VOV4.Bahnar – Hăm tơdrong hơbuh 'nao đơ̆ng pơrang jĭ COVID-19, vă vei xơđơ̆ng ăn bơngai jĭ, bơngai jang y tê̆ păng tơpôl, anih jang y tê̆ Đăk Lăk tŏk bŏk oei hăt hot hơtŏk pran dôm trong tang găn păng hơlen tơpoh jĭ COVID-19 lơ̆m dôm anih khăm hơmet jĭ. Ƀai chih “Adrin vei xơđơ̆ng Hnam pơgang tang găn păng tơjră jĭ COVID -19”  đơ̆ng rŏng âu tơroi găh tơdrong âu.

          Tơ̆ Hnam pơgang tơm tơring Tây Nguyên, tơdrong jang tang găn păng tơjră pơrang jĭ Covid-19 pơtoi đei vei hơnơ̆ng, đei hơlen tơnăp kiơ̆ Tơchơ̆t kơsô̆ 3088/QĐ-BYT đơ̆ng Anih tơm Y tê̆ tơbang găh “Tơdrong tơchơ̆t Hnam pơgang xơđơ̆ng tang găn păng tơjră pơrang jĭ Covid-19 păng dôm tơdrong jĭ hlăm găh trong dui jơhngơ̆m”. Kiơ̆ kơ noh, vă vei xơđơ̆ng tơchơ̆t “Hnam pơgang Xơđơ̆ng”, tơdrong axong trong nơnăm adrô̆ 'măn ăn tơdrong hơlen băt tơdrong jĭ đei iŏk jang tenh kuăng.

Tôm bơngai mơ̆t lĕch tơ̆ hnam pơgang athei tơroi y tê̆ păng hơlen hơyuh tô̆ hơkâu jăn. Kơtă ăh 'măng jang hnam pơgang đei kơƀang chih tơbang, hăm bơngai mă hien, pơlŏ, lĕch đak muh, jĭ dăng hơlŏng, kơdơ̆l kơtơh, tơnap kơ dui jơhngơ̆m, jĭ hơkâu jăn noh athei yak kiơ̆ trong pha păng khăm hơlen hli ƀơm jĭ COVID-19 đei axong kơtă ăh 'măng jang, vei xơđơ̆ng ưh đei lê̆ bơngai mă nhôm ƀơm jĭ mơ̆t lơ̆m hnam pơgang.

Bơngai jĭ, 'nhŏng oh đe xư, ăh mơ̆t lơ̆m hnam pơgang athei pơm kiơ̆ tơdrong pơtho đơ̆ng hnam pơgang, chô̆ che gom ƀŏ, ưh đei kơxoh kơhak kư̆ kă, ưh đei akŏm lơ bơngai, athei oei ataih băl 2m hăm bơngai tơjê̆ po.  

Kiơ̆ ƀak sih Võ Minh Thành, Phŏ Kơdră Hnam pơgang tơm Tơring Tây Nguyên, hăm tơdrong hơmet tơnăp, axong tơdrong jang hơdăh atŭm hăm dôm trong jang drơ̆ng minh găh tơdrong juăt jang, pơgang, tơmam drăm y tê̆, tơroi tơbăt, Hnam pơgang hơnơ̆ng kơchăng tơjră hăm dôm tơdrong đei ƀôh, vei xơđơ̆ng ăn bơngai jĭ, bơngai jang y tê̆, tang găn ƀiơ̆ tơdrong răm đơ̆ng pơrang jĭ truh tơdrong jang kơ hnam pơgang: “Đơ̆ng pơtơm đei bơngai ƀơm jĭ mă blŭng ăh 'măng hơbuh mă 4 âu noh hnam pơgang hlôi tơlĕch hơlen, kơhret kơjăp tang găn pơrang jĭ. Truh khei năr âu tôm bơngai jĭ truh khăm duh nhen bơngai mơ̆t đơ̆ng 'nguaih truh hnam pơgang đei lăng noh  F0 noh athei vei xơđơ̆ng tơdrong tang găn pơrang jĭ tơnăp hloh đei tơroi y tê̆ păng hơlen pơkă hơyuh tô̆ hơkâu jăn păng tơlĕch dôm trong tang găn pơrang jĭ nhen chô̆ che gom ƀŏ, pơkă hơyuh tô̆ hơkâu jăn păng oei ataih băl. Dang ei nhôn hlôi axong lơ anih hơlen đơ̆ng kơplăh bơngai mơ̆t truh hnam pơgang păng rim bơngai adrô̆ đei 1 'nu vei đĕch”

Oei tơ̆ Hnam pơgang hơmet jĭ Lao păng Hơmet jĭ tơxoh – tơring tŏk bŏk oei hơmet ăn 3 'nu bơngai ƀơm jĭ COVID -19 tơ̆ Đăk Lăk, tơdrong chă xơng iŏk athei kiơ̆ ƀlep tơchơ̆t găh tang găn păng tơjră jĭ COVID-19 đơ̆ng xơng iŏk, hơmet bơngai jĭ. Hăm 3 'nu ƀơm jĭ tŏk bŏk oei đei hơmet, Hnam pơgang axong đei 4 ekip khul jang kơtă pơlơh băl, rim ekip khul iŏk jang đei 1 'nu ƀak sih, 2 điều dưỡng păng 1 'nu tơgŭm jang. Kiơ̆ kơ noh, ekip jang kơtă chă hơlen kơjăp đơ̆ng mă bơngai jĭ mơ̆t truh 'măng jang vă axong trong găn păng pơkăp oei ataih băl.

