VOV4.Bahnar - Brei mơ sơ̆, lơ̆m dêh char Dak Lak hơ nơ̆ng đei ƀôh dôm ‘măng glơ̆k kơ đak pơm ăn 5 ‘nu hơŏk tro lôch. Tơ drong ‘nao hloh đei ƀôh lơ̆m kơ sơ̆ ‘năr  17/5, tơ̆ dơ nâu đak plei Ea Lang, xăh Cư Pui, apŭng Krông Bông pơm ăn 1 ‘nu hŏk tro lôch. Bơ ngai lôch âu ‘noh mon: Lương Thị Như Ngọc, 9 sơ năm, oei tơ̆ plei Ea Lang, xăh Cư Pui, apŭng Krông Bông, dêh char Dak Lak. Mon Ngọc ‘noh jĭ hŏk tro lăm 3, hnam trưng hŏk jăl 1 Cư Pui II, xăh Cư Pui, apŭng Krông Bông, dêh char Dak Lak. Tơ drong glơ̆k kơ đak đei ƀôh lơ̆m 3 jơ kơ sơ̆ ‘năr (17/5), ƀơ̆t mon Ngọc kŭm hăm grŭp buăl sư năm tơ̆ dơ nâu đak plei Ea Lang chơi. Ƀơ̆t kơ plăh pơ ngôi, ư̆h kơ pŭn Ngọc đei tơ ƀlơ̆r jơ̆ng huŏng lơ̆m dơ nâu păng đei glơ̆k kơ đak. Hơ drol ‘noh, lơ̆m ‘năr (13/5), mon H’hằng Kmăn păng H’nan Mlô, tă kơ rơ neh sơ năm 2008 ngăl, jĭ hŏk hơ dai lăm 7A, hnam trưng hŏk jăl 2 Trần Quốc Toản xăh Ea R’bin mơ̆n, oei tơ̆ xăh Ea R’bin, năm tơ̆ đak krong Krông Nô hum đang kơ ‘noh đei glơ̆k kơ đak. Oei lơ̆m ‘năr (16/5), tơ̆ dơ nâu đak Drao, xăh Cư Dliê M’Nông, apŭng Cư M’gar kŭm đei ƀôh tơ drong glơ̆k kơ đak pơm ăn 2 ‘nu mŏ oh pôm mĕ ƀă ‘noh mon: Phan Thị Thanh L. 13 sơ năm păng Phan Thanh N. 11 sơ năm,pơ đĭ 2 ‘nu sư oei tơ̆ thôn 1, xăh Cư Dliê M’Nông lôch. Hơ nơ̆ng đei ƀôh tơ drong glơ̆k kơ đak ‘noh jĭ nơ̆r tơ roi lê̆ hơ drol ăn kơ rim mĕ ƀă, ŭnh hnam păng tơ pôl lơ̆m tơ drong vei lăng hơ iŏh sơ đơ̆ng mư̆h pơ yan pơ dơ̆h hŏk tŏk bŏk truh.

Thuem: Tơ blơ̆