VOV4.Bahnar - Sơ năm hŏk 2021-2022, yua kơ ƀơm kơ nê̆ đơ̆ng covid-19 lơ tơ ring tơ̆ Dak Lak hlôi pơ gơ̆r pơ tho hŏk trực tuyến, hŏk kiơ̆ ti vi păng pơ jao ƀai truh tơ̆ hnam. Tơ lĕch jang tơ drong jang pơ tho hŏk kiơ̆ ‘nao, rim tơ ring lơ̆m dêh char tă kơ ƀơ̆p mơ mat tat ngăl, mă loi ‘noh jĭ tơ̆ dôm tơ ring hơ tăih hơ tŏ, tơ ring kon pơ lei kon kông. Vă hơ met pơ ‘lơ̆ng, rim hnam trưng hlôi đei tơ drong hơ met ming vă kơ lăp hloh hăm tơ drong yan âu. Pơ đĭ khŭl thây kô pơ tho, hŏk tro păng mĕ ƀă hŏk tro tă kơ tŏk bŏk hơ drin vă jang đang tơ drong jang pơ tho păng hŏk.

       Jĭ 1 lơ̆m dôm thây kô pơ tho tơ̆ hnam trưng hơ tăih kơ anih kơ tơ̆m xăh păng ưh kơ măh lơ tơ drong hŏk pơ hrăm, kô Lê Thị Hải Đường, kô pơ tho lăm 1, hnam trưng hŏk jăl 1 Mạc Thị Bưởi, xăh Ea Kiết, apŭng Cư M’gar, dêh char Dak Lak tơ băt: iŏk đơ̆ng sơ năm hŏk ‘nao, thây kô pơ tho hlôi tơ teh ‘măng rim hnam hŏk tro vă hơ len lăng tơ drong hŏk trực tuyến, pơ tho trong hŏk lơ̆m điên thoăi chĕp ti. Pơ tôch ăn ƀôh, pơ đĭ lăm 33 ‘nu hŏk tro ‘noh lăp 14 ‘nu oh đei kơ măy hŏk pơ hrăm trực tuyến. Thim dơ̆ng, unh hnam đe oh găh tơ ring hơ tăih kơ na hơ yuh điên thoăi păng trong internet tă ưh kơ sơ đơ̆ng ngăl. Tơ drong ‘nâu pơm ăn kô Lê Thị Hải Đường athei tơ plih trong pơ tho mă lăp:

        “ Grŭp lăm 1 tôch kơ ngơ̆ng, inh hlôi năm tơ teh ‘măng rim hnam krao hơ vơn đe oh dui internet păng hlôi dui đei 14 ‘nu oh, oei 1 puăt kơ sô̆ hŏk tro ‘noh hŏk hăm trong pơ jao ƀai, nhôn hlôi hơ drin tôch ai pơ tho đe oh hŏk ‘noh đang brŏk tơ̆ hnam đe oh hŏk kiơ̆, đơ̆ng rŏng ‘noh nhôn đei dơ̆ng 1 trong pha ‘noh hơ len lăng dơ̆ng păng pơ jao ƀai plơ̆ng dơ̆ng”.

        Oei tơ̆ hnam trưng hŏk jăl 1 Ama Trang Lơng, xăh Cư Mgar, apŭng Cư M'gar, 80% hŏk tro ‘noh bơ ngai kon kông, tơ drong arih sa  lơ unh hnam oei mơ mat tat. Kiơ̆ đơ̆ng hơ len lăng, lăp 30% kơ sô̆ hŏk tro pơm lăp hăm tơ drong hŏk trực tuyến. Vă pơ tho hŏk đei yua ‘lơ̆ng, hnam trưng hlôi krao hơ vơn tơ drong bơ ngơ̆t truh, vang tơ gŭm đơ̆ng mĕ ƀă hŏk tro. Kô Lê Thị Tuyến, kô pơ tho lăm 2A, hnam trưng hŏk jăl 1 Ama Trang Lơng, xăh Cư Mgar, apŭng Cư M'gar tơ băt:

        “ Hŏk pơ hrăm tơ̆ hnam nhen thoi âu mĕ ƀă hŏk tro ‘noh jĭ bơ ngai đei hơ năp jang tôch kơ gĭt kăl. Ƀơ̆t lăp oei gĭt kăl hloh kơ kô dơ̆ng kơ na tơ drong jang hơ dai đơ̆ng kô păng mĕ ƀă hŏk tro đei hơ năp jang tôch kơ tih lơ̆m tơ drong hŏk pơ hrăm đơ̆ng đe oh, kơ na kô hơ nơ̆ng krao điên thoăi apĭnh jet gia, vang tơ gŭm tơ dăh  đei tơ drong kiơ mĕ ƀă ưh kơ hlôh ‘noh krao điên thoăi vang tơ roi hăm kô”.

        Hăm lơ mĕ ƀă hŏk tro, tơ drong pơ tho păng hŏk trực tuyến tŏk bŏk jing tơ drong mơ mat ƀơ̆t đei ƀôh lơ̆m tơ drong arih sa kơ ƀăh kơ ƀôch dôm tơ drong kăl. Mŏ H Brắc Ayun, xăh Cư M’gar, apŭng Cư M’gar tơ băt: Unh hnam mŏ găh unh hnam mơ mat tat, ưh kơ đei chô̆ internet. Vă 2 ‘nu kon kiơ̆ tom ƀai hŏk, klo kăn măr sư hlôi gơ̆ih mon lăm 7 năm tơ̆ hnam buăl hŏk hơ dai pôm lăm vă vang hŏk, oei mon lăm 2 kiơ̆ trong pơ jao ƀai tơ̆ hnam. Mĕ ƀă kŭm hơ drin tôch ai pơ tho thim, mă loi ‘noh jĭ hăm mon lăm 2.

        “Dôm đe mon ưh kơ gơh nam hŏk ĭnh kŭm bơ ngơ̆t, hli kơ đe oh ưh kơ băt đei ƀai kiơ̆ hŏk online ‘noh hŏk ưh kơ gơh. Gơ măng năm ‘noh ĭnh pơ tho mon. Ĭnh hơ drin pơ hrăm ăn mon chih, đŏk, pơm đei ƀai toán pơ tho đơ̆ng rŏng vă kơ gơh tom hăm sơ năm ‘nâu vă mon hŏk ‘lơ̆ng ƀiơ̆.”

            Kiơ̆ hơ len lăng đơ̆ng Anih vei lăng găh pơ tho pơ hrăm Dak Lak, kơ sô̆ hŏk tro đei gơh hŏk trực tuyến tơ̆ jăl 3 đei: 92%; jăl 2 ‘noh: 62%; jăl 1 lăp đei hloh 31%. Yua thoi noh, hơ dai hăm trong hŏk trực tuyến lơ hnam trưng tơ̆ Dak Lak hlôi athei rơ̆ih thim dôm trong tơ gŭm ‘nao gơh ‘lơ̆ng păng pơm lăp đei tơ dỏng hŏk lơ̆m tơ drong hrei ‘nâu. Rim ‘nu thây kô tơ̆ Dak Lak, mă loi ‘noh jĭ thây kô pơ tho tơ̆ tơ ring hơ tăih hơ tŏ, tơ ring kon pơ lei kon kông, tŏk bŏk kơ chăng păng hơ drin hloh lơ ‘măng vă pơ vei sơ đơ̆ng pơ tho păng hŏk, vei sơ đơ̆ng jang đang dôm tơ drong hơ găt tơ lĕch ăn lơ̆m sơ năm hŏk ‘nao.

            Hương Lý: Chih

Thuem: Tơ blơ̆