VOV4.Bahnar - Pơ gê ‘năr 10/9, Jơ nu\m rim khu\l jang Khoa học păng Kỹ thuật de#h char Đắk Lắk jang hơ dai hăm khu\l jang ‘long sa plei de#h char pơ gơ\r hop ako\m khoa học “ Trong jang vei lăng hơ drông, pơ rang j^ pơ răm tơ\ ‘long sầu riêng, [ơ păng mit”. Lơ\m de#h char Đắk Lắk dang ei đei hlo\h 20.000 hec tar ‘long sa plei, lơ\m no\h đei dôm ‘long pơ tăm tơm hơ nhăk đei kơ jă mu\k drăm lơ nhen: [ơ, sầu riêng, mit… Thu io\k rim sơ năm đơ\ng dôm kơ loăi ‘long sa plei jo# pơ hlom đei 500 ti hlak jên.

An^h hop ako\m

Tơ\ hop ako\m, rim bơ ngai tang măt akhan: mơ mat tat dang ei ‘no\h te\h pơ tăm ‘long sa plei tơ\ Đắk Lắk oei ie\ le, găh lơ pơ tăm kiơ\ trong kơ d^h, pơ tăm hơ lam lơ\m pơ gar che\h phe, tiu, tơ drong yua lơ pho\ng, pơ gang hơ drông hơ nhăk tru\h tơ drong ư\h kơ pơm lăp hăm ‘me\h vă găh rơ go\h ‘lơ\ng tơ mam sa… Kon pơ lei kăl kơ hlo#h vao [lep găh hơ năp jang đơ\ng bơ ngai pơm tơ le\ch, khu\l kơ dră đei trong vă jang, che\ng hơ met te\h rơ đăh, rim an^h jang mơ dro sa hơ met ‘lơ\ng tơ drong jang te\ch mơ dro… vă ‘long sa plei tơ pă jing cho\h jang sa tơm ‘nao, ku\m hăm che\h phe, tiu, kơ su… pơm tơ drong kơ jăp ăn mu\k drăm kơ de#h char Đắk Lắk.

Thuem: Tơ blơ\