VOV4.Bahnar - Tơ̆ tơring Ea Sôr, apŭng Ea Kar, dêh char Dak Lăk, mĭnh hơnĭh tŭh mong chuơ̆h glăi đei trŭh rơbau met khô̆i đei mĭnh grŭp jang sir iŏk tơmam drăm lơ̆m tĕh pơjing, gei hơnơ̆ng tơjê̆ Trong glung 29. Hơnĭh tŭh mong chuơ̆h au jing hơnĭh tơm vă chă chơ chuĕn ƀar păh 3 dêh char Phú Yên, Gia Lai păng Dak Lăk, hăp đei gei kơ jăp lơ̆m ƀar sơnăm au ki, ư̆h kơ mơ̆ng bri kon pơlei hlôi chă pơma tơroi ăn kơdră chĕp pơgơ̆r tơring ră bơih.

Hơnĭh tŭh mong chuơ̆h glăi au gei hơnơ̆ng prăt lơ̆m 2 sơnăm

Mĭnh năr vă đĭ khei 4, nhôn năm trŭh tơ̆ hơnĭh tŭh mong chuơ̆h glăi găh groi tĕh kơ Buôn Ea Puk, tơring Ea Sôr, apŭng Ea Kar, dêh char Dak Lăk. Tơ̆ au mĭnh hơnĭh tŭh mong chuơ̆h lơ lôk dang rơbau met khô̆i chuơ̆h đei pơjing tơ jê̆ Trong glung 29. Kơtă tơ̆ hơnĭh tŭh mong chuơ̆h, tơngla hơnĭh mơdro sa hlôi man hnam vă bơ̆ jang chă tĕch mơdro chuơ̆h, bơngai jang đei trŭh 10 ‘nu bơngai. Ƀok Hờ A Sủng, Bơngai vei lăng Buôn Ea Puk tơroi tơbăt, hơnĭh mong chuơ̆h au hlôi đei đơ̆ng sơnăm 2019 hlôi pơm tơsŭl tơsăl tơdrong erĭh sa kơ kon pơlei. Hăm lơ gre tĭh hơnơ̆ng chơ chuơ̆h mơ̆t lĕch pơm hư răm trong nơnăm tơ̆ mir, trong năm tơ̆ pơlei păng trŭh hloi Trong glung 29, lơ jăl trong pơchăh pơchek, tôch hơmơt đei tơdrong chă pơ̆k mư̆h hao gre trong au, pơm ăn kon pơlei tôch tơtăm păng blĕk jơhngơ̆m: “Kon pơlei hlôi pơma lơ ‘măng bơih găh tơdrong chuơ̆h au.Gre tôch kơ tĭh dang 15-20 tong gre tĭh hơnơ̆ng mơ̆t lĕch chơ chuơ̆h au, pơm ăn trong hư răm tôch kơtang adoi pơm ăn tơdrong erĭh sa kơ kon pơlei nhôn chhŭr nuih dêh. Kon pơlei hlôi pơma lơ ‘măng bơih, tơroi ăn kơdră tơring, kơdră tơring akhan hlôi tơroi ăn kơdră apŭng bơih, kơna gô chang apŭng xek tơlang lơ liơ ‘nŏh kon pơlei ư̆h kơ băt.”

Mơjĭt gre chơ chuơ̆h tĭh kơ jung kơdau mơ̆t lĕch hơnơ̆ng pơm ăn kon pơlei Ea Puk tơtok blĕk jơhngơ̆m

Ƀok Hoàng Anh Dũng, Kơ iĕng Kơdră chĕp pơgơ̆r Dơnŏ anĭh vei lăng kon pơlei tơring Ea Sôr, apŭng Ea Kar tơbăt, hơnĭh tŭh mong chuơ̆h glăi tơ̆ buôn Ea Puk găh groi tĕh 102, hla kak kơsô̆ 05 hăm tĕh să 13.000m2. Tơngla tĕh au găh ƀok Phan Đình Thái Anh (rơnĕh sơnăm 1979, oei tơ̆ phường Thành Nhất, pơlei tơm Buôn Ma Thuột). Ƀok Hoàng Anh Dũng sơkơ̆t hơdăh, pơ đĭ hơgăt tĕh au oei lơ̆m găh tĕh chŏh jang sa. Tơring sơkơ̆t hơdăh ‘nau jing tơdrong pơm glăi găh iŏk yua tĕh. Lơ̆m khei 3/2020, tơring Ea Sôr hlôi pơjing khŭl bơ̆ jang năm dăr lăng păng sơkơ̆t hơdăh đei dang 10.000 met khô̆i chuơ̆h đei chơ pơdŭ mong glăi tơ̆ au. Kơdră tơring jei hlôi apĭnh athei kơdră apŭng iung jang xek tơlang tơdrong au:“Găh hơnăp bơ̆ jang vei lăng tĕh đak ‘nŏh tơring ư̆h kơ gơ̆h xek tơlang ôh. Tơring jei hlôi chĭh hla bơar athei bơih, kăl đei kơdră kơpal pơrô̆ jang, iung jang hloi ‘nŏh mă đei sơđơ̆ng ƀiơ̆.”

