VOV4.Bahnar - Rim hơnĭh jang ŭnh hơyŭh tơ̆ dêh char Dak Lăk hlôi jang đang ming hơmet, pơtrŭh ŭnh hơyŭh sơđơ̆ng ăn dang 16.500 ŭnh hnam tơ̆ rim apŭng Ea Kar, M’Drăk, Ea Hleo. Hơdrol kơ ‘nŏh, kơ yuơ đei ƀơm đơ̆ng kial hơbŭt kơsô̆ 5, ‘mi tĭh atŭm hăm kial hơbŭt hlôi pơm ăn lơ jrăng ŭnh hơyŭh păk, tơlei kơtĕch, hư răm kơtang hơnĭh ƀiên ap tơ̆ dôm apŭng au.

Hơnĭh jang ŭnh hơyŭh Ea Kar hơmet ming tơlei ŭnh hơyŭh kơtĕch

Mă hơdăh, tơ̆ tơring hơlam Ea Kar păng M’Drăk, ‘mi tĭh pơm ăn tĕh tơdrŭt, ‘long păk glơ̆m tơlei ŭnh hơyŭh găh trong tơlei 471F18, pơm ăn 11.600 ŭnh hnam ƀar apŭng au ư̆h kơ đei ŭnh hơyŭh. Hơnĭh tơlei kơtĕch tơ̆ loel kông hơmnơt tơt, tơnap ăn chă ming hơmet. Mă lei, Hơnĭh jang Ŭnh hơyŭh Ea Kar hlôi iung jang ming hơmet păng pơtrŭh ŭnh hơyŭh lơ̆m năr blŭng giĕng au hloi.

Hơnĭh jang ŭnh hơyŭh Ea Hleo tơplĭh jrăng păng hơnĭh ƀiên ap hư răm kơ yiơ ‘mi kial pơrăm

Jei lei lăi, tơ̆ tơring kơ yuơ Hơnĭh jang ŭnh hơyŭh Ea Hleo vei lăng, kial hơbŭt pơm ăn 1 tŏ jrăng ŭnh hơyŭh tơgơ̆ păng hư răm 1 hơnĭh ƀiên ap hăm dang 5.000 ŭnh hnam ư̆h kơ đei ŭnh hơyŭh. Tơdrong ming hơmet đei jang đang lơ̆m năr hloi. Tơ̆ mĭnh ƀar tơring anai, rim hơnĭh jang ŭnh hơyŭh Dak Lăk hlôi ăn khŭl bơ̆ jang gak, năm ming hơmet hloi tơdăh đei tơdrong răm đơ̆ng ‘mi kial pơrăm, mă kăl tơ̆ rim tơring pơvang tang găn jĭ hơbŭh Covid-19.

Tơblơ̆ nơ̆r: Amazưt