VOV4.Bahnar - Pơ gê (21/12), tơ̆ xăh sơ lam Ia Lốp, apŭng Ea Súp, dêh char Dak Lak, bơ ngai tang măt ăn Ƀô đô̆i vei lăng tơ ring sơ lam dêh char jang hơ doi hăm khul kơ dră tơ ring, dôm bơ ngai đei đon ‘lơ̆ng pơ gơ̆r et hơ tŏk hnam pơ gang linh hăm kon pơ lei hơ dai; hơ păh tơ mam, khăm hơ met, ƀơk đĕch pơ gang ăn kon pơ lei tơ̆ tơ ring sơ lam. ‘Nâu jĭ tơ drong jang tơ băt 77 sơ năm pơ jing Khul linh kon pơ lei Việt Nam păng năr đĭ đăng kon pơ lei vang vei lăng tĕh đak ‘năr (22/12).

Khăm hơ met jĭ ăn kon pơ lei tơ̆ tơ ring sơ lam Dak Lak

Kiơ̆ Thượng tá Phạm Minh Tuyên - Phŏ Kơ dră chĕp kơ̆l Ƀô đô̆i vei lăng tơ ring sơ lam Dak Lak, dang ei anih âu oei vei lăng trong sơ lam kơ jung hlŏh 73 km, hăm 4 xăh găh 2 apŭng Ea Súp păng Buôn Đôn, vă jê̆ 42% kon pơ lei tơ̆ âu ‘nŏh jĭ bơ ngai kon kông. Lơ̆m hơ năp jang tơ gŭm ăn kon pơ lei, hơ met kơ jăp tơ drong vang vei sơ đơ̆ng kơ kon pơ lei, Ƀô đô̆i vei lăng tơ ring sơ lam Dak Lak pơ gơ̆r lơ tơ drong jang vei sơ đơ̆ng tơ drong arih xa tơ pôl, tơ gŭm jang atŏk tơ iung mŭk drăm păng vei lăng jơ hngâm pran.

Dơ̆ng: Tơ blơ̆