VOV4.Bahnar - Vang ‘mêm mơnat dĭh băl hăm kon pơlei pơlei tơm Hồ Chí Minh mư̆h ăn oei hơtăih dĭh băl vă tang găn jĭ kiơ̆ nơ̆r athei jang kiơ̆ 16 đơ̆ng Thủ tướng Tĕh đak, dôm “Hơyŭh gre chơ tơmam drăm ‘mêm mơnat” đơ̆ng rim khul, rim bơngai tơ̆ Dak Lăk hlôi năm vang tơgŭm djru. Mơ jĭt tân tơmam drăm sa hlôi păng tŏk bŏk chơ pơtrŭh ăn kon pơlei Tơring Tŏk bŏk, mă đơ̆ng kơ dĭh Dak Lăk jei tŏk bŏk kơrŭn jơhngơ̆m jang tang găn jĭ Covid-19 ră.

Gre chơ ‘nhot hơnhăk ba jơhngơ̆m đon ‘mêm mơnat đơ̆ng kon pơlei Dak Lăk mơ̆t lơ̆m pơlei tơm hơnhăk Ƀok

Kơtơ̆ng ang Khŭl jang chư pơglang ƀrê pơlei tơm Buôn Ma Thuột tŏk bŏk tơgoăt jang hơdoi hăm Khŭl drŏ kăn Kŏng ang dêh char Dak Lăk păng rim bơngai đei jơhngơ̆m đon ‘lơ̆ng pơgơ̆r “Gre chơ tơmam drăm ‘mêm mơnat” vă chơ choĕn ‘nhpot ƀum plei ‘long tơgŭm ăn kon pơlei kơ pơlei tơm Hồ Chí Minh lơ̆m dôm năr jang kiơ̆ ăn oei hơtăih dĭh băl, mŏ Lê Thị Thanh Tâm, tơngla hơnĭh tĕch mơdro Lợi Tâm, pơlei tơm Buôn Ma Thuột, hăt hot pơma dơnŭh hăm bôl boăl vă vang jang kiơ̆. Mŏ Tâm tơroi: lăng Sài Gòn ‘lơ̆ng rŏ tă jing mơmat tat kơ yuơ jĭ hơbŭh, mŏ măh chhưu jơhngơ̆m, ‘mĕh vă vang tơgŭm djru hloi:“Lăng pơlei tơm Hồ Chí Minh tŏk bŏk tơƀơ̆p tơnap tap kơna ba iung jang hơdoi hăm Khŭl chư pơglang ƀrê vă tơgŭm djru kon pơlei kơ pơlei tơm Hồ Chí Minh vă yak hlŏh pơyan jĭ hơbŭh mơmat tat au. Hơpơi ăn pơlei tơm Hồ Chí Minh hrôih yak hlŏh jĭ hơbŭh au vă vĭh hơlơ̆k erĭh sa hiôk hian nhen đêl dơ̆ng”

Rơbau kơtăp iĕr bip jei pơtrŭh ăn tơ̆ tơring jĭ hơbŭh

Mŏ Tống Thị Tươi oei tơ̆ phương Tân Lợi, pơlei tơm Buôn Ma Thuột -  bơngai tôch tơnăp vang jang kiơ̆ lơ̆m ‘măng hơvơn rim bơngai đei jơhngơ̆m đon vang iung jang hăm “Gre chơ tơmam drăm ‘mêm mơnat” tơgoăt Dak Lăk hăm pơlei tơm Hồ Chí Minh tơbăt, pơđĭ ‘nhot, ƀum, plei đei tơgop pơtrŭh ăn pơlei tơm Hồ Chí Minh jei đei khŭl kŏng ang dêh char păng rim bơngai đei jơhngơ̆m đon ‘lơ̆ng jur trŭh tơ̆ chŭn ‘nhot kơ rim tơring pơtăm ‘nhot lơ̆m pơlei tơm Buôn Ma Thuột răt iŏk. ‘Nhot pơtrŭh ăn tơring jĭ hơbŭh, adoi tơgŭm ăn kon pơlei kơ pơlei tơm dă ƀiơ̆ glĕh hrat, adoi tơgop lơ̆m tĕch mơdro đei lơ ‘nhot sa lơ̆m dêh char Dak Lăk:“10 au ki ĭnh ƀô̆h jĭ hơbŭh lơ lau kon pơlei ư̆h kơ tĕch hlot tơmam drăm. Lăp đơ̆ng rŏng ƀô̆h jĭ hơbŭh tơ̆ pơlei tơm Hồ Chí Minh kơtang ‘nŏh ‘nhŏng pơmai ŏh nhôn pơma dơnŭh dĭh băl năm tơ̆ nŏh mĭnh păh tơgŭm ăn kon pơlei tĕch hlot ‘nhot sa adoi hơnhăk ‘nhot au năm trŭh tơ̆ tơring kăl ‘mĕh vă đei păng lơ̆m jơ năr au ‘nŏh pơlei tơm Hồ Chí Minh tŏk bŏk kơrŭn jơhngơ̆m tang găn jĭ. Gre chơ tơmam drăm au jing hơyŭh gre kơdau mă ƀar păng nhôn gô hơnơ̆ng iung jang ăn hơyŭh gre kơdau ‘măng mă 3 dơ̆ng.”

