VOV4.Bahnar - Dôm năr âu, dôm tơ drong ư̆h kơ hơ iă lơ̆m tơ drong test hrĕnh COVID -19 păng asong hla ar pơ kăp ư̆h kơ đei jĭ ăn kon pơ lei năm klĕch rim anih răp găn hơ len lăng jĭ rim dêh char, hlôi pơm ăn lơ kon pơ lei tơ̆ Dak Lak huŏng lơ̆m tơ drong mơ mat tat. Đe sư athei chă kơ dâu pơ hoal vă tơ chă anih pơm hơ len lăng jĭ, lơ bơ ngai pơm ư̆h kơ gơ̆h jing brŏk đĕch. Tơ drong arih sa, tơ drong jang kiơ̆ ‘noh kŭm đei tơ sŭl tơ săl.

Dui jơ hngơ̆m sơk đơ̆ng rŏng kơ yak lĕch đơ̆ng hơ nih tơ roi tơ băt găh pơ gang kơ Hnam pơ gang pơ lei tơm Buôn Ma Thuột, dêh char Dak Lak, mŏ Trần Thị Tuyết, tơ̆ Lâm Hà, dêh char Lâm Đồng tơ băt, ‘năr 5/7 mŏ păng buăl sư hao gre hon đa truh tơ̆ Gia Lai vă chă ngôi tơ̆ hnam đe buăl sư. Ƀơ̆t sư vơ̆t dơ̆ng Dak Lak vă brŏk tơ̆ Lâm Đồng ‘noh băt kơ tơ̆ng ang dêh char Lâm Đồng athei đĭ đăng rim bơ ngai mơ̆t tơ̆ dêh char athei đei hla ar hơ len lăng yŏng jĭ SARS –CoV -2 ư̆h kơ đei ƀôh jĭ. Mŏ hăt hot tơ chă truh hnam pơ gang pơ lei tơm vă pơm test hrĕnh mă lei ƀơ̆t truh tơ̆ anih ‘noh iŏk đei nơ̆r tơl ‘noh hnam pơ gang pơ dơh lê̆ ‘mơ̆i pơm hla ar âu. Ư̆h kơ gơh pơm hơ len lăng, ư̆h kơ đei hla ar pơ kăp gơ̆h năm jăl trong brŏk tơ̆ hnam đơ̆ng mŏ Tuyết jing măh pơ dui dunh dơ̆ng.

 “Nhôn tŏk bŏk đom păng ư̆h kơ băt athei pơm thoi yơ vă gơ̆h mơ̆t tơ̆ Lâm Đồng. Tơ dăh nhen dang ei năm hơ lơ̆k dơ̆ng tơ̆ pleiku hơ len lăng đang năm hơ lơ̆k dơ̆ng, hao gre hơ nơ̆ng athei hiong tŏ sĕt hloh 15-16 jơ thoi ‘noh tôch kơ mơ mat ăn kon pơ lei. Kŭm ‘mĕh anih jang tơ gŭm thoi yơ ‘noh vă gơ̆h năm hiôk tŏ sĕt ƀiơ̆.”

Oei ‘nhŏng Trần Anh Kiệt, bơ ngai huơ̆r gre trong Buôn Ma Thuột – pơ lei tơm Hồ Chí Minh jing măh kơ vĕch brŏk tơ̆ hnam đĕch, chu pơ dơh kơ dâu gre 1 khei ‘năr yua kŭm ư̆h kơ chă đei anih pơm test hrĕnh COVID-19.

 “Dôm ‘măng kŭm đa Test mă lei hla ar đĭ khei ‘năr gơ̆h yua, đe krao Test ‘noh mă gơ̆h năm, ư̆h kơ đei sư ‘noh ĭnh năm tơ̆ yơ kŭm ư̆h kơ gơh, jur tơ̆ noh đe kŭm athei brŏk hơ lơ̆k đĕch”.

Ƀok Nguyễn  Ngọc Thịnh, Phŏ Kơ dră Vei lăng hnam pơ gang pơ lei tơm Buôn Ma Thuột tơ băt, yua đơ̆ng ‘meh vă pơm test hrĕnh COVID -19 đơ̆ng kon pơ lei tŏk lơ ƀơ̆t mă tơ mam hơ len lăng hrĕnh kơ hnam pơ gang đei tŏ sĕt, ưh kơ tôm pơm lăp hăm ‘mĕh vă đơ̆ng kon pơ lei kơ na Hnam pơ gang athei pơ dơ̆h ‘mơ̆i pơ vih pơ văn âu.

 “Dang ei athei apĭnh nơ̆r tơ gop đơ̆ng Anih jang 1 ‘noh răt ƀlep kiơ̆ tơ drong hơ găt vă khan ‘noh jĭ athei pơ jei iŏk răt, mă 2 ‘noh apĭnh athei iŏk răt hăm kơ sô̆ dôm yơ ‘noh kiơ̆ kơ bơ̆n tơ dra hơ drol kơ sô̆ bơ ngai truh bơ̆n apĭnh athei iŏk răt. Dang ei ‘mĕh vă đơ̆ng kon pơ lei kŭm nhen anih jang mơ dro sa lơ dêh hnang.”

