VOV4.Bahnar - Tơ̆ hơ năp tơ drong jĭ COVID-19 oei tơ pŏh tôch hơ mơt, anih pơ tho pơ hrăm dêh char Dak Lak đei trong vă chơ ba 10 ‘nu hŏk tro tơ̆ dêh char năm tơ̆ Khánh Hòa thi tốt nghiệp THPT đơt 2 sơ năm 2021.

Kiơ̆ trong jang đơ̆ng Anih tơm vei lăng pơ tho pơ hrăm, ‘măng thi tốt nghiệp THPT đơt 2 sơ năm 2021 vă pơ gơ̆r lơ̆m ‘năr 5 păng 6/8. Dak Lak đei 10 ‘nu hŏk tro thi đơt 2 âu (lơ̆m nŏh đei 1 ‘nu ŏh F2, 9 ‘nu ŏh lơ̆m anih pơ vang găn ưh gơ̆h năm thi đơt 1). Đơt 2 âu, đe hŏk tro Dak Lak vă thi hơ dai hăm hŏk tro tơ̆ Khánh Hoà.

Anih vei lăng pơ tho pơ hrăm dêh char Dak Lak ăn tơ băt, đơ̆ng rŏng kơ bơ̆ jang hăm Anih vei lăng pơ tho pơ hrăm Khánh Hòa vă sơng hŏk tro, anih âu hlôi hơ met gre chơ ba hŏk tro, chă anih oei ăn đe ŏh năm thi tốt nghiệp THPT đơt 2 vă pơm ‘lơ̆ng sơ đơ̆ng, mă loi jĭ kơ plăh tơ drong jĭ oei tơ pŏh tôch krê tơ̆ Dak Lak păng Khánh Hoà.

Dơ̆ng: Tơ blơ̆