Yă Nguyễn Thị Lý, Kơ iĕng Kơdră chĕp pơgơ̆r Khŭl Chư pơglang ƀrê pơlei tơm Buôn Ma Thuột tơbăt, lăp đơ̆ng rŏng Khŭl chư pơglang ƀrê pơlei tơm iung jang hơdoi hăm khŭl drŏ kăn Kŏng ang dêh char Dak Lăk pơgơ̆r “Gre chơ tơmam drăm ‘mêm mơnat” lăng trŭh tơring jĭ hơbŭh, pơ đĭ 2 hơnĭh jang au hlôi sơng iŏk đei tơdrong vang tơgŭm djru đơ̆ng rim bơngai đei jơhngơ̆m đon ‘lơ̆ng. Trŭh dang ei, tơdrong jang “Gre chơ tơmam drăm ‘mêm mơnat” hlôi chơ ba đei 50 tân ‘nhot, ƀum, plei ‘long, rơbau tŏ kơtăm iĕr bip păng chehphe chơ ba ăn pơlei tơm Hồ Chí Minh, hăm akŏp kon jên vă jê̆ 400 trĭu hlak jên. Bơ̆ jang vei lăng sơđơ̆ng ăn bơngai vơ̆r gre chơ ‘nhot jei đei tơlĕch jang kơtang, sơđơ̆ng dơ̆ng kơ jăp ăn tang găn jĭ.“Vă sơđơ̆ng ‘lơ̆ng hơ iă ăn bơngai vơ̆r gre năm păng trŭh tơring đei jĭ ‘nŏh Khŭl chư pơglang ƀrê pơlei tơm iung jang hơdoi hăm Hơnĭh tơm jang pơgang pơlei tơm pơgơ̆r khăm test rĕnh ăn bơngai vơ̆r gre. Lăp đơ̆ng rŏng đe mĭh ma vơ̆r gre brŏk đơ̆ng pơlei tơm Hồ Chí Minh ‘nŏh hơnĭh tơm jang pơgang pơlei tơm jei hơnơ̆ng khăm test rĕnh ăn bơngai vơ̆r gre mă đe mĭh ma vơ̆r gre au sơđơ̆ng jơhngơ̆m đei erĭh sa hiôk hian ‘lơ̆ng hơ iă hăm kon pơlei pơla.”

Tŏk bŏk lơ̆m dôm năr pơ đĭ lơ̆m tĕh đak, mă kăl pơlei tơm Hồ Chí Minh, tŏk bŏk kơrŭn jơhngơ̆m tang găn jĭ Covid-19, dôm hơyŭh gre chơ tơmam drăm ‘mêm mơnat đơ̆ng Dak Lăk ư̆h khan lăp tơgŭm djru găh tơmam drăm, mălei oei jing jơhngơ̆m đon vang lăng ba dĭh băl, jing nơ̆rpơma mĭnh jơhngơ̆m đon hơdrin yak hlŏh mơmat tat, tơpŭh hŭt kĕ jĭ hơbŭh.

Bơngai chĭh: Nam Trang

Tơblơ̆ nơ̆r: Amazưt