VOV4.Bahnar - Kơ tơ̆ng ang đơ̆ng Anih pơ gơ̆r jang tang găn jĭ COVID-19 kơ dêh char tơ băt, jô̆ truh dang ei, dêh char Dak Lak hlôi iŏk đei 12 ‘măng asong vắc xin bơ̆ng jĭ COVID-19 đơ̆ng Anih tơm vei lăng găh jang pơ gang hăm hloh 1.230.000 kơ liêu vắc xin lơ̆m akŏp đĭ đăng kơ sô̆ hloh 2,7 triệu kơ liêu ‘meh vă, ăn hloh 1,4 triệu ‘nu bơ ngai kơ pal kơ 18 sơ năm lơ̆m tơ ring. Jô̆ truh ‘năr 8/11, lơ̆m dêh char Dak Lak hlôi ƀet vă jê̆ 1 triệu 128 rơ bâu kơ liêu vắc xin, lơ̆m noh, ƀet jrŭm 1 ‘noh hloh 993 rơ bâu kơ liêu, đei kơ sô̆ hloh 70% păng ƀet jrŭm 2 ‘noh hloh 128 rơ bâu kơ liêu, đei kơ sô̆ 9%.

Dak Lak klăl dơ̆ng hloh 1 triệu 800 rơ bâu kơ liêu vắc xin vă đei 80% kơ sô̆ kon pơ lei lơ̆m dêh char đei ƀet vắc xin

Đei 5/15 tơ ring tơ̆ apŭng ƀet jrŭm 1 hloh 80%, ‘noh pơ lei tơm Buôn Ma Thuột (84,8%), apŭng Krông Búk (84,7%), apŭng Ea H’leo (86,7%), apŭng Cư Kuin (84,4%) păng thị xã Buôn Hồ (80,1%). Ƀok Nay Phi La, Kơ dră chĕp kơ̆l Anih vei lăng jang pơ gang dêh char Dak Lak tơ băt: vă vei sơ đơ̆ng truh hơ tuch sơ năm 2021 Dak Lak gô ƀet tôm vắc-xin hăm hloh 80% kơ sô̆ kon pơ lei đơ̆ng 12 sơ năm tơ̆ kơ pal, dêh char kăl dơ̆ng 1 triệu 890 rơ bâu kơ liêu, lơ̆m noh ‘meh vă ƀet lơ̆m khei 11 ‘noh hloh 1 triệu kơ liêu păng khei 12 ‘noh 667.600 kơ liêu.

Thuem: Tơ blơ̆