VOV4.Bahnar - Pơ gê ‘năr 1/7, Anih pơ gơ̆r ‘măng pơ long lĕch ‘măng khoă hŏk đĭ jăl 3 dêh char Dak Lak kơ tă năm hơ len lăng tơ drong jang hơ met ăn pơ gơ̆r ‘măng pơ long lĕch ‘măng khoă hŏk đĭ jăl 3 tơ̆ rim hơ nih pơ long lơ̆m pơ lei tơm Buôn Ma Thuột. ‘Măng pơ long lĕch ‘măng khoă hŏk đĭ jăl 3 sơ năm 2021, dêh char Dak Lak đei 1 khŭl jang vei lăng pơ long, 32 hơ nih pơ long hăm hloh 19.800 ‘nu hŏk tro vang pơ long. Hơ drô̆ pơ lei tơm Buôn Ma Thuột đei 9 hơ nih pơ long. Truh dang ei, rim hnam trưng hlôi jang đang dôm tơ drong ‘lơ̆ng găh tơ mam, bơ ngai jang pơ gơ̆r ‘măng pơ long.

Khŭl pơ gơ̆r ‘măng pơ long lĕch ‘măng khoă hŏk đĭ jăl 3 dêh char Dak Lak hơ len lăng tơ drong jang hơ met ăn ‘măng pơ long  lĕch ‘măng khoă hŏk đĭ jăl 3 tơ̆ rim hơ nih pơ long

Tơ̆ hơ năp đei ƀôh krê hơ mơt đơ̆ng jĭ Covid 19, vă vei sơ đơ̆ng jơ hngơ̆m jăn ăn hŏk tro, kang ƀô̆, thây kô pơ tho, hơ dai hăm tơ drong klăi song hŏk tro hơ drol kơ ‘măng pơ long, rim hơ nih pơ long hlôi pơ jing trong jang prŭih pơ gang pơ lôch pơ rang đơ̆ng rŏng kơ ‘măng pơ long, hơ met ăn hơ nih pơ tŏ yuh hơ kâu, hơ nih ôp ti, che gom păng đei tŏ sĕt hloh 2 hơ nih pơ long hơ met hiă. Truh  jơ năr âu, dêh char Dak Lak tam mă đei kang ƀô̆, bơ ngai jang pơ vih pơ văn ăn ‘măng pơ long dăh mă hŏk tro vang pơ long đei lơ̆m bơ ngai athei pơ long ‘măng mă 2.

Thuem: Tơ blơ̆