ ăl, 1 drô̆ sư rong 2 ‘nu kon ‘lơ̆p tŏk bŏk sơ năm năm hŏk. Vă đei kon jên, yă Đào đa tĕch mơ dro iĕ tơ̆ kơ chơ mă lei vă jê̆ 1 khei kơ âu sư athei pơ dơ̆h oei tơ̆ hnam vă tang găn jĭ hơ buh. Ƀơ̆t đei phường asong kơ phiê̆u răt tơ mam tơ̆ siêu thị ư̆h kơ hoach jên sư ƀôh tôch chhôk.  

 Tôch bơ nê kơ tơ drong jang hlôi tơ gŭm ĭnh lơ̆m pơ yan jĭ hơ buh âu, yua ư̆h kơ gơ̆h năm jang, jang ư̆h kơ lĕch jên kơ na ƀơ̆t đei tơ drong jang âu tơ gŭm kŭm tơ gŭm ĭnh đei 1 păh yơ mơ mat tat lơ̆m tơ drong arih sa.”

            "Siêu thị iĕ ư̆h kơ hoach jên” ‘noh jĭ tơ drong jang yua đơ̆ng Anih jang Đoan dêh char Dak lak, Khŭl  vei lăng drŏ kăn dêh char jang hơ dai hăm Kŏng ti tĕch măih hu tơ mo kăp gĭt Phú Nhuận (PNJ) tơ̆ Tây Nguyên - Nam Trung bộ kŭm hăm rim anih jang tơ gŭm tơ lĕch jang, vă tơ gŭm kon pơ lei đei tơ drong arih sa mơ mat tat, ŭnh hnam dơ nuh hin păng vă jê̆ dơ nuh hin. Lơ̆m siêu thị đei vă jê̆ 40 tơ mam yua kăl, phe, tơ mam păng ‘nhot, ƀum, plei.

Kon pơ lei chăq rơ̆ih iŏk kơ dih dôm tơ mam yua kăl tơ̆ siêu thị iĕ ưh kơ hoach jên

            ‘Moi kiơ̆ hơ năn tơ lĕch đơ̆ng rim phường, xăh tơ̆ pơ lei tơm Buôn Ma Thuột, khŭl pơ gơ̆r jang hlôi asong ăn 500 “Hlak vĕ ‘mêm kơ eng” ăn kơ dôm ŭnh hnam mơ mat tat, 1 kơ vĕ đei kơ jă hơ tŏ 300 rơ bâu hlak jên. Lơ̆m jơ năr đơ̆ng ‘năr 14 – 17/8, đơ̆ng 7 jơ 1 puăt pơ gê truh 5 jơ kơ sơ̆ rim năr, kon pơ lei yua kơ phiê̆u âu vă răt dôm tơ mam kơ dih kăl. ‘Nhŏng  Võ Chí Nhân, Kơ dră vei lăng khŭl Marketing, Kŏng ti tĕch măih hu tơ mo kăp gĭt Phú Nhuận (PNJ) tơ̆ Tây Nguyên - Nam Trung bộ tơ băt, khŭl pơ gơ̆r hlôi tơ lĕch hloh 180 triệu hlak jên vă răt tơ mam đơ̆ng rim siêu thị tih hăm kơ jă re, păng pơ klep kiơ̆ kơ jă âu hăm dôm tơ mam tơ̆ siêu thị iĕ ư̆h kơ hoach jên. Kon pơ lei đei rơ̆ih iŏk dôm kơ loăi tơ mam hăm kơ jă ư̆h kơ hloh 300 rơ bâu hlak jên vă vei sơ đơ̆ng tôm kơ sô̆ tơ mam pơ têng hăm kơ sô̆ kơ phiê̆u hlôi asong ăn. Hơ dai hăm ‘noh, đe sư đei chă rơ̆ih thim măk ai dôm kơ loăi ‘nhot, ƀum, plei mơ̆ng kiơ̆ ‘meh vă.            

