VOV4.Bahnar - Kơsơ̆ brei, năr 7/7, hŏk tro dêh char Dak Lăk yak mơ̆t pơlong môn Toán - môn pơlong mă 2 kơ ‘Măng pơlong lĕch ‘măng khoa jăl pêng sơnăm 2021 hăm pơm ƀai lơ̆m 90 pơnĭt jơ, pơlong vat ƀai ƀlep. Pơtôch jơ pơlong đĭ đăng đe ŏh sơkơ̆t hơdăh, ƀai pơlong sơnăm au ƀônh ƀiơ̆.

‘Măng pơlong môn Toán, ‘măng pơlong lĕch ‘măng khoă jăl pêng sơnăm au, măt bơngai hŏk tro tơ̆ Dak Lăk năm pơlong jơnei hlŏh 99,5%. Hăm hơmet ăn tôch hơlen, găh lơ hŏk tro mơ̆t lơ̆m lăm pơlong hoei chă tơtơ̆, sơđơ̆ng jơhngơ̆m păng pơtôch ‘măng pơlong jei chơt hơ iă kơ yuơ ƀai pơlong găh Toán sơnăm au ư̆h kơ măh tơnap, nhen lĕ ƀai pơlong pơgơ̆r pơlong năng đơ̆ng Dơnŏ anĭh tơm vei lăng hnam trương pơtho pơhrăm tơlĕch ăn hơdrol kơ ‘nŏh. Kiơ̆ đơ̆ng Dơnŏ anĭh chĕp pơgơ̆r ‘măng pơlong lĕch ‘măng khoă jăl pêng sơnăm 2021 dêh char Dak Lăk tơbăt, tơ̆ đĭ đăng hơnĭh pơlong lơ̆m dêh char, môn toán pơlong tơ̆ kơsơ̆ păng môn văn pơlong tơ̆ tĭl pơgê đei pơgơ̆r sơđơ̆ng ‘lơ̆ng, ƀlep hăm tơdrong tơchơ̆t.

Tơblơ̆ nơ̆r: Amazưt