VOV4.Bahnar - ‘Măng jĭ hơbŭh Covid-19 au, Dak Lăk ‘nŏh dêh char đei lăng kăl hlŏh tơ̆ tơring Tây Nguyên hăm mĭnh ƀar ‘nu bơngai tơpŏh jĭ đơ̆ng tơring anai brŏk. Atŭm hăm tơdrong jĭ tơpŏh kơtang tơ̆ pơlei tơm Hồ Chí Minh kơna ư̆h khan lăp hơdrô̆ dêh char Dak Lăk mă lei rim tơring tơ jê̆ anai (lơ̆m au đei dêh char Gia Lai) jei tơlĕch jang kơtang lơ̆m bơ̆ jang tang găn jĭ.

Tang ‘măng Hơnĭh et sa Ba Khía tơring Ea Wy, apŭng Ea H’Leo, dêh char Dak Lăk

Apŭng Chư Pưh, dêh char Gia Lai ‘nŏh tơring tơtil hăm tơring oei sa kơ bơngai jĭ kơsô̆ 7186 kơ dêh char Dak Lăk. Lăp đơ̆ng tơdrong au, dêh char Gia Lai pơjing hloi hơnĭh gak tang găn jĭ tơ̆ Trong glung 14, tơjê̆ Cầu 110 sơlam hăm dêh char Dak Lăk. Khŭl jang đei “Kanh sat vei lăng trong nơnăm, khŭl dăr lăng trong nơnăm, khŭl jang pơgang ... hlôi bơ̆ jang tang găn gre, pơtŏ yŭh tŏ akau jăn, tơroi tơbăt jơhngơ̆m jăn ăn ƀok thây pơgang mư̆h găn hlŏh trong au. Kiơ̆ đơ̆ng bơngai vơ̆r gre Dương Quốc Hiệu, oei tơ̆ thĭ trân Đak Đoa, apŭng Đak Đoa, ‘nao brŏk đơ̆ng pơlei tơm Hồ Chí Minh vĭh tơ̆ Gia Lai, tơdrong pơm kiơ̆ tơroi tơbăt jơhngơ̆m jăn ăn ƀok thây pơgang adoi nhen rim trong tang găn jĭ đơ̆ng khŭl bơ̆ jang pơm ăn kơ ‘nhŏng păng lơ bơngai vơ̆r gre sơđơ̆ng jơhngơ̆m hlŏh. “Jur tơ̆ au đei khŭl ƀok thây pơgang khăm hơlen vă vĭh tơ̆ pơlei sơđơ̆ng ‘nŏh ba ƀô̆h đe sư bơ̆ jang tôch tơnăp ‘lơ̆ng. Ba yak tơ̆ trong lăng ƀô̆h tơdrong jang tang găn jĭ kơ rim ‘nhŏng ŏh vơ̆r gre trong atăih tôch sơđơ̆ng. Găh tơdrong sŏng sa ‘nŏh ‘nhŏng ŏh vơ̆r gre hui chă tơ ƀơ̆p kon pơlei lơ̆m tơring, vei lăng năng tông kơ jăp lơ̆m gre vă oei vei lăng năng tông ‘lơ̆ng hơ iă ăn kon akăn păng pơ đĭ lơ̆m ŭnh hnam dơ̆ng”

Hơnĭh gak tang găn jĭ tơring sơlam Dak Lăk-Gia Lai

‘Nhŏng Ksor Mướt, kang ƀô̆ ƀok thây pơgang tơ̆ Hơnĭh gak vei lăng Gơng 110 – Trong glung 14 găn hlŏh dêh char Gia Lai tơbăt, ‘ngoăih tơdrong kăl gom ƀŏ, pơtŏ yŭh akau jăn păng ôp ti hăm đak pơgang, đĭ đăng rim bơngai jei kăl tơroi tơbăt hơdăh akau jăn ăn ƀok thây pơgang tơpăt, tôm tong. Mă kăl yak đơ̆ng yơ, năm trŭh tơ̆ yơ, tơdrong akau jăn lơ liơ păng dôm tơdrong đei chă jĭ jăn au to. Mă đơ̆ng tơhoach tŏ sĕt jơ ‘năr, mă lei bu bu jei pơm kiơ̆ tôch kơ jăp rim tơdrong tơchơ̆t, tơdrong pơtho tơbăt đơ̆ng rim khŭl bơ̆ jang.“Tơdăh chĕp pơlŏ, dăh mă đei jau đei tơdrong tơpŏh jĭ lei ăn oei hơdrô̆ hloi, tơdăh chă pơdŏ lăng yŭh tŏ akau jăn ư̆h kơ đei tơdrong kiơ lei lăp athei kon pơlei tơroi tơbăt găh jơhngơ̆m jăn ăn ƀok thây pơgang đĕch đơ̆ng nŏh ăn yak dơ̆ng. Tơring ayơ, pơlei ayơ ‘nŏh mư̆h trŭh tơ̆ nŏh năm tơroi hloi hơnĭh jang pơgnag tơ̆ nŏh hloi, găh dôm bơngai brŏk đơ̆ng atăih dăh mă đơ̆ng pơlei tơm Hồ Chí Minh lei kăl tơroi tơbăt hơdăh găh jơhngơ̆m jăn ăn ƀok thây pơgang hloi”.

            Trŭh dang ei, đĭ đăng rim bơngai đei ƀơm trŭh bơngai jĭ kơsô̆ 7186 tơ̆ Dak Lăk jei hlôi khăm hơlem ‘măng mă 1 păng ư̆h kơ đei ƀô̆h tơpŏh sơmach jĭ SARS-COV-2, mă lei jei kăl ăn oei hơdrô̆, lăng hơlen jơhngơ̆m jăn ‘mơ̆i. Găh hăm rim dêh char lơ̆m tơring Tây Nguyên, mă kăl yak tơ̆ trong Glung 14 (trong glung Hồ Chí Minh) hlôi pơdơ̆h ‘mơ̆i ăn gre kơdau chơ tơmoi. Mĭnh ƀar ‘nu bơngai ư̆h kơ pơm kiơ̆ hlôi đei hơnĭh bơ̆ jang vei lăng trong gre gơ̆t xek tơlang kơ hret. Khŭl kơdră chĕp pơgơ̆r păng hơnĭh bơ̆ jang rim dêh char lơ̆m tơring ling lang iung jang hơdoi kơ jăp vă tơlĕch jang kiơ̆ kơtang, vă bơ̆ jang tang găn jĭ Covid-19 iŏk đei jơnei ‘lơ̆ng hlŏh.

Bơngai chĭh: Hoàng Qui

Tơblơ̆ nơ̆r: Amazưt