VOV4.Bahnar - Trung thu sơ năm ‘nâu tôch gĭt kăl hăm lơ hơ iŏh tơ̆ dôm anih hơ met jĭ, anih oei hơ drô̆ păng tơ ring đei pơ vang găn vă tang găn jĭ Covid-19 tơ̆ Dak Lak. Ưh đei rơ ông rơ ang tĕh hơ gơ̆r, hơ xoang prao dăh mă ngôi pơ chơt Khei pơ nil, đe ŏh oei ƀôh hiôk hơ iă lơ̆m jơ hngâm mưh iŏk đei lơ tơ mam trung thu păng đon pơ ngơ̆t đơ̆ng lơ khul grŭp, bơ ngai jang tơ̆ âu.

Iŏk tơ pu tơ mam trung thu đơ̆ng dôm anih tơ gŭm năm hơ păh tơ̆ hnam, ŏh H’Sa Muel Adrơng, tơ̆ plei Pưk Prong, xăh Ea Ning, apŭng Cư Kuin tơ roi, ‘nâu jĭ pơ yan trung thu pha hlŏh hăm inh đơ̆ng sơ̆ truh dang ei. Kơ plăh khei âu dôm sơ năm adrol ki, inh păng ŏh drŏ kăn inh tôch hơ iă gô chang vă chă chĕng ngôi unh đeng ngôi tơ̆ Hnam hŏk hôp pơ lei, đei khul druh dăm pơ gơ̆r hơ ri hơ xoang, ngôi pơ chơt. Sơ năm ‘nâu yoa jĭ covid-19 tôch hơ mơt, plei Pưk Prong athei pơ vang găn vă tang găn jĭ kơ na lơ̆m pơ lei ưh gan chơt. Mă lei, inh oei tôch hơ iă đĕch yoa iŏk đei tơ mam trung thu ƀlep ƀât khei pơ nil vă măr nhi ŏh inh xa ngôi tơ̆ hnam:

“Ŏh tôch hơ iă mưh iŏk đei tơ mam đơ̆ng đe ‘nhŏng đe mŏ, ŏh vă pơ gơ̆r ăn nhôn 1 pơ yan têt trung thu mă hơ iă. Ŏh bơ nê kơ đe ‘nhŏng, đe mŏ lơ̆m Khul vei lăng hơ iŏh dêh char păng Hnam jŏh hơ ri hơ xoang kơ đe hơ iŏh Dak Lak truh hơ păh tơ mam ăn ŏh.”

Hơ met tơ mam trung thu vă hơ păh ăn đe mon

Tơ̆ anih hơ met jĭ kơ sô̆ 1 dêh char Dak Lak dôm năr ‘nâu nhen thoi chơt hơ iă ƀiơ̆. Kŭm hăm vei lăng, hơ met jĭ ăn dôm bơ ngai jĭ, đe kăn ƀô̆, bơ ngai jang tơ̆ âu oei tang măt ăn dôm anih tơ gŭm tơ mam năm jơ̆p lăm vă hơ păh tơ mam trung thu ăn đe mon hơ iŏh oei hơ met jĭ Covid-19. Ƀak si chuyên khoa 2 Phạm Thị Tuyết Nhung, Phŏ Kơ dră chĕp kơ̆l hnam pơ gang hơ met jĭ kơ sô̆ 1 ăn tơ băt, tơ̆ âu oei akŏm păng iŏk hơ met ăn vă jê̆ 500 ‘nu bơ ngai jĭ, lơ̆m nŏh đei 117 ‘nu hơ iŏh, mon ‘lơ̆p hlŏh ‘nao lăp hlŏh 1 khei đĕch.

Dang ei, jơ hngâm pran bơ ngai jĭ sơ đơ̆ng ngăl, hơ met ƀônh klăih, jơ hngâm ƀônh jăng. Dôm năr âu ki, hnam pơ gang iŏk đei tơ drong tơ gŭm đơ̆ng lơ anih jang, khul grŭp, kiơ̆ đơ̆ng kăn ƀô̆, bơ ngai jang lơ̆m hnam pơ gang vă hơ păh tơ mam ăn đe mon. Ƀak si Phạm Thị Tuyết Nhung akhan, ‘nâu jĭ tơ drong jang tôch kăp gĭt, tơ gŭm, pơ lung ăn đe mon, gơ nơm thoi nŏh đe mon sơ đơ̆ng jơ hngâm, chơt hơ iă ƀiơ̆, vang pơm tơ jur ƀiơ̆ năr hơ met jĭ păng hơ tŏk kơ sư̆k tang găn jĭ vă jăh klăih jĭ:

“Đe ŏh mât tơ̆ âu ưh lăp đei hơ met jĭ, đei vei lăng đĕch mă oei iŏk đei nơ̆r pơ tho, pơm thoi yơ vă đe ŏh adrin hlŏh dơ̆ng, khŏm hơ met klăih jĭ vă jăh brŏk dơ̆ng hăm unh hnam. Trung thu sơ năm ‘nâu hnam pơ gang kŭm đei lơ bơ ngai vang tơ gŭm, truh hơ păh tơ mam, thoi âu kŭm tôch hơ iă, sư vang tơ gop jăh hơ met pơ ‘lơ̆ng dôm tơ drong mơ mat tat ‘năi, khŏm tŏk hlôi kơ jĭ jăn vă vih hăm unh hnam, vih hăm tơ pôl.”

