VOV4.Bahnar – Vă hơtŏk tơdrong pơkăp “hŏk tro 3 tơnăp” păng gơh rơgei mơlôh lơ̆m hnam trưng THPT, dêh char Đăk Lăk hlôi tơlĕch tơdrong pơtơm “Bơbŭng hnam hŏk tro 3 tơnăp păng cham char gơ rơgei mơlôh” tơ̆ minh ƀar hnam trưng THPT. Cham char ‘nao âu đei hơpơi gô jing anih akŏm, pơma dơnuh đơ̆ng đe hŏk tro păng bơngai pơtho vă hơtŏk hloh tơdrong pơtơm gơh rơgei lơ̆m đe hŏk tro.

Đơ̆ng xơnăm hŏk âu, hnam trưng THPT Trần Phú hlôi tơmơ̆t yua “Cham char gơh rơgei mơlôh” kơ hnam trưng. ‘Nâu jing tơdrong pơtơm đei Anih jang Đoan dêh char Đăk Lăk tơgŭm tơlĕch pơtơm hăm jên huach pơhlom 50 trĭu hlj, iŏk lăm hŏk hôp kơ bơngai pơtho hơmet ming pơjing anih hơlen xă hloh, đei tôm hla bar săch đŏk hơlen hăm dôm kơsâ̆p săch găh hơlen khoa hŏk, pơtho chĭnh trĭ, pơma xa, pơtơm pơm jang; pơdăh dôm tơdrong jang gơh rơgei kơ đe hŏk tro đei iŏk jơnei lơ̆m dôm tơdrong pơlong. Vàng Ngọc Đan, hŏk tro lăm 12A1 ăn tơbăt, đơ̆ng rŏng iŏk Hơpăh mă mônh ăh xơnăm xơ̆, xơnăm âu Đan atŭm hăm khul po pơtoi pơtơm tơdrong pơlong Gơh rơgei khoa hŏk kih thuơ̆t tơ̆ dêh char. Lơ̆m khei năr athei oei tơklăh kiơ̆ pơkăp vă tang găn păng tơjră pơrang jĭ Covid-19, Cham char gơh rơgei mơlôh kơ hnam trưng hlôi jing anih trŏ ƀlep vă khul đŏk hơlen, pơma đam găh tơdrong pơtơm chih akŏm: “Ƀơ̆t mă nhôn hŏk trư̆k tuyê̆n noh ƀơm lơ tơnap tap ăh pơma dơnuh hăm bơngai pơtho. Đơ̆ng rŏng kơnh mưh pơrang jĭ pă đei hli noh nhôn gô pơma dơnuh kơtă hăm bơngai pơtho, gô iŏk yua chamc har rơgei âu vă nhôn gơh pơma dơnuh hăm bơngai pơtho ƀônh hiôk hloh vă đei lơ tơdrong pơtơm gơh rơgei hloh”.

‘Nhŏng Trần Minh Tú, Ƀĭ thư Đoan hnam trưng THPT Trần Phú ăn tơbăt, âu jing anih ‘măn ăn đe hŏk tro păng bơngai pơtho atŭm pơma đam, hơlen khoa hŏk păng chih akŏm tơdrong pơtơm ăn dôm tơdrong pơlong.

Vă hơtŏk hŏk tro gơh rơgei păng vang akŏm hơlen khoa hŏk, rim xơnăm hnam trưng adoi tơlĕch pơlong gơh rơgei khoa hŏk kih thuơ̆t tơ̆ hnam trưng păng rơih dôm tơdrong jang rơgei vă năm pơlong tơ̆ dêh char. Xơnăm hŏk âu, tơdrong pơlong duh đei tơlĕch đơ̆ng blŭng khei 11 păng tŏk bŏk oei xơng iŏk dôm tơdrong pơtơm hơlen đơ̆ng đe hŏk tro chih măt. Đơ̆ng rŏng kơ rơih đei dôm tơdrong jang, mă gơh pơm jang noh gô pơjao ăn bơngai pơtho păng tơgŭm đe hŏk tro keh đang tơmam vă pơtruh pơlong: “Hăm cham char gơh rơgei mơlôh gô tơlĕch minh ƀar tơdrong jang vă tơ iung tơdrong rơgei ăn hŏk tro. Mă blŭng noh tơdrong pơlong gơh rơgei khoa hŏk kih thuơ̆t tơ̆ dêh char. Atŭm hăm noh lơ̆m xơnăm hŏk 2021-2022, pơtoi tơdrong rơgei kơ khul chi đoan bơngai pơtho ăn đe hŏk tro, tơroi găh tơdrong hlôh vao lơ̆m hơlen khoa hŏk kih thuơ̆t thoi yơ păng pơih trong ăn hŏk tro hơtŏk pơm thoi yơ, gô pơtho hơdăh vă pơm tơlĕch tơmam drăm tơnăp hloh păng năm akŏm lơ̆m cham char gơh rơgei mơlôh âu vă pơdăh”