Atŭm hăm noh, tơdrong chă pruih pơgang pơlôch xơmach tơ̆ hnam pơgang đei iŏk jang hơnơ̆ng, rơm rĕk đei xoh hơmet trŏ ƀlep nhen pơkăp. Hnam pơgang duh jang kơjăp tơdrong khăm hơlen 1 păh, mă hơdăh noh ăh kang ƀô̆ y tê̆ mơ̆t lơ̆m 1 lăm adrô̆ pơlơh hơbăn ao tang găn pơrang 'mơ̆i noh mă gơh lĕch chă khăm hơlen bơngai jĭ đang kơ noh năm truh lăm mă nai vă pơlơh hơbăn ao păng pruih pơgang kiơ̆ tơchơ̆t. Ƀak sih Châu Đương, Kơdră Hnam pơgang hơmet jĭ Lao păng Hnam pơgang hơmet jĭ tơxoh dêh char Đăk Lăk ăn tơbăt: “Dang ei Hnam pơgang hlôi klăh axong trong jang đơ̆ng blŭng. Tôm bơngai jĭ, 'nhŏng oh đe yĕt adoi athei tơroi y tê̆ tơnăp hăm pơkăp mã QRcode tơroi đang mưh đei ƀôh nhôm jĭ noh athei 'nhăk khăm hơlen tơ̆ thây pơgang đang kơ noh mưh hlăm noh athei iŏk hơlen pham vă băt tơdrong jĭ. Mưh dương tĭnh noh nhôn 'nhăk hơmet tơ̆ anih akŏm hloi, mưh âm tĭnh noh nhôn duh hơmet xơđơ̆ng đang kơ noh 'nhăk oei tơ̆ anih oei akŏm vă pơtoi tơdrong tơklăh oei pha nhen pơkăp.”

Ƀok Nay Phi La, Kơdră Anih jang Y tê̆ dêh char Đăk Lăk ăn tơbăt, vă tang găn tơdrong hơbuh pơrang jĭ lang xă lơ̆m anih jang y tê̆, Anih jang Y tê̆ hlôi pơkăl rim Hnam pơgang pơtoi pơm kiơ̆ Tơdrong tơchơ̆t Hnam pơgang xơđơ̆ng tang găn păng tơjră pơrang jĭ Covid-19 păng dôm tơdrong jĭ hlăm găh trong dui jơhngơ̆m kiơ̆ Tơchơ̆t kơsô̆ 3088/QĐ-BYT năr 16/7/2020 đơ̆ng Anih tơm Y tê̆. Pơtoi pơm kiơ̆ tơnăp dôm tơdrong hơlen pơkăp trong vih vơ̆t; vei xơđơ̆ng ăn tơdrong hơlen hram xơmach lơ̆m hnam pơgang, ưh đei lê̆ tơpoh dih băl lơ̆m hnam pơgang. Dôm hnam pơgang athei pơjing păng keh đang khul jang tenh hơbĕch, tơlĕch jang kiơ̆ tơdrong đei ƀôh, axong tơring pơkăp oei pha kiơ̆ tơchơ̆t. Ƀok Nay Phi La ăn tơbăt: “Anih jang Yy tê̆ hlôi pơgơ̆r hăm dôm anih jang athei pơjing trong jang ăn kơdih khul po. Mă mônh athei đei trong pơkăp oei tơklăh ăn rim anih jang, dăh mă oei tơklăh kiơ̆ hơbon hnam păng tơdrong đei ƀôh kơnê̆ hloh noh tôm hnam pơgang yuơ noh duh athei đei minh khul jang hơbĕch vă vei xơđơ̆ng ăn tơdrong khăm hơmet jĭ duh nhen tang găn păng tơjră pơrang jĭ. Tơ̆ âu pơkăl rim Anih jang y tê̆ apŭng duh nhen dôm hnam pơgang athei đei trong axong bơngai jang kiơ̆ khul hơlen vă pơm thoi yơ ưh đei răm truh tơdrong khăm hơmet jĭ, mă ƀar noh hơmet kơchăng tơmam drăm y tê̆ duh nhen axong trong pơm jang vă tang găn tơdrong tơpoh dih băl lơ̆m hnam pơgang”

Dang ei, Đăk Lăk đei pơhlom 80 bơngai tŏk bŏk oei tơklăh tơ̆a nih jang y tê̆ păng tơklăh oei minh ƀôt, jê̆ 1.800 'nu oei tơklăh tơ̆ hnam. Tơdrong jang chơ chă, pơkă tơring, pơkăp oei pha păng hơmet jĭ tŏk bŏk đei anih jang y tê̆ tơlĕch jang kơjăp xơđơ̆ng, đei jơnei tơnăp. Hăm dôm tơdrong kơ 'nôh đơ̆ng anih jang Y tê̆ păng tơdrong tơnăp đơ̆ng kon pơlei lơ̆m tơdrong pơm kiơ̆ dôm tơdrong tơchơ̆t găh tang găn păng tơjră pơrang jĭ, Đăk Lăk gô atŭm hăm jâ̆p teh đak atŭm jơhngơ̆m tơpuh lê̆ pơrang jĭ, vei lăng jơhngơ̆m jăn ăn tơpôl.

Lan chih păng pơre nơ̆r