Dôm tơ mam lơ̆m siêu thị pơm lăp vă jê̆ nhen tôm tĕch, bu đei ‘mĕh vă tơ mam kiơ ‘noh gô rơ̆ih ‘mĕh vă tơ mam ‘noh, nhôn gô ư̆h kơ pơm kiơ̆ thoi tăh kơ ƀao 300 rơ bâu hlak jên mă đe sư gô đei chă rơ̆ih kơ dih nhen 1 siêu thị hloi, đe sư mơ̆t năm siêu thị loh. Hăm bơ̆n kơ phiê̆u 300 ‘noh ƀôh tŏ sĕt, mă lei tơ pă ‘noh truh siêu thị âu ‘noh đe sư gô đei lơ hloh kơ jă 300 rơ bâu hlak jên, yua kơ kiơ̆ tơ drong vei lăng đơ̆ng Metro păng Co.op, đe sư tăh kơ nhôn hăm kơ jă re, kơ na kơ jă tĕch kŭm jing kơ jă re.

            Kiơ̆ kơ ‘nhŏng Trần Doãn Tới, Phŏ Bí thư Đoan dêh char Dak Lak, kŭm hăm siêu thị iĕ ư̆h kơ hoach jên, khei ‘năr âu ki, sơ năm mơ lôh Dak Lak hlôi tơ lĕch jang lơ tơ drong jang kiơ̆ tơ drong jang “ ưh kơ hoach jên” nhen Siêu thị chă năm tĕch, gre ư̆h kơ hoach jên, chao ư̆h kơ hoach jên, kơ deng tơ mam ưh kơ hoach jên,... vă tơ gŭm ăn dôm bơ ngai mơ mat tat păng dôm tơ mam đei ƀơm ư̆h kơ ‘lơ̆ng kơ tă yua đơ̆ng jĭ hơ buh Covid-19. Mă khan trong krao pha ra băl mă lei dôm tơ drong jang adoi lăng truh tơ gŭm dôm tơ drong yua kăl vă hơ met ‘lơ̆ng ‘măng sŏng sa rim năr ăn kon pơ lei. Kŭm hăm tơ gŭm kon pơ lei tơ̆ hơ nih pơ gơ̆r kơ deng tơ mam, rim anih jang đoan tơ ring oei pơ jing rim khŭl chă ba tơ mam vă tơ gŭm truh tơ̆ hơ nih tơ̆ rim hơ nih ăn oei hơ drô̆, pơ vang găn. 

Đơ̆ng rŏng siêu thị ưh kơ hoach jên ‘măng âu pơm tơ̆ Buôn Ma Thuột ‘noh nhôn gô pơ gơ̆r lơ siêu thị ư̆h kơ hoach jên nai pơm tơ̆ rim anih mơ mat tat lơ̆m dêh char. Păng hơ drô̆ hăm dôm bơ ngai mơ mat tat, đei ƀơm ưh kơ ‘lơ̆ng kơ tă yua đơ̆ng jĭ hơ buh Covid-19 mă ư̆h kơ đei jơ rơ vơn kơ tă truh tơ̆ hơ nih vă iŏk ‘noh khŭl chă ba tơ mam kơ grŭp jang đoan gô kơ tă truh tơ̆ rim ŭnh hnam ‘noh vă kon pơ lei đei tơ drong pơ lung tơ tom păng hơ nhăk ăn iŏk yua.

Đoàn viên hơ druh tơ dăm tơ gŭm dôm bơ ngai jo jăn rơ̆ih iŏk tơ mam tơ̆ siêu thị ưh kơ haoch jên

