VOV4.Bahnar - Dak lak gô hơ drin hơ vơn rim kon jên vă vei lăng ăn bơ ngai dơ nuh hin, tơ gŭm bơ ngai dơ nuh hin đei sơng têt tôm. ‘Nâu jĭ 1 lơ̆m dôm tơ drong tơm đei Mặt trận Tổ quốc Việt Nam dêh char Dak Lak tơ lĕch jang tơ̆ hop akŏm pơ tôch tơ drong jang sơ năm 2021, tơ lĕch jang Tơ drong jang hơ dai drơ̆ng 1 nơ̆r bơ̆ jang sơ năm 2022 pơ gơ̆r ‘năr 28/12. Kiơ̆ tơ roi tơ băt tơ̆ hop akŏm, lơ̆m sơ năm âu ki, Anih jang Mặt trận Tổ quốc Việt Nam rim tơ ring kơ dêh char Dak Lak hlôi tŭn pran tơ roi tơ băt, krao hơ vơn kon pơ lei jang kiơ̆ rim trong jang tang găn jĭ Covid-19. Krao hơ vơn păng pơ gơ̆r sơng iŏk jên hloh 35,3 ti hlak jên, dôm tơ mam pơ gang păng tơ mam yua tơ gŭm tơ drong jang tang găn jĭ Covid-19 tơ̆ dêh char.

Dêh char Dak Lak gô hơ drin vă rim kon pơ lei, mă loi ‘noh bơ ngai dơ nuh hin đei sơng têt tôm

Yă H Kim Hoa Byă, Kơ dră Khŭl jang krao hơ vơn kon pơ lei kơ Anih jang Đảng dêh char, Kơ dră Anih jang Mặt trận tổ quốc Việt Nam dêh char Dak Lak tơ băt, hăm dôm tơ drong mơ mat tat yua đơ̆ng ƀơm kơ nê̆ kơ tang đơ̆ng jĭ Covid-19, tơ̆ hơ năp kơnh, Mặt trận rim tơ ring gô hơ nơ̆ng hơ vơn rim kon jên vă tơ gŭm tơ jur ƀiơ̆ mơ mat tat ăn bơ ngai dơ nuh hin păng dôm bơ ngai ưh kơ pŭn ai. Ƀơ̆t măt ‘noh hơ drin vei lăng vă rim kon pơ lei, mă loi ‘noh bơ ngai dơ nuh hin đei sơng têt tôm.

Thuem: Tơ blơ̆