Lơ tơ mam đei gơih kiơ̆ bơ ngai jang tơ̆ hnam pơ gang păng anih oei hơ drô̆ vă hơ păh ăn đe mon

Tơ̆ hơ năp tơ drong jĭ Covid-19 ơei tơ pŏh tôch hơ mơt, lơ tơ ring tơ̆ Dak Lak oei đei pơ vang găn vă tang găn jĭ. Hăm đon hơ pơi ‘mĕh hơ nhăk ăn đe ŏh hơ iŏh 1 pơ yan trung thu chơt hơ iă, lơ khul jang Đoan, Khul hơ iŏh lơ̆m dêh char jang hơ doi hăm dôm anih jang păng bơ ngai đei đon ‘lơ̆ng pơ gơ̆r Trung thu hăm hơ năn “Unh đeng sơ nglŏng tơ̆h hơ dăh jơ hngâm đon hơ pơi ‘mĕh – Vang ngôi pơ chơt hăm đe hơ iŏh, adrin tŏk hlôi tơ drong jĭ”.

‘Nhŏng Trần Doãn Tới, Phŏ Bí thư đoan dêh char Dak Lak ăn tơ băt, tơ drong jang gô gơih ăn đe ŏh lơ tơ mam, ƀĕng trung thu, jên hŏk ƀŏng, unh đeng sơ nglŏng, đak tŏh păng tơ mam hŏk pơ hrăm. Mă lei mât tơ̆ dôm tơ ring, khul bơ̆ jang bơ̆ jang lăp ‘lơ̆ng, đei yoa tơ tom tơ gŭm păng pơ lung đe ŏh lơ̆m năr trung thu sơ năm ‘nâu. Hơ drô̆ hăm dêh char, Khul hơ iŏh dêh char jang hơ doi hăm dôm anih tơ gŭm hơ păh 500 tơ pu tpơ mam ăn đe hơ iŏh đei tơ drong arih xa mơ mat tat, đe ŏh oei hơ met jĭ dăh mă tơ̆ anih oei hơ drô̆, tơ ring đei pơ vang găn vă tang găn jĭ Covid-19.

“Hăm dôm anih jang, tơ ring kơ mâu dreng, jơk, kam, ƀrê ‘nŏh chă rơih trong pơ gơ̆r mă lăp, pơm thoi yơ vă đe mon mơ mat tat dêh hlŏh, đe mon tơ̆ tơ ring pơ vang găn, đe mon pơ ti, jo jăn đei têt trung thu chơt hơ iă, kơ plăh oei ưh ăn ngôi akŏm lơ bơ ngai dang ei. Hăm dêh char, Khul kơ dră chĕp kơ̆l đoan dêh char, Khul hơ iŏh dêh char pơ gơ̆r tơ̆ hnam pơ gang hơ met jĭ dang ei păng dôm hnam pơ gang tơ ring vă vei lăng păng hơ nhăk jơ hngâm đon chơt hơ iă trung thu truh hăm đe mon.”

Lơ tơ mam iĕ iĕ mă lei tôch kăp gĭt, tơ tom truh hăm đe mon lơ̆m pơ yan trung thu sơ năm ‘nâu

Mĭnh pơ yan trung thu vih pha ƀiơ̆ kơ dôm sơ năm adrol ki, yoa ƀơm kơ nê̆ đơ̆ng jĭ Covid-19, lơ hơ iŏh Dak Lak kŭm hăm tĕh đak ưh đei gơ̆h tơ̆k ngôi unh đeng sơ nglŏng, xa ngôi bơ̆n ƀĕng dăh mă lăng đe hơ xoang prao. Mă lei, hăm tơ drong tơ rĕk đơ̆ng khul kơ dră tơ ring păng dôm anih jang kơ pal, khul grŭp tơ pôl, đe ŏh hlôi đei sơng pơ yan trung thu chơt hơ iă păng gĭt kăl hăm lơ tơ mam hơ păh, pơ chơp jơ hngâm tôch tơ tom păng đei yoa.

H’Xíu H’Mốc: Chih

Dơ̆ng: Tơ blơ̆