VOV4.Bahnar - Jang kiơ̆ nơ̆r krao hơvơn đơ̆ng rim Dơnŏ anĭh Đoàn lơ̆m dêh char, lơ hơdrŭh tơdăm tơ̆ Dak Lăk hlôi pơm hla bơar apĭnh bơ̆ jang lơ̆m khŭl bơ̆ jang tơgŭm djru tang găn jĭ Covid-19. Ư̆h kơ ‘nhoen tơnap tap, glĕh hrat, rim bơngai apĭnh jang tŏk bŏk tơgop jơhngơ̆m lơ̆m bơ̆ jang tơ̆ rim hơnĭh ăn oei hơdrô̆ akŏm, bơ̆ jang tơgŭm ăn ƀok thây pơgang păng rim khŭl anai hloi vă vang tơpŭh hŭt jĭ hơbŭh.

Nơr apĭnh đơ̆ng mŏ Phan Ngọc Bảo Nhi ăn Kơdră chĕp pơgơ̆r Dơnŏ anĭh vei lăng jang Pơgang Dak Lăk

Vă jê̆ 2 giĕng vang bơ̆ jang tơ̆ hơnĭh ăn oei hơdrô̆ akŏm lơ̆m Hnam pơgang apŭng Krông Pach, mŏ Phan Ngọc Bảo Nhi, oei tơ̆ tơring Hòa An, apŭng Krông Pach, dêh char Dak Lăk hlôi joăt ƀiơ̆ bơih hăm tơdrong jang hăm hrŭk hơbĕn krum akau jăn mă đơ̆ng ‘năr ‘mi jei nhen ‘năr prăng. Jĭ ƀak si ‘nao lĕch ‘măng khoă kơna mŏ đei pơjao bơ̆ jang chă khăm păng iŏk pham khăm hơlen ăn rim bơngai ‘nao brŏk đơ̆ng rim dêh char đei jĭ.

             Pơma dơnŭh hăm điên thoăi, Phan Ngọc Bảo Nhi tơroi, lăng ƀô̆h tơdrong jĭ hơbŭh tơ̆ Dak Lăk roi năr roi kơtang, măt bơngai tơpŏh jĭ roi lơ, kơna mŏ hlôi pơm hla bơar păng chih nơ̆r pơtrŭh kơtă hăm Kơdră chĕp pơgơ̆r Dơnŏ anĭh vei lăng jang pơgang dêh char Dak Lăk apĭnh vang iung jang tang găn jĭ hơbŭh. Lăp đơ̆ng rŏng ‘nŏh, Kơdră chĕp pơgơ̆r Dơnŏ anĭh vei lăng jang pơgang hlôi đei nơ̆r tơl păng ba hla bơar mŏ ăn Dơnŏ anĭh tang găn jĭ apung sơng hơvơn păng pơjao tơdrong jang.“Ĭnh ƀô̆h jĭ hơbŭh tơ̆ Dak Lăk tơpŏh roi kơtang, măt bơngai tơpŏh roi năr roi lơ kơna ĭnh ‘mĕh vă vang năm tang găn jĭ vă tơgŭm ăn rim bơngai, kơ yuơ tơ̆ Dak Lăk jei ư̆h kơ măh bơngai bơ̆ jang. Tơdrong jang jei tôch kơ lơ, mơmat hrat hrĭn tơpă mơ̆n. Mă lei mư̆h vang bơ̆ jang hơdoi hăm rim bơngai vă vang tang găn jĭ hơbŭh ‘nŏh ba tôch hơ iă dêh”.

