VOV4.Bahnar  – 'Măng pơlong tôt ngĭp THPT xơnăm 2021, jâ̆p dêh char Đăk Lăk đei 19.800 'nu bơngai chih măt pơlong, tơ̆ 32 anih pơlong tơ̆ dôm apŭng, thĭ xăh păng plei tơm Buôn Ma Thuột. Vă tơdrong axong unh hơyuh vei xơđơ̆ng tơnăp lơ̆m dôm năr pơlong, Anih jang Unh hơyuh Đăk Lăk jang atŭm hăm Anih Pơtho Pơhrăm dêh char tơlĕch hơlen tôm anih pơlong, jơnŭm pơgơ̆r pơlong, dôm anih in đe thi păng châ̆m thi.

          Kiơ̆ đơ̆ng noh, akŏm trong jang mă tơnăp, axong unh hơyuh xơđơ̆ng păng trŏ ƀlep. Ƀok Nguyễn Văn Hảo – Kơdră Axong xơđơ̆ng unh hơyuh kơ Anih Unh hơyuh Đăk Lăk tơroi, mă pơrang jĭ Covid-19 hơbuh hli, mă lei dôm anih jang unh hơyuh mă po vei lăng hlôi chă hơlen xơđơ̆ng unh hơyuh; xek tơlang dôm tơdrong ưh đei 'lơ̆ng vă tang găn xar bar; hơmet tôm tơmam drăm hơmŏ duh nhen hơtŏk tơdrong hơlen, hơmet tơdrong răm, vei xơđơ̆ng tơroi tơtom ăn tôm 'năr pơlong.

Lan chih păng pơre nơ̆r