Đei ƀơm trŭh hơnĭh tŭh mong chuơ̆h rơbau met khô̆i glăi gei hơnơ̆ng tơ jê̆ Trong glung 29, ƀok Nguyễn Ngọc Duẩn, Kơdră chĕp pơgơ̆r Hơnĭh vei lăng Mŭk drăm bri brăh păng cham char apŭng Ea Kar tơbăt, apŭng ‘nao pơjing khŭl bơ̆ jang ‘nŏh đei rim hơnĭh jang vei lăng Mŭk drăm bri brăh, Kŏng an, hơnĭh thuê̆ vă năm dăr lăng hơnĭh tŭh mong chuơ̆h au. ‘Măng mă blŭng sơkơ̆t hơdăh, hơnĭh mơdro sa iŏk yua tĕh ư̆h kơ ƀlep. Găh chuơ̆h au sir iŏk đơ̆ng yơ ‘nŏh hơnĭh mơdro sa tơroi akhan sir iŏk păng chơ chuĕn đơ̆ng ƀar dêh char Phú Yên păng Gia Lai. Khŭl bơ̆ jang lăp dăr lăng kiơ̆ lơ̆m hla bơar chĭh tơbăt thuê̆ đĕch, tim mă băt hơdăh găh chuơ̆h au đei sir iŏk glăi dăh mă lơ liơ ‘nŏh jei tim mă băt. Găh tơdrong kơ yuơ kă kiơ hơnĭh tŭh mong chuơ̆h glăi tôch kơ lơ au kơdră tơring hlôi tơroi tơbăt mă lei oei gei hơnơ̆ng đơ̆ng sơnăm 2019 trŭh dang ei, ƀok Duẩn akhan, tơdrong xek tơlang dôm tơdrong pơm glăi ‘nŏh tôch mơmat tat kơ yuơ bơngai bơ̆ jang kơ toei. Găh trong xek tơlang pơm glăi, ƀok Duẩn tơbăt, apŭng Ea Kar gô xek tơlang kơ hret păng athei hơnĭh mơdro sa vĭh tơ̆ nai, hơmet pơ ‘lơ̆ng hơgăt tĕh ‘lơ̆ng hơ iă nhen so dơ̆ng: “Găh tơdrong au ‘nŏh jĭ ƀô̆h hơdăh pơm glăi bơih. Lăp đơ̆ng rŏng xek phak jên ‘nŏh atheo hơmet pơ ‘lơ̆ng groi tĕh au nhen so dơ̆ng. Pơtĭh gia 3.000 khô̆i chuơ̆h ‘nŏh lơ̆m 30 năr kăl chơ chuĕn tơ̆ nai đĭ hloi.” 

         Mĭnh hơnĭh tŭh mong chuơ̆h glăi trŭh rơbau met khô̆i, tơ̆ jĭh Trong glung 29, gre chơ chuơ̆h kơdau ơ ŭ ơ ă, đei lơ bơngai ƀô̆h, đei lơ nơ̆r kon pơlei pơma tơgop tơbăt, mă lei prăt 2 sơnăm oei tim mă xek tơlang keh đang ‘mơ̆i. Tơdrong mă au tơ ƀô̆h hơdăh, bơ̆ jang vei lăng groi tĕh, mơdro sa mŭk drăm lơ̆m tĕh tơ̆ tơring au đei tơdrong. Tơdrong chuơ̆h sir iŏk glăi đei pơm jing ‘lơ̆ng, jing ƀlep vă tĕch mơdro ‘nŏh tôch kơtang.

Bơngai chĭh: Công Bắc

Tơblơ̆ nơ̆r: Amazưt