VOV4.Bahnar - Pơ yan phĕ chĕh phe 2021-2022 vă truh bơih, Dak Lak kăl đei kơ hrĕng rơ bâu ‘nu bơ ngai vă phĕ chĕh phe. Mă lei lơ̆m khei ‘năr jĭ COVID-19 oei tơ pŏh tôch hơ mơt ‘nŏh tơ drong chă bơ ngai jang, iŏk bơ ngai đơ̆ng nai vă phĕ chĕh phe, pơm ‘lơ̆ng ăn tơ drong tang găn jĭ tŏk bŏk jing tơ drong tôch tơ tăm đơ̆ng kon pơ lei păng khul kơ dră tơ ring tơ̆ Dak Lak.

Kon pơ lei pơ tăm chĕh phe tơ̆ Dak Lak

Kiơ̆ hla ar chih tơ roi đơ̆ng Anih vei lăng choh jang xa păng atŏk tơ iung tơ ring tơ rang Dak Lak, pơ yan phĕ chĕh phe 2021-2022, Dak Lak đei hlŏh 209 rơ bâu ha, plei pơ hlom đei hlŏh 500 rơ bâu tân. Vă pơm ‘lơ̆ng ăn tơ drong phĕ chĕh phe, dôm apŭng kơ chăng tơ lĕch trong akŏm khul bơ ngai chă phĕ chĕh phe mă lăp hăm tơ drong tang găn jĭ. 

Dơ nŏ anih vei lăng kon pơ lei dêh char pơ jao ăn Anih vei lăng choh jang xa păng atŏk tơ iung tơ ring tơ rang dêh char pơ gơ̆r, jang hơ doi hăm dôm anih jang kơ pal chih akŏm rim tơ drong tơ roi, pơ tho tơ ƀôh ăn Dơ nŏ anih vei lăng kon pơ lei apŭng, thĭ xăh, plt pơ jing trong phĕ chĕh phe sơ đơ̆ng ‘lơ̆ng, đei yoa.

Dơ̆ng: Tơ blơ̆