Anh Nguyễn Tấn Huy đei ŭnh hnam ba năm tơ̆ hơnĭh ăn oei hơdrô̆ akŏm vă vang jang tang găn jĭ hơbŭh

Jei bơngai apĭnh năm jang vang tơgŭm djru tơ̆ hơnĭh ăn oei hơdrô̆ akŏm tơ̆ Hnam pơgang apŭng Krông Pach, tơdrong jang rim năr kơ ‘nhŏng Nguyễn Tấn Huy oei tơ̆ thôn 2, tơring Tân Tiến, apŭng Krông Pach ‘nŏh jang tơgŭm ba tơmam drăm ăn rim hơnĭh păng chă hơpuih hơmet lơ̆m hơnĭh ăn oei hơdrô̆. Nguyễn Tấn Huy tơroi, hăp ‘nŏh tŏk bŏk sinh viên sơnăm mă 2 hnam trương Đăi hŏk Khoa học Tự nhiên pơlei tơm Chí Minh. Kơ yuơ jĭ hơbŭh kơna đơ̆ng khei 5 ‘nhŏng măh pơdơ̆h kơ hŏk brŏk vĭh tơ̆ pơlei. Mư̆h Dơnŏ anĭh Đoàn apŭng Krông Pach tơbăt tơchă bơngai vang jang tơgŭm, đei ŭnh hnam drơ̆ng nơ̆r, ‘nhong hlôi pơm hla bơar apĭnh jang păng đei tơmơ̆t jang tơ̆ hơnĭh ăn oei hơdrô̆ hlŏh 1 giĕng kơ au.“Ŭnh hnam hlôi tơchĕng hơdrol bơih kơna mư̆h đei pơm hla bơar apĭnh năm jang ‘nŏh ŭnh hnam drơ̆ng nơ̆r hloi, kơ yuơ ‘mĕh vă tơgŭm djru ăn kon pơlei pơla. Lơ̆m au tơdrong jang jei ư̆h kơ măh glĕh hrat ôh mă lei kơ yuơ lơ̆m tơring đei jĭ hơbŭh kơna ư̆h kơ đei bơngai jang chă tơplĭh dĭh băl ôh. Tơdăh rim boăl năm lei hơnhăk ba tôm tơmam drăm, jơhngơ̆m grăng akau ‘nŏh hoei bơih, mơ̆t tơ̆ au tơdrong erĭh sa ư̆h gan hiôk hian nhen tơ̆ hnam ôh, sŏng sa tơpôl kơna đei tơdrong pha ƀiơ̆”.

Tơdrong bơ̆ jang tơgŭm djru đơ̆ng ƀak si Bảo Nhi tơ̆ hơnĭh ăn oei hơdrô̆

‘Nhŏng Nguyễn Văn Hà, Bí thư Đoàn apŭng Krông Pach tơbăt, mư̆h lơ̆m apŭng đei bơngai jĭ păng pơjing hơnĭh ăn oei hơdrô̆ akŏm vă sơng hơvơn kon pơlei ‘nao brŏk đơ̆ng tơring đei jĭ, Dơnŏ anĭh Đoàn hlôi hơmet ming trong bơ̆ jang, ăn iung jang hơdrol lơ̆m tang găn jĭ Covid-19 păng tơdrong erĭh sa tơpôl lơ̆m apŭng. Atŭm hăm tơgŭm djru dôm bơngai tơnap tap, khŭl đoàn hlôi krao hơvơn rim bơngai năm jang vang jang tơgŭm djru khŭl bơ̆ jang tang găn jĭ hơbŭh. ‘Măng mă blŭng đei 15 ‘nu apĭnh jang hlôi đei kĭ ăn năm jang păng pơjao bơ̆ jang tơgŭm djru tơ̆ hơnĭh ăn oei hơdrô̆ akŏm kơ apŭng Krông Pach.“Đơ̆ng mă krao hơvơn ‘nŏh khŭl đoàn hơdrŭh tơnăm pơm hla bơar apĭnh jang jei lơ ƀlep hăm trong tơlĕch krao hơvơn đơ̆ng Khŭl kơdră chĕp pơgơ̆r Đoàn apŭng. Nhôn jei bơ̆ jang hơdăh trong jang, đơ̆ng chĭh hla bơar apĭnh jang trŭh tơdrong drơ̆ng nơ̆r ăn jang kơ ŭnh hnam, kơ tơring, hơnĭh bơ̆ jang pơtrŭh ăn. Tơ ƀơ̆p dĭh băl kơtă rim bơngai apĭnh năm jang, chă mơ̆ng đe sư pơma tơbăt tơdrong ‘mĕh vă păng pơjing rim khŭl hơdăh păng pơjao ăn rim hơnĭh vă pơ prŏ ăn, pơjao ăn tơdrong jang, pơtho tơbăt ăn đe boăl vang jang keh đang ‘lơ̆ng hơ iă hlŏh”.