Kiơ̆ kơ ‘nhŏng Trần Doãn Tới, Phŏ Ƀĭ thư Đoan dêh char, kơdră Jơnŭm sinh viên dêh char Đăk Lăk, lơ̆m xơnăm âu, đei tơdrong tơgŭm đơ̆ng Trung ương Jơnŭm Sinh viên Việt Nam, dêh char Đăk Lăk hlôi rơih tơlĕch 4 tơdrong jang “Cham char gơh rơgei păng Bơbŭng hnam hŏk tro 3 tơnăp” tơ̆ 4 hnam trưng THPT lơ̆m dôm apŭng Krông Bông, Krông Pach, Ea Sup păng plei tơm Buôn Ma Thuột. ‘Nâu jing dôm anih jang rơgei lơ̆m tơlĕch pơlong dăh mă hnam trưng tơ̆ tơring tơnap tap, tơring xơlam teh. Rim tơdrong jang đei jên tơgŭm 50 trĭu hlj, đei 2 tơdrong jang, lơ̆m noh “Bơbŭng hnam hŏk tro 3 tơnăp” đei bơ̆ hăm kem, không mam đei bơbŭng; găh anăp đei 1 kơƀang tih chih kơtơ̆ng ang, tơchơ̆t kơ tơdrong pơlong  “Hŏk tro 3 tơnăp”, găh rŏng noh axong jing 3 rơvak vă ‘măn hla bar lê̆, kơchai như̆a, kơđoh kơlong păng đei ‘măn ăh cham hnam trưng. “Cham char gơh rơgei mơlôh” đei cham vă hŏk tro akŏm, pơma dơnuh, hơlen khoa hŏk. Rim tơdrong jang đei tơgŭm thêm hloh 100 kơsâ̆p săch lơ kơloăi.

‘Nhŏng Trần Doãn Tới akhan, dôm tơdrong jang âu gô tơgop hơtŏk jơhngơ̆m vă dôm anih jang pơtoi tơlĕch jang đei jơnei găh tơdrong mă đe mơlôh pơlong gơh rơgei păng hŏk tro 3 tơnăp lơ̆m hnam trưng, pơm trong ăn hŏk tro pơhrăm, tơlĕch hơlen khoa hŏk; pơjing tơdrong lăp păng pơkăp ‘nao ăn pơtho hŏk pơhrăm ăh jăl hŏk trung hŏk phôh thŏng: “Khei năr truh, tơdrong tơlĕch jang  “Hŏk tro 3 tơnăp” păng “Đe mơlôh gơh rơgei” noh duh gô pơtoi pơm kiơ̆ dôm tơdrong pơkăp gơh rơgei ‘nao tơ̆ dôm anih jang lơ̆m hnam trưng THPT lơ̆m jâ̆p dêh char. Đơ̆ng 4 tơdrong pơlong gơh rơgei mă blŭng âu noh nhôn gô pơih xă păng adrin truh đĭ jăl jang ăh xơnăm 2022 gô đei 10 tơdrong pơlong gơh rơgei kơ dôm hnam trưng. Kiơ̆ đơ̆ng noh gô pơm trong, hơlêm vă lơ̆m khei năr truh dôm anih jang adrin, kơ ‘nôh pơm thoi yơ hơtŏk jang đei jơnei tơdrong pơlong hŏk tro 3 tơnăp păng tơdrong pơlong đe mơlôh gơh rơgei".

Dôm xơnăm tơjê̆ âu, dôm Jơnŭm jang Khoa hŏk păng Kih thuơ̆t dêh char Đăk Lăk hlôi jang atŭm hăm Anih Pơtho Pơhrăm, Anih Khoa hŏk păng Kŏng ngê̆ hơnơ̆ng pơgơ̆r Tơdrong pơlong Gơh rơgei ăn đe hơ ioh. Xơnăm xơ̆, đei 123 tơdrong pơlong, tơmam drăm kơ 264 tơ ‘ngla, anih jang vang pơtruh pơlong. Lơ̆m noh, tơmam hơpăh Kăp gĭt noh hăm Tơdrong pơlong “Kơmăi kơdâu pơkă păng tơroi găh đak kơmăi xŏ nhă” kơ minh ‘nu hŏk tro tơ̆ xăh Dur Kmăn, apŭng Krông Ana. Tơdrong pơlong noh hơtŏk tơ iung păng chĕp vei tơdrong rơgei kơ đe hơ ioh tơ̆ dêh char Đăk Lăk, tơgŭm ăn đe oh hơtŏk tơdrong hlôh vao, tơdrong gơh rơgei păng hơtŏk tơdrong pơlong hŏk pơhrăm pơm jang tơnăp.

Lan chih păng pơre nơ̆r