VOV4.Bahnar - ‘Năr brei (18/3), Anih jang Mặt trận tổ quốc Việt Nam dêh char Dak Lak pơ gơ̆r Hop akŏm pơ ma dơ nuh ‘măng mă 2 vă pơ ma dơ nuh chih hơ năn dôm bơ ngai lĕch pơ jei pơm bơ ngai tang măt Quốc hội jăl 15 păng dôm bơ ngai lĕch pơ jei pơm bơ ngai tang măt Jơ nŭm pơ gơ̆r kon pơ gơ̆r kon pơ lei dêh char jăl 10 ( jăl jang 2021- 2026). Tơ̆ hop akŏm, hăm jơ hngơ̆m đon drơ̆ng nơ̆r ‘lơ̆ng, rim bơ ngai tang măt hlôi yơ̆r ti pơ drơ̆ng kiơ̆ chih hơ năn 12 ‘nu kơ tơ ring lĕch pơ jei pơm bơ ngai tang măt Quốc hội jăl 15 păng 138 ‘nu lĕch pơ jei pơm bơ ngai tang măt Jơ nŭm pơ gơ̆r kon pơ lei dêh char Dak Lak jăl jang truh.

Đơ̆ng pơ tôch đơ̆ng hop akŏm pơ ma dơ nuh âu gơ̆ih kơ Mặt trận tổ quốc Việt Nam dêh char gô gơ̆ih iŏk nơ̆r tơ gop hơ len lăng păng đon lui đơ̆ng bơ ngai tăh hla tơ̆ tơ ring oei sa (đơ̆ng ‘năr 21/3 truh ‘năr 13/4) hăm bơ ngai đei rim anih jang, khŭl jang rơ̆ih lĕch pơ jei pơm bơ ngai tang măt Quốc hội jăl 15 păng bơ ngai tang măt Jơ nŭm pơ gơ̆r kon pơ lei dêh char, jăl jang 2021- 2026 kiơ̆ tơ drong hơ găt. Jăl jang 2021-2026, Dak Lak đei klăih song 9 ‘nu bơ ngai tang măt Quốc hội. Lơ̆m noh, 5 ‘nu oei sa păng bơ̆ jang tơ̆ tơ ring, 4 ‘nu yua đơ̆ng trung ương rơ̆ih. Kơ sô̆ bơ ngai tang măt Jơ nŭm pơ gơ̆r kon pơ lei dêh char ‘noh 75 ‘nu.

Thuem: Tơ blơ̆