            Vang yak truh hăm bơ ngai jang kơ dih păng dôm bơ ngai mơ mat tat, oei sa hơ drô̆, ư̆h kơ đei iŏk yua sơ đơ̆ng, đơ̆ng ‘năr 8/8 âu ki, Anih vei lăng kon pơ lei phường Thống Nhất (pơ lei tơm Buôn Ma Thuột) kŭm pơ gơ̆r tơ drong jang “Siêu thị ư̆h kơ hoach jên” pơm tơ̆ hnam trưng hŏk jăl 1 Lê Hồng Phong. ‘Ngoăih kơ dôm tơ mam yua kăl păng ‘nhot ƀum plei, tơ̆ âu oei đei ‘nhĕm păng ka hơ drih. Truh dang ei, tơ drong jang hlôi pơ gơ̆r đei 3 ‘măng kơ chơ, hăm hloh 900 kơ suơ̆t tơ mam ư̆h kơ hoach jên ăn kon pơ lei tơ̆ 9 xăh, phường tơ̆ pơ lei tơm Buôn Ma Thuột.

            Yă Trịnh Như Ngọc, Kơ dră Anih vei lăng kon pơ lei phường Thống Nhất, pơ lei tơm Buôn Ma Thuột, dêh char Dak Lak tơ băt, rim kơ suơ̆t tơ mam ‘noh đei tôm kơ jă dang ăi băl vă kon pơ lei rơ̆ih iŏk dôm tơ mam kơ dih kăl. ‘Ngoăih kơ ‘noh, kon pơ lei đei chă rơ̆ih kơ dih dơ̆ng 1,2 tơ mam yua kăl nai tơ̆ siêu thị. Iŏk đơ̆ng tơ mơ̆t lơ̆m bơ̆ jang, siêu thị ưh kơ hoach jen hlôi iŏk đei lơ tơ drong bơ ngơ̆t truh, tơ gŭm đơ̆ng lơ anih jang, kơ dih bơ ngai đei jơ hngơ̆m đon ‘mêm mơ nat hăm dang 200 triệu hlak jên măt păng vă jê̆ 5 tấn ‘nhot ƀum plei. Đơ̆ng tơ mam tơ gŭm âu, siêu thị gô hơ nơ̆ng pơ vei truh đĭ khei ‘năr ư̆h kơ ăn yak vih vơ̆t kiơ̆ tơ drong tơ chơ̆t 15 đơ̆ng Thủ tướng teh đak.

Hlôi đei tôch kơ lơ bơ ngai đei jơ hngơ̆m đon ‘mêm mơ nat hlôi đei tơ drong bơ ngơ̆t truh păng năm truh tơ̆ hơ nih vă tơ gŭm dôm tơ drong mam mơ mat tat đơ̆ng kon pơ lei, kơ lih thoi noh nhôn đei tơ drong lui ngeh đơ̆ng đĭ đăng rim bơ ngai đei jơ hngơ̆m ‘mêm mơ nat tơ gŭm hăm lơ tơ mam yua kăl, phe, tơ mam sa, ‘nhĕm, ka, jên vă kơ nhôn gơ̆h pơ jing tơ drong jang 1 trong ‘lơ̆ng hloh, hơ nhăk truh dôm tơ mam vei sơ đơ̆ng ‘lơ̆ng hloh ăn dôm kon pơ lei bŏk bŏk kăl. Nhôn ‘mĕh vang tơ gŭm 1 păh mơ mat tat lơ̆m khei ‘năr âu ăn kơ đe sư.

Siêu thị ưh kơ haoch jên phường Thống Nhất

            Hăm tơ drong ‘lơ̆ng “ 1 nơ̆r ƀơ̆t pơ ngot dang 1 tơ pu ƀơ̆t phĭ”, dôm kơ suơ̆t tơ mam đơ̆ng rim tơ drong jang ư̆h kơ hoach jên hlôi tơ gŭm kon pơ lei dă ƀiơ̆ kơ mơ mat tat. Dôm kơ suơ̆t tơ mam roi jing ‘lơ̆ng yua kơ sư pơm lăp kơ tă păng tơ tom dôm tơ mam yua kăl mă kon pơ lei tŏk bŏk kăl ăn ŭnh hnam lơ̆m pơ yan jĭ hơ buh.

            H’Xíu H’Mốc: Chih

Thuem: Tơ blơ̆