Hơdrŭh tơdăm năm jang vang pơdŭ tơmam drăm tơgŭm ăn kon pơlei tơ̆ hơnĭh ăn oei hơdrô

Tơ̆ apŭng Cư Mgar, đơ̆ng vă đĭ khei 7 au ki, lăp đơ̆ng rŏng mĭnh ƀar ‘măng chĭh tơroi tơbăt tơchă bơngai vang jang, Khŭl kơdră chĕp pơgơ̆r Đoàn apŭng Cư Mgar hlôi sơng iŏk đei lơ hla bơar apĭngh vang bơ̆ jang lơ̆m Khŭl jang “Phòng tuyến áo xanh”. Kiơ̆ đơ̆ng ‘nhŏng Y Wal Mlô, Bí thư Đoàn apŭng Cư Mgar, lơ̆m apŭng hlôi pơjing iung jang dơ̆ng 18 khŭl jang tang găn jĭ kơ apŭng păng tơring hăm hlŏh 280 ‘nu bơngai jang vang tơgŭm djru bơ̆ jang tang găn jĭ, hơmet pơ ‘lơ̆ng hơnĭh, tơmam drăm ăn rim hơnĭh ăn oei hơdrô̆ akŏm. Hơdrô̆ khŭl bơ̆ jang apŭng hlôi sơng iŏk đei hla bơar apĭnh jang đơ̆ng hlŏh 50 ‘nu bơngai. Dơnŏ anĭh Đoàn hlôi pơm hla bơar, pơgơ̆r pơtho tơbăt rim tơdrong tơchơ̆t păng pơtho tơbăt trong vei lăng dĭh kau sơđơ̆ng. Adoi pơma dơnŭh hăm Dơnŏ anĭh chĕp pơgơ̆r tang găn jĭ apŭng pơjao tơdrong jang lăp hăm rim khŭl.“Lơ boăl jang đoàn hơdrŭh tơdăm sơnăm oei mơlô̆h, đei boăl ‘nao lĕch ‘măng khoă lăm 12 apĭnh vang jang lơ̆m rim khŭl tang găn jĭ hơbuh lơ̆m apŭng. Thoi nŏh jei ƀô̆h hơdăh tơdrong pơm jŭk yŭk trong hơlau năm jang dôm tơdrong mơmat tat hrat hrĭn, tơdrong jang hle kơ rim boăl jang đoàn hơdrŭh tơdăm pơma atŭm păng khŭl hơdrŭh tơdăm apŭng Cư̆ Mgar pơma hơdrô̆ ‘nŏh ling lang đei jang kiơ̆ hơnơ̆ng. Tơdrong mă au ƀô̆h hơdăh hơnăp jang păng sơnong jang kơ hơdrŭh tơdăm lơ̆m vang iung jang hơdoi hăm khŭl kơdră đảng, kơdră chĕp pơgơ̆r tơring lơ̆m tang găn jĭ hơbŭh”.

            Hăm jơhngơ̆m đon tơchĕng “Tơdăh ư̆h kơ vang năm jang ‘măng mă au lei dang yơ dơ̆ng”, lơ bơngai jang đoàn, hơdrŭh tơdăm ư̆h kơ ‘nhoen chĭh hơnăn apĭnh năm mơ̆t jang lơ̆m khŭl bơ̆ jang tơgŭm djru tang găn jĭ hơbŭh Covid-19. Ư̆h kơ jô̆ măng năr, tŏ ‘mi gleh hrat lơ liơ, atŭm hăm khŭl anai, hơdrŭh tơdăm Dak Lăk tŏk bŏk kơrŭn đĭ jơhngơ̆m vang iung jang tang găn, tơpŭh hŭt jĭ jăn.

Bơngai chĭh: H’Xíu H’mốc

Tơblơ̆ nơ̆r: Amazưt