VOV4.Bahnar - Pơ gê 8-4, Kơ dră vei lăng kon pơ lei dêh char Dak Lak Phạm Ngọc Nghị pơ gơ̆r hop akŏm vă hơ len năng, sek tơ lang 1,2 tơ drong ƀơm truh trong pơm hla ar tơ mât jên jang tơ̆ tơ ring.

Lơ̆m hop akŏm, bơ ngai tơ mât jên jang, bơ ngai dơ̆ng tang ăn dôm anih jang kơ pal roi tơ băt dôm tơ drong mơ mat tat, tơ hlăk tăk mưh pơm hla ar vă tơ mât jên jang tơ̆ tơ ring, đei: Tơ drong jang Tơ proh hơ met Tơ ring chă tơ mang lăng bri brăh, ngôi pơ chơt păng sân golf Dơ nâu Ea Nhái; tơ lĕch Tơ drong jang man anih Logistics tơ ring Tây Nguyên đơ̆ng Công ty tơm Bưu chính Viettel.

Jơ bơ̆ jang lơ̆m hop akŏm

Pơ ma pơ tôch hop akŏm, Kơ dră vei lăng kon pơ lei dêh char Dak Lak Phạm Ngọc Nghị tơ ƀôh đon tơ tăm hăm dôm tơ drong mơ mat tat, tơ hlăk tăk mă dôm bơ ngai tơ mât jên jang oei tơ ƀâp. Atŭm hăm ‘nŏh pơ jao ăn dôm anih jang kơ pal, tơ ring tơ rang jang hơ doi hăm dôm anih jang đei ƀơm truh hơ len năng trong jang, chih akŏm, hơ met pơ kĕh dôm hla ar chih, roi tơ băt dôm hla ar kăl kiơ̆ tơ drong hơ găt, jăh pơ truh ăn Dơ nŏ Anih vei lăng kon pơ lei dêh char set hơ len, hơ met pơ ‘lơ̆ng vă pơm ‘lơ̆ng ăn dôm tơ drong jang đei tơ lĕch jang đei yoa, tơ gop ăn tơ drong jang atŏk tơ iung mŭk drăm, tơ pôl tơ̆ dêh char.

Dơ̆ng: Tơ blơ̆