Đơ̆ng rŏng 2 năr hơ tol kơ ƀang pơm pơ vih pơ văn test hrĕnh COVID -19 anih khăm Đa khoa Hoàn hảo athei pơ dơh ‘mơ̆i pơ vih pơ văn âu yua tam mă đei Anih vei lăng găh jang pơ gang dâh char Dak Lak asong ăn

Kŭm hăm Hnam pơ gang pơ lei tơm Buôn Ma Thuột, lơ̆m dêh char Dak Lak oei đei 2 anih jang dơ̆ng bơ̆ jang pơ vih pơ văn test hrĕnh COVID -19 ‘noh jĭ hnam pơ gang hơ met hơ ioh jĭ Đức Tâm păng anih khăm Đa khoa Hoàn Hảo. Mă lei, yua đơ̆ng tam mă đei tơ drong ăn phep đơ̆ng Anih vei lăng jang pơ gang, kơ na đơ̆ng rŏng 2 năr hơ tol kơ ƀang tơ roi tơ băt pơm hơ len lăng hrĕnh COVID -19, 2 anih jang âu kŭm pơ dơ̆h ‘mơ̆i pơ vih pơ văn âu. Thoi noh, truh khei ‘năr âu, Dak Lak oei ư̆h kơ đei pơ vih pơ văn hơ len lăng hrĕnh COVID -19. Kon pơ lei ‘mĕh năm tơ̆ dôm tơ ring athei kăl kơ đei pơ tôch hơ len lăng ư̆h kơ đei jĭ SARS-CoV-2 jing  măh gô găi đĕch. Tơ drong arih sa, tơ drong jang jing athei mơ̆ng kiơ̆ hla ar hơ len lăng jĭ.

Kiơ̆ kơ ƀok Trịnh Quang Trí, Kơ dră Anih vei lăng tơ drong jĭ jăn dêh char Dak Lak hla ar pơ tôch hơ len lăng test hrĕnh COVID -19 lăp gơ̆h pơ kăp ăn 1 ‘nu đei dăh mă ư̆h kơ đei jĭ virus tơ̆ jơ năr iŏk pham hơ len lăng. Sư ư̆h kơ gơ̆h yua đunh, kŭm ư̆h kơ vei sơ đơ̆ng bơ ngai âu ư̆h kơ đei jĭ tơ̆ hơ năp kơnh. Yua thoi noh kăl athei  jô̆ hơ len dơ̆ng tơ drong set hơ len kơ phiê̆u pơ tôch hơ len lăng hrĕnh COVID -19 nhen “ Hla ar pơ kăp ư̆h kơ đei jĭ” vă năm vih vơ̆t păng bơ̆ jang yua tơ drong ‘nâu pơm kơ hret găh jên păng bơ ngai jang, ƀơ̆t mă iŏk yua ư̆h kơ lơ.

 “Dang ei, bơ̆n pơ gơ̆r pơm liơ vă kơ kon pơ lei brŏk đe năm tơ̆ hnam pơ gang xăh vă tơ roi tơ băt ăn bơ ngai jang pơ gang vă kơ bơ̆n  gơ̆h băt. Oei dang ei mă năm hơ len lăng test hrĕnh lăp hăm bơ ngai huơ̆r gre tắc xi, gre tih kơ dâu trong hơ tăih ‘noh ư̆h kơ đei jĭ ăn kơ đe, tơ drong ‘noh mă pơm tơ drong hiôk ăn kon pơ lei, mă pơm tơ drong hiôk tang găn jĭ.”

Kiơ̆ kơ ƀok Nay Phi La, Kơ dră Anih vei lăng găh jang pơ gang dêh char Dak Lak, tơ dăh 1 ‘nu tŏk bŏk đei jĭ, pơm hơ len lăng ăn ư̆h kơ đei jĭ, mă lei đơ̆ng rŏng ‘noh ư̆h kơ băt kơ plăh hơ yơ đe sư kŭm gô đei lĕch yŏng jĭ tơ poh ăn bơ ngai nai. Yua thoi noh găh tơ drong khoa hŏk, pơ tôch hơ len lăng ư̆h kơ đei jĭ vă năm vih vơ̆t tơ̆ rim tơ ring ư̆h kơ đei yua lơ mă đơ̆ng hla ar âu đei gơ̆h yua đơ̆ng 2 truh 3 năr. Tơ drong ‘nâu vă khan, pơ kăp hơ len lăng ư̆h kơ đei jĭ ư̆h kơ đei yua lơ lơ̆m tang găn jĭ COVID -19, mă lei ‘noh tŏk bŏk pơm lơ mơ mat tat ăn anih jang pơ gang păng kon pơ lei, pơm hiơ̆ tơ drong chă chơ tơ mam, pơm dơ̆ng tơ drong kơ hret ăn mŭk drăm ăn rim tơ ring.

Nam Trang: Chih

Thuem: Tơ blơ̆