VOV4.Bahnar - Anih jang thuế dêh char Dak Lak tơ băt, mă đơ̆ng blŭng sơ năm truh dang ei jĭ Covid – 19 đei ƀôh krê hơ mơt ƀơm ư̆h kơ ‘lơ̆ng truh tơ drong jang pơm tơ lĕch tĕch mơ dro, mă lei anih jang thuế dêh char hlôi iŏk đei hloh  2.688 ti hlak jên, đei 63% tơ chĕng jô̆ đơ̆ng trung ương pơ jao păng tŏk 14% pơ têng hăm khei ‘nâu sơ năm sơ̆. Kiơ̆ kơ ƀok Ngô Việt Hồng – Phŏ kơ dră anih jang thuế dêh char Dak Lak, tơ drong tơm pơm ăn iŏk jên jang tŏk pran ‘noh jĭ yua đơ̆ng rim jên iŏk đơ̆ng rim tơ drong jang ŭnh điên măt ‘năr tŏk lơ; tơ mam ƀier, hơ lăk, đak ‘ngam kŭm tŏk lơ pơ têng hăm dôm sơ năm hơ drol; ‘ngoăih kơ ‘noh, thuế iŏk đơ̆ng thuê teh, vei lăng cham char, jang kơ măy kơ mŏk... kŭm tŏk. Đơ̆ng dang ei truh hơ tuch sơ năm, anih jang thuế dêh char Dak lak hơ nơ̆ng jang kiơ̆ pơ gơ̆r đơ̆ng kơ dră kơ pal tơ lĕch jang rim tơ drong iŏk thuế; hơ tŏk loi dơ̆ng tơ drong jang hơ dai hăm khŭl kơ dră tơ ring, hre gơ̆t thuê̆ iŏk đei ‘lơ̆ng.

Thuem: Tơ blơ̆