VOV4.Bahnar - ‘Năr 28/10, dêh char Dak Lak đei dơ̆ng 126 ‘nu jĭ Covid-19, lơ̆m noh đei truh 39 ‘nu chă ƀôh lơ̆m tơ pôl. 126 ‘nu jĭ Covid-19 ‘nao hăm 39 ‘nu chă ƀôh lơ̆m tơ pôl tơ̆ dêh char Dak Lak akŏm găh lơ tơ̆ dôm apŭng Cư Mgar, Krông Buk, thị xã Buôn Hồ păng pơ lei tơm Buôn Ma Thuột. ‘Nâu kŭm jing dôm tơ ring đei lơ bơ ngai jĭ lơ̆m tơ pôl lơ̆m 1 giĕng âu ki păng dôm bơ ngai jĭ găh lơ đei ƀơm truh pơ rang jĭ đơ̆ng dôm kon pơ lei brŏk đơ̆ng tơ ring đei jĭ dôm dêh char găh pơ băh.

Tơ̆ pơ lei tơm Buôn Ma Thuột hơ nơ̆ng đei lơ bơ ngai jĭ Covid-19 lơ̆m tơ pôl. Anih jang pơ gang tŏk bŏk hơ drin khăm hơ len vă tang găn jĭ tơ poh lanh

Lơ xăh, phường tơ̆ rim tơ ring âu hlôi hơ tŏk kâp đô̆ tôch kơ hrĕnh đơ̆ng kâp 1, kâp 2 tŏk kâp 3, kâp 4, vă khan đơ̆ng jơk, dreng tŏk kam, ƀrê. Anih jang pơ gang dêh char Dak Lak tŏk bŏk hơ drin dăr hơ len, tơ chă, tơ lĕch jang ăn oei hơ drô̆ y tê̆ păng iŏk kơ mâu hơ len lăng dôm bơ ngai ƀơm truh pơ rang jĭ ngôi tơ jê̆ hăm dôm bơ ngai jĭ, chă ƀôh F0 tơ̆ ‘ngoăih tơ pôl.

Ƀơm truh tơ drong jĭ Covid-19 tơ̆ Dak Lak đei ƀôh krê hơ mơt, ‘năr 28/10, Anih vei lăng kon pơ lei dêh char Dak Nông hlôi đei hla ar kăl hơ găt đơ̆ng ‘năr 29/10, kang ƀô̆ păng bơ ngai jang tơ̆ Dak Nông ưh kơ gơ̆h năm dăh mă brŏk tơ̆ Dak Lak lơ̆m 14 năr, ưh kơ jô̆ dôm bơ ngai năm bơ̆ jang dăh mă đei tơ drong drơ̆ng ăn đơ̆ng anih jang gơ̆h kĭ ăn.

Thuem: Tơ blơ̆